ಸಮಾಜಮುಖಿ ಕೆಲಸ ಜೀವಂತಿಕೆಗೆ ಕಾರಣ

ಯಾದಗಿರಿ : ಜನನ ಆಕಸ್ಮಿಕ, ಮರಣ ಅನಿವಾರ್ಯವಾದರೂ ಈ ನಡುವಿನ ಬದುಕು ಎಲ್ಲರ ಪ್ರೀತಿ, ವಿಶ್ವಾಸಕ್ಕೆ ಪಾತ್ರರಾಗುವಂತೆ ನಡೆಸುವುದೇ ನಿಜವಾದ ಜೀವನ ಎಂದು ಅಬ್ಬೆತುಮಕೂರಿನ ವಿಶ್ವಾರಾಧ್ಯ ಮಠದ ಪೀಠಾಧಿಪತಿ ಶ್ರೀ ಡಾ.ಗಂಗಾಧರ ಸ್ವಾಮೀಜಿ ಹೇಳಿದರು.

ನಗರದಲ್ಲಿ ಬುಧವಾರ ಆಯೋಜಿಸಿದ್ದ ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್​ ಜಿಲ್ಲಾ ಉಪಾಧ್ಯಕ್ಷ ಆರ್​.ಮಹಾದೇವಪ್ಪ ಅಬ್ಬೆತುಮಕೂರು ಅವರ ಅಭಿನಂದನಾ ಸಮಾರಂಭದ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು. ಜೀವನದಲ್ಲಿ ಪರೋಪಕಾರ ಮತ್ತು ನಿಸ್ವಾರ್ಥದ ಬದುಕು ಸಾಗಿಸಿದರೇ ಅಂತಹವರು ಕಾಲಾನುಕಾಲ ಅನೇಕರ ಮನಸ್ಸಿನಲ್ಲಿ ಸ್ಥಾನ ಪಡೆದುಕೊಳ್ಳುತ್ತಾರೆ ಎಂದರು.

ಇಂದಿನ ಕಾರ್ಯಕ್ರಮದ ರುವಾರಿ ಆರ್​.ಮಹಾದೇವಪ್ಪ ಅವರು ಸಹ ಸದಾ ಜನರ ನಡುವೆ ಇದ್ದು, ಹಲವಾರು ಸಂಸ್ಥೆಗಳೊಂದಿಗೆ ಗುರುತಿಸಿಕೊಂಡು ಸೇವೆ ಮಾಡುತ್ತಿರುವುದಕ್ಕೆ ಇಲ್ಲಿ ಸೇರಿದ ಜನರೇ ಸಾಕ್ಷಿ ಎಂದರು. ಮನುಷ್ಯರೊಂದಿಗೆ ಕೊನೆಗೆ ಬರುವುದು ಒಳ್ಳೆಯದು, ಕೆಟ್ಟದು. ನಾವು ಬದುಕಿರುವಾಗ ಒಳ್ಳೆಯ ಕೆಲಸಗಳು ಮಾಡಿದರೇ ನಾವು ಕಾಲವಾದ ನಂತರವೂ ಅವು ಜೀವಂತವಾಗಿಳಿದು ನಮ್ಮನ್ನು ಸದಾ ನೆನಪಿಸುತ್ತವೆ. ಕಾರಣ, ಜೀವನದಲ್ಲಿ ಏನೆಲ್ಲ ಗಳಿಸಿದರೂ ಉತ್ತಮ ನಡತೆ, ಸಂಸ್ಕಾರ ಇವುಗಳು ಇಲ್ಲದಿದ್ದರೇ ಜೀವನ ಪೂರ್ತಿಯಾಗುವುದಿಲ್ಲ. ಕಳೆದ ಐದಾರು ದಶಕಗಳಿಂದ ಸಾರ್ವಜನಿಕ ಜೀವನದಲ್ಲಿ ಇದ್ದು, ಎಲ್ಲ ಆಗು&ಹೋಗುಗಳಲ್ಲಿ ಸಕ್ರೀಯವಾಗಿ ಕೆಲಸ ಮಾಡಿದ್ದರ ಪರಿಣಾಮವೇ ಇಂದು ಮಹಾದೇವಪ್ಪ ಅವರ ಅಭಿನಂದನಾ ಗ್ರಂಥ ಹೊರಬಂದಿದೆ ಎಂದು ಹೇಳಿದರು.

"ಸೌಮ್ಯಭಾವದ ಸ್ನೇಹಜೀವಿ' ಎಂಬ ಗ್ರಂಥದ ಹೆಸರೇ ಸೂಚಿಸುವಂತೆ ಮಹಾದೇವಪ್ಪ ಇಂದಿಗೂ ಸರ್ವರೊಂದಿಗೆ ಹೊಂದಿರುವ ಆತ್ಮೀಯತೆ ಅವರ ಜೀವನ ಪುಸ್ತಕ ರೂಪದಲ್ಲಿ ಪ್ರಕಟಗೊಂಡು ಮುಂದಿನ ಪೀಳಿಗೆಗೆ ಮಾದರಿಯಾಗಲಿದೆ ಎಂದು ಡಾ.ಗಂಗಾಧರ ಶ್ರೀಗಳು ಮಾರ್ಮಿಕವಾಗಿ ನುಡಿದರು.

ನೇತೃತ್ವದ ವಹಿಸಿದ್ದ ಬೆಳಗಾವಿ ಮುಕ್ತಿಮಠದ ಶಿವಸಿದ್ದಸೋಮೇಶ್ವರ ಸ್ವಾಮೀಜಿ, ಮಾನವ ಜನ್ಮ ಬಹುದೊಡ್ಡದು ಎಂದು ಹಿರಿಯರು ಹೇಳಿದಂತೆ ಮನುಷ್ಯ ತನ್ನ ಜೀವನದಲ್ಲಿ ಜನಮುಖಿ ಕೆಲಸಗಳನ್ನು ಮಾಡಿ ಗುರುತಿಸಿಕೊಂಡಾಗಲೇ ಅದಕ್ಕೊಂದು ಬೆಲೆ. ಈ ನಿಟ್ಟಿನಲ್ಲಿ ಆರ್​.ಮಹಾದೇವಪ್ಪ ಅವರು ಕಳೆದ ಐದಾರು ದಶಕಗಳಿಂದ ಸಾರ್ವಜನಿಕ ಜೀವನದಲ್ಲಿದ್ದು ಮಾಡಿರುವ ಒಳ್ಳೆಯ ಕೆಲಸಗಳೇ ಅವರನ್ನು ಎತ್ತರಕ್ಕೆ ಬೆಳೆಸಿದೆ ಎಂದರು.

ಸಮ್ಮುಖ ವಹಿಸಿದ್ದ ಗುರುಮಠಕಲ್​ ಖಾಸಾಮಠದ ಶಾಂತವೀರ ಗುರುಮುರುರಾಜೇಂದ್ರ ಸ್ವಾಮೀಜಿ, ಸಾತಖೇಡದ ರಾಜಬಾಗ ಸವಾರ ಕ್ಷೇತ್ರದ ಪೀಠಾಧಿಪತಿ ಈರಣ್ಣ ತಾತ ಅವರು ಮಾತನಾಡಿದರು. ಅಧ್ಯಕ್ಷತೆ ವಹಿಸಿ ಮಾತನಾಡಿದ ಶಾಸಕ ಚನ್ನಾರಡ್ಡಿ ಪಾಟೀಲ್​ ತುನ್ನೂರ, ವಿವಿಧ ಸಂ, ಸಂಸ್ಥೆಗಳೊಂದಿಗೆ ಗುರುತಿಸಿಕೊಂಡು ಸದಾ ಒಂದಿಲ್ಲೊಂದು ಚಟುವಟಿಕೆಗಳಲ್ಲಿ ತೊಡುವ ಮಹಾದೇವಪ್ಪ ಸಮಾಜಮುಖಿ ವ್ಯಕ್ತಿಯಾಗಿದ್ದಾರೆ ಎಂದರು.

ಬಸವ ಸಮಿತಿ ಉಪಾಧ್ಯಕ್ಷ ಹಣಮಂತರಡ್ಡಿ ಮುದ್ನಾಳ್​, ಜಿಲ್ಲಾ ಕಸಾಪ ಅಧ್ಯಕ್ಷ ಸಿದ್ದಪ್ಪ ಹೊಟ್ಟಿ, ಎನ್​.ಎಸ್​.ಮಹಾದೇವಪ್ಪ, ವಿಶ್ವನಾಥರೆಡ್ಡಿ ದರ್ಶನಾಪುರ, ರಾಚಣಗೌಡ ಮುದ್ನಾಳ್​, ಮಹೇಶರೆಡ್ಡಿ ಮದ್ನಾಳ, ಟಿ.ಕೃಷ್ಣಪ್ಪ, ಲೇಖಕ ಡಾ.ಪ್ರದಿಪ್​ ಹೇಬ್ರಿ, ಟಿ.ಸುಬ್ಬರಾಜು, ಚನ್ನಕೇಶವಗೌಡ ಅತಿಥಿಗಳಾಗಿ ಭಾಗವಹಿಸಿದ್ದರು.ಡಾ.ಸುಭಾಷಚಂದ್ರ ಕೌಲಗಿ ಅಭಿನಂದನಾ ನುಡಿಗಳನ್ನು ಆಡಿದರು, ಡಾ.ಸಿದ್ದರಾಜರೆಡ್ಡಿ ಪ್ರಾಸ್ತಾವಿಕವಾಗಿ ಮಾತನಾಡಿದರು, ಬಸವರಾಜ ಅರಳಿ ಮೊಟನಳ್ಳಿ ಸ್ವಾಗತಿಸಿದರು, ಪ್ರಕಾಶ ಅಂಗಡಿ ಕನ್ನಳ್ಳಿ ನಿರೂಪಿಸಿದರು. ಡಾ.ಭೀಮರಾಯ ಲಿಂಗೇರಿ ವಂದಿಸಿದರು.

ಹಿರಿಯ ನಾಗರಿಕರಿಗೆ ಸಮವಸ, ಗುರುತಿನ ಚೀಟಿ, ಧಾರ್ಮಿಕ ಕೇಂದ್ರಗಳಲ್ಲಿ ಭಕ್ತರ ಅನುಕೂಲಕ್ಕಾಗಿ ಗಾಲಿ ಕುರ್ಚಿ, ಅಂಧರಿಗೆ ಕಿಟ್​, ಅಂಗವಿಕಲರಿಗೆ ಹಾಗೂ ಹಿರಿಯ ನಾಗರಿಕರಿಗೆ ಊರುಗೋಲು, ಕನ್ನಡಕಗಳನ್ನು ವಿತರಿಸಲಾಯಿತು. ರಕ್ತದಾನ ಶಿಬಿರ, ಉಚಿತ ಆರೋಗ್ಯ ಶಿಬಿರ ನಡೆಯಿತು. ಇದೇ ವೇಳೆ ಆರ್​.ಮಹಾದೇವಪ್ಪ ಅವರ 57ನೇ ವಿವಾಹ ಮಹೋತ್ಸವವು ನಡೆಯಿತು8. ಸಾವಿರಾರು ಸಂಖ್ಯೆಯಲ್ಲಿ ಅವರ ಅಭಿಮಾನಿಗಳು ಭಾಗವಹಿಸಿದ್ದರು.