ನೆಮ್ಮದಿ ಜೀವನಕ್ಕೆ ಸತ್ಸಂಗ ಪೂರಕ

ಹುಲಸೂರು: ಜೀವನದಲ್ಲಿ ನೆಮ್ಮದಿ ಸಿಗಬೇಕಾದರೆ ಸತ್ಸಂಗ ಹಾಗೂ ಸಂಗೀತ ಆಲಿಸುವುದು ಅವಶ್ಯಕ ಎಂದು ಗುರು ಬಸವೇಶ್ವರ ಸಂಸ್ಥಾನ ಮಠದ ಪೀಠಾಧಿಪತಿ ಶ್ರೀ ಡಾ.ಶಿವಾನಂದ ಸ್ವಾಮೀಜಿ ನುಡಿದರು.

ಪಟ್ಟಣದ ಗುರು ಬಸವೇಶ್ವರ ಕಲ್ಯಾಣ ಮಂಟಪದಲ್ಲಿ ಬಸವ ಕೇಂದ್ರದಿಂದ ಮಂಗಳವಾರ ಆಯೋಸಿದ್ದ ಭಜನಾ ಸ್ಪರ್ಧೆ ಕಾರ್ಯಕ್ರಮದಲ್ಲಿ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಪೂಜ್ಯರು, ಶರಣರ ತತ್ವ, ವಚನ ಸಾಹಿತ್ಯ ಹಾಗೂ ಬಸವಣ್ಣನವರ ಸಮಾನತೆಯ ಸಂದೇಶವನ್ನು ಇಂದಿನ ಯುವ ಪೀಳಿಗೆಗೆ ತಲುಪಿಸುವ ಕೆಲಸ ನಿರಂತರವಾಗಿ ನಡೆಯಬೇಕು ಎಂದು ಹೇಳಿದರು.

ಹುಲಸೂರಿನಲ್ಲಿ ಕೆಲ ದಿನಗಳಿಂದ ಬಸವ ಕೇಂದ್ರದಿಂದ ಬಸವ ತತ್ವ ಪ್ರಚಾರ ಹಾಗೂ ಪ್ರಸಾರದ ಜತೆಗೆ ಯುವಕರು ಜನಪರ ಕಾರ್ಯಕ್ರಮಗಳು ಮಾಡುತ್ತಿರುವುದು ಸಂತಸ ತಂದಿದೆ ಎಂದರು.

ಉಸ್ತುರಿ ಶ್ರೀ ಕೋರ್ಣೇಶ್ವರ ಸ್ವಾಮೀಜಿ ಮಾತನಾಡಿ, ಬಸವ ತತ್ವ, ಮಾನವೀಯತೆ, ಸಮಾನತೆ ಹಾಗೂ ಕಾಯಕದ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿ ಕೊಳ್ಳಬೇಕು ಎಂದರು.

ಬಸವ ಕೇಂದ್ರದ ತಾಲೂಕು ಘಟಕದ ಅಧ್ಯಕ್ಷ ಆಕಾಶ ಖಂಡಾಳೆ ಮಾತನಾಡಿ, ಬಸವ ತತ್ವ, ವಚನ ಸಾಹಿತ್ಯ ಹಾಗೂ ಭಜನಾ ಪರಂಪರೆಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಹೇಳಿದರು.

ಗ್ಯಾರಂಟಿ ಯೋಜನೆಗಳ ಜಿಲ್ಲಾ ಉಪಾಧ್ಯಕ್ಷೆ ಲತಾ ಹಾರಕೂಡೆ, ಜಿಪಂ ಮಾಜಿ ಅಧ್ಯಕ್ಷ ಅನಿಲ ಭೂಸಾರೆ, ಜಿಪಂ ಮಾಜಿ ಸದಸ್ಯರಾದ ಮಲ್ಲಪ್ಪ ಧಬಾಲೆ, ಸುಧೀರ ಕಾಡಾದಿ,ಬಸವಕಲ್ಯಾಣ ಬಸವ ಕೇಂದ್ರದ ಅಧ್ಯಕ್ಷ ರವಿ ಕೊಳಕುರ, ಪತ್ರಕರ್ತ ವೀರಶೆಟ್ಟಿ ಮಲಶೆಟ್ಟಿ, ಮಲ್ಲಿಕಾರ್ಜುನ ದೇವಪ್ಪ ಮಾತನಾಡಿದರು.

ಗ್ಯಾರಂಟಿ ಯೋಜನೆ ತಾಲೂಕು ಅಧ್ಯಕ್ಷ ಸಿದ್ರಾಮ ಕಾಮಣ್ಣ, ಪಿಕೆಪಿಎಸ್​ ಸಹಕಾರ ಸಂಘದ ಅಧ್ಯಕ್ಷ ಭಾಗವತ ಜಾನಬಾ, ಜಾಗತಿಕ ಲಿಂಗಾಯತ ಮಹಾಸಭಾ ತಾಲೂಕು ಅಧ್ಯಕ್ಷ ಪ್ರವಿಣ ಕಾಡಾದಿ, ಕೃಷ್ಣಾ ಗೋಣಿ, ಶ್ರೀದೇವಿ ನೀಡೋದೆ, ರೇಖಾ ಕಾಡಾದಿ, ಅಮರ ಬಡದಾಳೆ, ಸೂರ್ಯಕಾಂತ ಬಿರಾದಾರ, ಷಣ್ಮುಖ ಪಾಟೀಲ, ಬಸವರಾಜ ರಗಟ್ಟೆ, ದಿಲೀಪಕುಮಾರ ದೇಸಾಯಿ, ಸತೀಶ ಹಿರೇಮಠ ಇತರರಿದ್ದರು. ತೊಂಡಾರೆ ನಿರೂಪಣೆ ಮಾಡಿ ವಂದಿಸಿದರು. ಭಜನೆ ಸ್ಪರ್ಧೆಯಲ್ಲಿ ಹುಲಸೂರು ಸೇರಿ ವಿವಿಧ ಗ್ರಾಮಗಳಿಂದ ಒಟ್ಟು 15 ಭಜನಾ ತಂಡಗಳು ಭಾಗವಹಿಸಿದ್ದವು. ಸಾಯಗಾಂವದ ಬಸವೇಶ್ವರ ಭಜನಾ ತಂಡ ಪ್ರಥಮ ಸ್ಥಾನ ಪಡೆದು 3,333 ರೂ.ನಗದು, ತೋಗಲೂರನ ಮಹಾದೇವ ಭಜನಾ ತಂಡ ದ್ವೀತಿಯ ಸ್ಥಾನ 2,333 ನಗದು ರೂ. ಹಾಗೂ ಹಾಲಹಳ್ಳಿಯ ಬಸವೇಶ್ವರ ಭಜನಾ ತಂಡ ತೃತೀಯ ಸ್ಥಾನ ಪಡದು 1,333 ನಗದು ರೂ. ಹಾಗೂ ಪಟ್ಟಣದ ಶಿವಾನಂದೇಶ್ವರ ಭಜನಾ ತಂಡ 4ನೇ ಸ್ಥಾನ ಪಡೆದು 1,000 ನಗದು ಬಹುಮಾನ ಹಾಗೂ ಪ್ರಶಸ್ತಿಪತ್ರ ನೀಡಿ ಸನ್ಮಾನಿಸಲಾಯಿತು.