ಮುತ್ತಗಾ ಗ್ರಾಮಕ್ಕೆ ಹೆಚ್ಚುವರಿ ಬಸ್​ ಓಡಿಸಿ

ಶಹಾಬಾದ್​: ಮುತ್ತಗಾ ಗ್ರಾಮದ ವಿದ್ಯಾರ್ಥಿಗಳು, ಸಾರ್ವಜನಿಕರು ಶಹಾಬಾದ್​, ಚಿತ್ತಾಪುರಗೆ ಸಂಚರಿಸಲು ಅನುಕೂಲವಾಗುವ ನಿಟ್ಟಿನಲ್ಲಿ ನಿತ್ಯ ಹಳ್ಳಿಯಿಂದ ಹೆಚ್ಚುವರಿ ಬಸ್​ಗಳನ್ನು ಓಡಿಸುವಂತೆ ಒತ್ತಾಯಿಸಿ ಗ್ರಾಮಸ್ಥರು ಬಸ್​ ಸಂಚಾರ ತಡೆದು ಶನಿವಾರ ಪ್ರತಿಭಟನೆ ನಡೆಸಿದರು.

ಗ್ರಾಮಕ್ಕೆ ಬೆಳಗ್ಗೆ ಹಾಗೂ ಸಂಜೆ ಒಂದು ಬಾರಿ ಮಾತ್ರ ಬಸ್​ ಸಂಚರಿಸುತ್ತವೆ. ಹಳ್ಳಿಯೂ ಶಹಾಬಾದ್​ ಹಾಗೂ ಚಿತ್ತಾಪುರದಿಂದ ಒಳಭಾಗದಲ್ಲಿದ್ದು, ನಿತ್ಯವೂ ಬೇರೆಡೆ ಸಂಚಾರಕ್ಕೆ ತೊಂದರೆ ಅನುಭವಿಸುವಂತಾಗಿದೆ. ವಿದ್ಯಾರ್ಥಿಗಳಿಗೆ ಶಾಲಾ&ಕಾಲೇಜಿಗೆ ಹೋಗಲು ತೊಂದರೆಯಾಗುತ್ತಿದೆ. ಒಮ್ಮೊಮ್ಮೆ ಬಸ್​ ಬರುವುದೇ ಇಲ್ಲ ಎಂದು ಅಳಲು ತೋಡಿಕೊಂಡರು.

ಚಿತ್ತಾಪುರ ಡಿಪೋ ಅಧಿಕಾರಿಗಳು ದೂರವಾಣಿ ಮೂಲಕ ಗ್ರಾಮಸ್ಥರೊಂದಿಗೆ ಮಾತನಾಡಿ, ನಿಮ್ಮ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಲಾಗುವುದು. ಒಮ್ಮೆ ಕಚೇರಿಗೆ ಬಂದು ಸಮಸ್ಯೆ ಕುರಿತು ಸಮಗ್ರ ಮಾಹಿತಿ ನೀಡಿ ಎಂದು ತಿಳಿಸಿದರು. ಬಳಿಕ ಹೋರಾಟ ವಾಪಸ್​ ಪಡೆಯಲಾಯಿತು.

ಪ್ರಮುಖರಾದ ಡಾ.ಮಹೇಂದ್ರ ಕೋರಿ, ನಾಗಣ್ಣ ಪೂಜಾರಿ, ಬಸವರಾಜ ಪಾಟೀಲ್​, ನಾಗರಾಜ ಗರೂರ, ಮಹಾಂತೇಶ ಹೊನಗುಂಟಿ, ಶರಣು ಪಾಟೀಲ್​, ರವಿ ಪಂಚಾಳ ಚಿತ್ತಾಪುರಕ್ಕೆ ತೆರಳಿ ಅಧಿಕಾರಿಗಳೊಂದಿಗೆ ಚರ್ಚೆ ನಡೆಸಿ, ಶಾಲಾ ಮಕ್ಕಳು ಮತ್ತು ಸಾರ್ವಜನಿಕರಿಗೆ ಅನುಕೂಲಕ್ಕೆ ಬೆಳಗ್ಗೆ 8.30, 11ಕ್ಕೆ, ಮಧ್ಹಾಹ್ನ 2 ಹಾಗೂ ಸಂಜೆ 4.45ಕ್ಕೆ ಬಸ್​ ಓಡಿಸಬೇಕೆಂದು ಮನವಿ ಮಾಡಿದರು. ಇದಕ್ಕೆ ಅಧಿಕಾರಿಗಳು ಸ್ಪಂದಿಸಿದರು.

ಭಾಗ್ಯಶ್ರೀ, ಭವಾನಿ, ಚಂದ್ರಕಲಾ, ಜ್ಯೋತಿ, ದಿವ್ಯಾ, ಬಸಯ್ಯ ಸ್ವಾಮಿ, ಮಹಾನಂದಾ, ಗೀತಾ, ಗುರುಲಿಂಗಯ್ಯ, ಮಲ್ಲು ಹೊನಗುಂಟಿ, ದೇವಕಿ, ಕಾವೇರಿ, ವೀರಭದ್ರಪ್ಪ ಇತರರಿದ್ದರು.