ಬತ್ತಿದ ಭೀಮೆಗೆ ಜೀವಕಳೆ

ಅಫಜಲಪುರ: ತಾಲೂಕಿನಲ್ಲಿ ಮಳೆ ಕೊರತೆಯಿಂದಾಗಿ ಬಿತ್ತನೆ ಪ್ರಮಾಣ ಕುಸಿಯುವುದರ ಜತೆಗೆ ಜೀವಜಲಕ್ಕಾಗಿ ಪರದಾಡುವಂಥ ಸ್ಥಿತಿ ಸೃಷ್ಟಿಯಾಗಿತ್ತು. ಸದ್ಯ ಮಹಾರಾಷ್ಟ್ರದ ಉಜನಿ ಜಲಾಶಯದಿಂದ 61,600 ಕ್ಯೂಸೆಕ್​ ನೀರು ಬಿಟ್ಟಿದ್ದರಿಂದ ಜನ ನಿಟ್ಟುಸಿರು ಬಿಡುವಂತಾಗಿದೆ.

ಈಗಾಗಲೇ ತಾಲೂಕು ವ್ಯಾಪ್ತಿಯಲ್ಲಿರುವ ಭೀಮಾ ನದಿಗೆ 135ಕ್ಕೂ ಹೆಚ್ಚು ಕಿಮೀ ನೀರು ಹರಿಯುತ್ತಿದ್ದು, ಅಲ್ಪಸ್ವಲ್ಪ ಉಳಿದ ಬೆಳೆ ಕೈಗೆ ಬರಬಹುದು ಎಂಬ ಆಶಾಭಾವ ರೈತರಲ್ಲಿ ಚಿಗುರೊಡೆದಿದೆ. ಕಾಲುವೆಗಳ ಮುಖಾಂತರ ಕೆರೆಗಳನ್ನು ಭರ್ತಿ ಮಾಡಿದರೆ, ನೀರಿಲ್ಲದೆ ಬತ್ತಿದ್ದ ಕೊಳವೆ ಬಾವಿ, ತೆರೆದ ಬಾವಿಗಳ ಅಂತರ್ಜಲ ವೃದ್ಧಿಯಾಗಲಿದೆ. ಇದರಿಂದ ಕುಡಿಯುವ ನೀರಿನ ಸಮಸ್ಯೆಯೂ ನಿವಾರಣೆ ಆಗಲಿದೆ.

ಮಹಾರಾಷ್ಟ್ರದ ಉಜನಿ ಜಲಾಶಯದಿಂದ ಬಿಟ್ಟಿರುವ 61,600 ಕ್ಯೂಸೆಕ್​ ನೀರು ಮಂಗಳವಾರ ಸಂಜೆವರೆಗೆ ಸೊನ್ನ ಬ್ಯಾರೇಜ್​ ತಲುಪಲಿದೆ. ಕೆಳಭಾಗಕ್ಕೆ 3000 ಕ್ಯೂಸೆಕ್​ ನೀರು ಬಿಡಲಾಗುತ್ತಿದೆ. ಸೊನ್ನ ಬ್ಯಾರೇಜ್​ ಭರ್ತಿ ಮಾಡಿಕೊಂಡ ಬಳಿಕ ಕಾಲುವೆಗಳ ಮೂಲಕ ಕೆರೆಗಳಿಗೆ ನೀರು ಬಿಡಲಾಗುವುದು ಎಂದು ಭೀಮಾ ಏತ ನೀರಾವರಿ ಎಇಇ ಸಂತೋಷ ಸಜ್ಜನ್​ ತಿಳಿಸಿದ್ದಾರೆ.

"

ಮಳೆ ಕೊರತೆಯಿಂದಾಗಿ ಜನ-ಜಾನುವಾರುಗಳಿಗೆ ನೀರಿನ ತೊಂದರೆಯಾಗಿತ್ತು. ಮಹಾರಾಷ್ಟ್ರದಿಂದ ನೀರು ಬಂದಿದ್ದರಿಂದ ನೀರಿನ ಅಭಾವ ಕಡಿಮೆಯಾಗಲಿದೆ. ನೀರಿನ ಹರಿವು ವೇಗವಾಗಿದ್ದು, ಜನರು ನದಿ ತೀರಕ್ಕೆ ಹೋಗಬಾರದು. ಬ್ರಿಡ್ಜ್​ ಹಾಗೂ ಧಾರ್ಮಿಕ ಕ್ಷೇತ್ರಗಳಾದ ಗಾಣಗಾಪುರ ಮತ್ತು ಘತ್ತರಗಾ ಹತ್ತಿರ ಸಿಬ್ಬಂದಿ ನಿಯೋಜಿಸಲು ಅಧಿಕಾರಿಗಳಿಗೆ ಸೂಚಿಸಲಾಗಿದೆ.

— > ಅರುಣಕುಮಾರ ಎಂ.ವೈ.ಪಾಟೀಲ್​ ಅಧ್ಯಕ್ಷ, ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮ