ಯುವತಿಗೆ ಗೊತ್ತಿಲ್ಲದೆ ರಿಜಿಸ್ಟರ್ಡ್ ಮ್ಯಾರೇಜ್

ಬೆಂಗಳೂರು: ಜನರಿಗೆ ಅನುಕೂಲ ಆಗಲೆಂದು ನೋಂದಣಿ ಮತ್ತು ಮುದ್ರಾಂಕ ಇಲಾಖೆ ಜಾರಿಗೆ ತಂದಿರುವ ಆನ್‌ಲೈನ್‌ನಲ್ಲಿ ವಿವಾಹ ನೋಂದಣಿ ಸೌಲಭ್ಯ ದುರುಪಯೋಗ ಆಗಿರುವುದು ಬೆಳಕಿಗೆ ಬಂದಿದೆ.

ಖಾಸಗಿ ಕಂಪನಿಯ 34 ವರ್ಷದ ಯುವಕ, ತನ್ನ 24 ವರ್ಷದ ಉದ್ಯೋಗಿಯನ್ನು ಮದುವೆ ಆಗಿರುವುದಾಗಿ ದೇವನಹಳ್ಳಿ ಸಬ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ ವಿವಾಹ ಪ್ರಮಾಣ ಪತ್ರ ಪಡೆದಿದ್ದಾನೆ.

ಈ ವಿವಾಹ ಪ್ರಮಾಣಪತ್ರವನ್ನು ಗಮನಿಸಿದ ಯುವತಿ, ಪೊಲೀಸ್ ಠಾಣೆ ಹಾಗೂ ಕೋರ್ಟ್‌ಗೆ ದೂರು ಸಲ್ಲಿಸಿದ್ದು, ಆರೋಪಿತ ಯುವಕ ವಂಚನೆ ಮಾಡಿರುವುದು ಬೆಳಕಿಗೆ ಬಂದಿದೆ. ಕೊನೆಗೆ ಬೆಂಗಳೂರು ಗ್ರಾಮಾಂತರ ಜಿಲ್ಲಾ ನ್ಯಾಯಾಲಯ ವಾದ-ಪ್ರತಿವಾದ ಆಲಿಸಿ ದೇವನಹಳ್ಳಿ ಸಬ್ ರಿಜಿಸ್ಟ್ರಾರ್ ಕಚೇರಿಯಿಂದ ನೀಡಲಾದ ವಿವಾಹ ಪ್ರಮಾಣ ಪತ್ರವನ್ನು ಅನೂರ್ಜಿತಗೊಳಿಸಿ ಆದೇಶ ಹೊರಡಿಸಿದೆ. ಇದರಿಂದ ಆನ್‌ಲೈನ್‌ನಲ್ಲಿ ನೋಂದಣಿ ಆಗುತ್ತಿರುವ ಮದುವೆ ರಿಜಿಸ್ಟ್ರೇಷನ್‌ಗಳ ಮೇಲೆ ಸಾರ್ವಜನಿಕ ವಲಯದಲ್ಲಿ ಅನುಮಾನಗಳು ದಟ್ಟವಾಗಿ ಕಾಡುತ್ತಿವೆ.

ನೊಂದ ಯುವತಿ ಮತ್ತು ಯುವಕ ಸಹೋದ್ಯೋಗಿಗಳಾಗಿದ್ದು, ಆಪ್ತರಾಗಿದ್ದರು. ಇದರ ನಡುವೆ ಯುವತಿ ಬಳಿ ಆರೋಪಿತ ಮದುವೆಯ ಪ್ರಸ್ತಾಪವನ್ನು ಇಟ್ಟಿದ್ದನು. ಆಕೆ, ಆರಂಭದಲ್ಲಿ ನಿರಾಕರಿಸಿ ಬಳಿಕ ತನ್ನ ಪಾಲಕರು ಒಪ್ಪಿದರೇ ಮಾತ್ರ ಮದುವೆ ಆಗುವುದಾಗಿ ಹೇಳಿದ್ದಳು. ಆದರೆ, ಯುವತಿಯ ಪಾಲಕರು ಪ್ರೇಮ ವಿವಾಹಕ್ಕೆ ನಿರಾಕರಿಸಿದರು. ಆದರಿಂದ ಯುವತಿ, ತನ್ನ ಪಾಲಕರು ಮದುವೆಗೆ ಒಪ್ಪಿಗೆ ಸೂಚಿಸಿದ ಕಾರಣ ಆತನೊಂದಿಗೆ ವಿವಾಹವನ್ನು ನಿರಾಕರಿಸಿ ಸ್ನೇಹವನ್ನು ಕಡಿತ ಮಾಡಿಕೊಂಡಿದ್ದಳು.

ಕುಪಿತಗೊಂಡ ಯುವಕ, ಈ ಹಿಂದೆ ಯುವತಿ ಜತೆಗೆ ತೆಗೆಸಿಕೊಂಡಿದ್ದ ಛಾಯಾಚಿತ್ರಗಳನ್ನು ದುರುಪಯೋಗಪಡಿಸಿಕೊಂಡರು ನೋಂದಣಿ ಮತ್ತು ಮುದ್ರಾಂಕ ಇಲಾಖೆಯ ಕಾವೇರಿ 2.0 ತಂತ್ರಾಂಶದಲ್ಲಿ ಆನ್‌ಲೈನ್‌ನಲ್ಲಿ ವಿವಾಹ ನೋಂದಣಿಗೆ ಅರ್ಜಿ ಸಲ್ಲಿಸಿದ್ದ. ಸಬ್ ರಿಜಿಸ್ಟ್ರಾರ್ ಸಹ ಮದುವೆ ಪ್ರಮಾಣಪತ್ರವನ್ನು ವಿತರಿಸಿದ್ದರು.

ಈ ವಿಚಾರ ಯುವತಿಗೆ ಗೊತ್ತಾಗಿ 2024ರ ಡಿಸೆಂಬರ್ 18ರಲ್ಲಿ ಯಾವುದೇ ವಿವಾಹ ಸಮಾರಂಭ ನಡೆದಿಲ್ಲ. ದೇವನಹಳ್ಳಿ ಸಬ್-ರಿಜಿಸ್ಟ್ರಾರ್ ನೀಡಿದ ವಿವಾಹ ಪ್ರಮಾಣಪತ್ರವನ್ನು ರದ್ದುಗೊಳಿಸುವಂತೆ ಪೊಲೀಸ್ ಠಾಣೆಗೆ ದೂರು ಸಲ್ಲಿಸಿದ್ದಳು. ಅರ್ಜಿದಾರರು ವಿವಾಹ ಪ್ರಮಾಣಪತ್ರದ ಪ್ರಮಾಣೀಕೃತ ಪ್ರತಿ ಮತ್ತು ತನ್ನ ಛಾಯಾಚಿತ್ರಗಳ ದುರುಪಯೋಗ ಮತ್ತು ಮಾನಸಿಕ ಕಿರುಕುಳ ನೀಡಲಾಗುತ್ತಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಿದ್ದಳು. ಈ ಬಗ್ಗೆ ಪೊಲೀಸರಿಂದ ಸ್ವೀಕೃತಿ ಪತ್ರವನ್ನು ಪಡೆದು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಳು. ಈ ಬಗ್ಗೆ ಆರೋಪಿತನಿಗೆ ಕೋರ್ಟ್ ನೋಟಿಸ್ ಜಾರಿ ಮಾಡಿದರೂ ಯಾವುದೇ ಸೂಕ್ತ ಸಾಕ್ಷಾೃಧಾರಗಳನ್ನು ಒದಗಿಸದ ಹಿನ್ನೆಲೆಯಲ್ಲಿ ವಿವಾಹ ಪ್ರಮಾಣ ಪತ್ರವನ್ನು ಅನೂರ್ಜಿತ ಎಂದು ನ್ಯಾಯಾಲಯ ೋಷಣೆ ಮಾಡಿದೆ.

ಆನ್‌ಲೈನ್‌ನಲ್ಲಿ ವಿವಾಹ ನೋಂದಣಿ ಮಾಡಿಕೊಳ್ಳುವಾಗ ಯುವತಿಗೆ ಅಥವಾ ಯುವಕನಿಗೆ ಗೊತ್ತಿಲ್ಲದೆ ಅರ್ಜಿ ಸಲ್ಲಿಸಲು ಅವಕಾಶವಿದೆ. ಇಲ್ಲಿ ಆಧಾರ್ ಒಟಿಪಿ ಅಗತ್ಯವಿದ್ದರೂ ಮರೆಮಾಚಿ ಒಟಿಪಿ ಪಡೆದು ಅರ್ಜಿ ಸಲ್ಲಿಸಿ ಅಮಾಯಕರ ಅರಿವಿಗೆ ಬಾರದಂತೆ ಪ್ರಮಾಣ ಪತ್ರ ಪಡೆಯುತ್ತಿದ್ದಾರೆ.

ದೇವನಹಳ್ಳಿ ಸಬ್ ರಿಜಿಸ್ಟ್ರಾರ್ ಕಚೇರಿಯಲ್ಲಿ 2024ರಲ್ಲಿ ನಡೆದಿರುವ ವಿವಾಹ ನೋಂದಣಿ ಇದಕ್ಕೆ ತಾಜಾ ಉದಾಹರಣೆಯಾಗಿದೆ. ಆದರಿಂದ ಆನ್‌ಲೈನ್‌ನಲ್ಲಿ ವಿವಾಹ ನೋಂದಣಿಗೆ ಅರ್ಜಿ ಸಲ್ಲಿಸಿದ ಮೇಲೆ ಸಬ್‌ರಿಜಿಸ್ಟ್ರಾರ್ ಮುಂದೆ ಹಾಜರಾಗಿ ಸಹಿ ಮಾಡಿದರೇ ಹೆಚ್ಚು ಸುರಕ್ಷಿತ ಎಂಬುದು ಉಪ ನೋಂದಣಾಧಿಕಾರಿಗಳ ಅಭಿಪ್ರಾಯವಾಗಿದೆ.