ಶಿಕ್ಷಕರ ಆನ್​ಲೈನ್​ ಹೊರೆ ಕಡಿಮೆ ಮಾಡಿ

ಕಲಬುರಗಿ: ಶಿಕ್ಷಕರ ಮೇಲಿನ ಆನ್​ಲೈನ್​ ಹೊರೆ ಕಡಿಮೆ ಮಾಡಬೇಕು ಎಂದು ವಿಧಾನ ಪರಿಷತ್​ ಸದಸ್ಯ ಶಶೀಲ್​ ನಮೋಶಿ ಆಗ್ರಹಿಸಿದ್ದಾರೆ.

ಈ ಕುರಿತು ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದಿರುವ ಅವರು, ಕೃತಕ ಬುದ್ದಿಮತ್ತೆಯ ಡಿಜಿಟಲ್​ ಯುಗದಲ್ಲಿ ಬದುಕುತ್ತಿದ್ದೇವೆ. ಪ್ರತಿಯೊಂದು ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆ ಮೂಲಕ ಡಿಜಿಟಲ್​ ಕಾರ್ಯ ಆರಂಭವಾಗಿವೆ. ಶೈಕ್ಷಣಿಕ ಕ್ಷೇತ್ರದಲ್ಲಿಯೂ ಡಿಜಿಟಲ್​ ತಂತ್ರಜ್ಞಾನದ ಬಳಕೆ ಹೆಚ್ಚುತ್ತಿರುವುದು ಸ್ವಾಗತಾರ್ಹ. ಆದರೆ ಇದರಿಂದ ಶಿಕ್ಷರು ಅನೇಕ ತೊಂದರೆ ಅನುಭವಿಸುತ್ತಿದ್ದಾರೆ. ಡಿಜಟಲಿಕರಣದ ಸಂಪೂರ್ಣ ಜವಾಬ್ದಾರಿ ಶಿಕ್ಷಕರ ಹೆಗಲಿಗಿದ್ದು, ಇದು ಶಿಕ್ಷಣ ಹಾಗೂ ಶಿಕ್ಷಕರ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ ಎಂದು ಗಮನ ಸೆಳೆದಿದ್ದಾರೆ.

ಈಗ ಸರ್ಕಾರಿ ಶಾಲಾ ಶಿಕ್ಷಕರು ಪಾಠ ಪ್ರವಚನದ ಜತೆ ಕಾಮ್ಸ್​, ಸ್ಯಾಟ್ಸ, ಯುಡೈಸ್​, ಪಿಎಫ್​ಎಂಎಸ್​, ಆಧಾರ್​ ಅಪಾರ್​ ಐಡಿ, ಶಿಕ್ಷಾ ಕೋ ಪೈಲಟ್​, ಸೇತುಬಂಧ ಪರೀಕ್ಷಗಳ ದಾಖಲೆ, ಬಿಸಿಯೂಟದ ಮಾಹಿತಿ, ಪಠ್ಯಪುಸ್ತಕ , ಸಮವಸ್ತ್ರ ವಿತರಣೆ, ಬಿಎಲ್​ಓ ಹೀಗೆ ಹತ್ತಾರು ಆನ್​ಲೈನ್​ ಕಾರ್ಯ ನಿರಂತರ ಮಾಡಬೇಕಾಗಿದೆ. ಜತೆಗೆ ಇಲಾಖೆ ದಿನಕ್ಕೊಂದು ಮಾಹಿತಿ ಕೇಳುತ್ತಿದೆ. ಈ ವರದಿಗಳನ್ನು ಸ್ಟ್ರೆಡ್​ ಸೀಟ್​ ಹಾಗೂ ಮೊಬೈಲ್​ ಅಪ್ಲೀಕೇಷನ್​ಗಳಲ್ಲಿ ದಾಖಲಿಸುವ ಜವಾಬ್ದಾರಿ ಶಿಕ್ಷಕರ ಮೇಲಿದೆ. ಇದು ಶಿಕ್ಷಕರ ಮೇಲೆ ನಿರಂತರ ಒತ್ತಡ ಹೇರುತ್ತಿದೆ.

ಬಹುತೇಕ ಶಾಲೆಗಳಲ್ಲಿ ಕಂಪ್ಯೂಟರ್​ ಹಾಗೂ ಶಾಶ್ವತ ಇಂಟರ್​ನೆಟ್​ ಸೌಲಭ್ಯ ಕೊರತೆಯಿಂದಾಗಿ ಶಿಕ್ಷಕರು ತಮ್ಮ ಸ್ವಂತ ಮೊಬೈಲ್​, ಡೇಟಾ ಮತ್ತು ಇಂಟರ್​ನೆಟ್​ ಬಳಕೆ ಮಾಡಿಕೊಂಡೇ ಅಧಿಕೃತ ಕೆಲಸ ನಿರ್ವಹಿಸುತ್ತಿದ್ದಾರೆ. ಇದರಿಂದ ಅಧಿಕ ಖರ್ಚು ಹೊರೆ ಹೊತ್ತಿರುವ ಶಿಕ್ಷಕರ ಜತೆಗೆ ಕಣ್ಣಿನ ತೊಂದರೆ, ಕತ್ತು ಮತ್ತು ಬೆನ್ನುನೋವು, ತಲೆನೋವು, ಮಾನಸಿಕ ಒತ್ತಡದಂತಹ ಆರೋಗ್ಯ ಸಮಸ್ಯೆ ಹೆಚ್ಚುತ್ತಿವೆ, ಕಾಮ್ಸ ಸಲುವಾಗಿ ಕೆಲವು ಕಡೆ ಅಪಘಾತಗಳು ಆಗಿರುವ ವರದಿಗಳಾಗಿವೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

ಶಿಕ್ಷಕರ ಸಮಯ, ಶಕ್ತಿಯನ್ನು ಡಾಟಾ ನಮೂದಿಸಲು ಬಳಕೆ ಮಾಡುವುದರ ಬದಲಾಗಿ ವಿದ್ಯಾರ್ಥಿಗಳ ಭವಿಷ್ಯ ಬೆಳೆಸಲು ಉಪಯೋಗಿಸಬೇಕಾಗಿದೆ. ಇಂದು ಶಿಕ್ಷಕ ಹುದ್ದೆಯ ಜತೆಗೆ ಗುಮಾಸ್ತರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಸರ್ಕಾರ ಶಿಕ್ಷಕರ ಸಮಸ್ಯೆ ಗಂಭೀರವಾಗಿ ಪರಿಗಣಿಸಿ ಇತ್ಯರ್ಥಕ್ಕೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದ್ದಾರೆ.