ಮರಳಕುಂಟೆಯಲ್ಲಿ ಅಪರೂಪದ ಟೆರಾಂಟುಲಾ ಜೇಡ ಪತ್ತೆ-spider

ಜೀವವೈವಿಧ್ಯ ಸಂಶೋಧಕ ಮಂಜುನಾಥ ಎಸ್. ನಾಯಕ, ವನ್ಯಜೀವಿ ಛಾಯಾಗ್ರಾಹಕ ಸುನೀಲ್ ಕುಮಾರ್, ಅವರ ಪುತ್ರ ಕುಲದೀಪ್ ಮತ್ತು ಅಳಿಯ ಪೂಜಿತ್ ಸರಿಸೃಪಗಳ ಹುಡುಕಾಟ (ಹರ್ಪಿಂಗ್) ಮಾಡುತ್ತಿದ್ದಾಗ ದೈತ್ಯ ಜೇಡ ಪತ್ತೆಯಾಗಿದೆ. ನಿಯೋಹೆಟೆರೋಫ್ರಿಕ್ಟಸ್ ಸಂತತಿಗೆ ಸೇರಿದ ಇವು ಸಮಾನ್ಯವಾಗಿ ಕರ್ನಾಟಕ, ಕೇರಳ ಮತ್ತು ಮಹಾರಾಷ್ಟ್ರ ವ್ಯಾಪ್ತಿಯ ಪಶ್ಚಿಮಘಟ್ಟ ಪ್ರದೇಶಗಳಲ್ಲಿ ಕಂಡುಬರುತ್ತವೆ. ಈ ಸಂತತಿಯಲ್ಲಿ 8 ಪ್ರಜಾತಿಗಳಿದ್ದು, ಎಲ್ಲ ಜೇಡಗಳು ಭಾರತದಲ್ಲಿ ಕಂಡುಬರುತ್ತವೆ.

ಟೆರಾಂಟುಲಾ ಹೆಣ್ಣು ಜೇಡಗಳಲ್ಲಿ ಬಹುಭಾಗ ಹೊಂದಿದ ಸ್ಪರ್ಮಥೇಕಾ ಮತ್ತು ಗಂಡು ಜೇಡಗಳಲ್ಲಿ ಡಬಲ್ ಟಿಬಿಯಲ್ ಸ್ಪರ್ ಇರಲಿದೆ. ಸಾಮಾನ್ಯವಾಗಿ ಎಲೆ, ಕಲ್ಲುಗಳ ಕೆಳಗೆ ಅಥವಾ ಬಿದಿರಿನ ಕಾಡುಗಳಲ್ಲಿ ತಾತ್ಕಾಲಿಕ ಬಿಲ ತೋಡಿ ವಾಸಿಸುತ್ತವೆ. ಚಿಕ್ಕ ಕೀಟಗಳು ಸೇರಿ ಇತರ ಸಂಧಿಪದಿಗಳನ್ನು ಬೇಟೆಯಾಡಿ ಬಕ್ಷಿಸುತ್ತವೆ. ಕಾಲುಗಳ ತುದಿಯಲ್ಲಿ ಬಿಳಿ ತುಪ್ಪಳ ಇರುವ ಕಾರಣ ಇವುಗಳನ್ನು ವೈಟ್ ಸಾಕ್ಸ್ ಟೆರಾಂಟುಲಾ ಎಂದು ಕರೆಯಲಾಗುತ್ತದೆ. ಉತ್ತಮವಾಗಿ ಬಿಲ ತೊಡುವ ಸಾಮರ್ಥ್ಯವಿರುವ ಇವು, ಶಕ್ತಿಶಾಲಿಯಾಗಿ ಬೇಟೆಯಾಡುತ್ತವೆ. ಕಪ್ಪು, ಹಸಿರು, ಬೂದು ಮತ್ತು ಕಂದು ಬಣ್ಣದಲ್ಲಿ ಕಾಣಿಸಿಕೊಳ್ಳುತ್ತವೆ. ಕೆಲವೊಂದು ಪ್ರಜಾತಿಗಳಲ್ಲಿ (ನಿಯೋಹೆಟೆರೋಫ್ರಿಕ್ಟಸ್ ಸೈಯಾದ್ರಿ ) ಕಾಲುಗಳ ಮೇಲೆ ಬಿಳಿ ಗುರುತು ಇರುತ್ತದೆ.

ಮಾನವರಿಗೆ ಹಾನಿಕರವಲ್ಲ: ಟೆರಾಂಟುಲಾ ಜೇಡಗಳು ವಿಷಕಾರಿಯಾಗಿದ್ದು, ತಮ್ಮ ಎದುರಾಳಿಯ ಬೇಟೆಯನ್ನು ನಿಷ್ಕ್ರಿಯಗೊಳಿಸಲು ಅದನ್ನು ಬಳಸುತ್ತವೆ. ಮಾನವರಿಗೆ ಈ ವಿಷ ಹಾನಿಕಾರಕವಲ್ಲ. ಈ ಜೇಡಗಳು ಕಚ್ಚಿದರೆ ಜೇನುನೊಣ ಕಚ್ಚಿದಂತೆ ಸ್ವಲ್ಪ ನೋವು, ಊತ, ಕೆರೆತ ಉಂಟಾಗುತ್ತದೆ. ಕೆಲವು ಜಾತಿಯ ಟೆರಾಂಟುಲಾಗಳಲ್ಲಿ ಚರ್ಮಕ್ಕೆ ಕೆರೆತ ಉಂಟು ಮಾಡುವ ಕೂದಲುಗಳು ಇರಲಿವೆ.

ಸಂತತಿ ಕ್ಷೀಣ: ಆವಾಸ ಸ್ಥಾನ ನಾಶ, ಅರಣ್ಯ ನಾಶ, ಭೂಕುಸಿತ ಮತ್ತು ಪ್ರವಾಹ ಸೇರಿ ಇತರ ಕಾರಣಗಳಿಂದ ಈ ಜೇಡಗಳ ಸಂತತಿ ಕ್ಷೀಣಿಸುತ್ತಿದೆ. ಈ ಜಾತಿಯ ಜೇಡಗಳನ್ನು ಯುರೋಪ್ ಸೇರಿ ವಿಶ್ವದ ಇತರ ದೇಶಗಳಿಗೆ ಅಕ್ರಮವಾಗಿ ಸಾಗಿಸಲಾಗುತ್ತದೆ. ಇವುಗಳ ಸಂರಕ್ಷಣೆಗಾಗಿ ವಾಸಸ್ಥಾನ ರಕ್ಷಣೆ, ಕೃತಕ ಸಂವರ್ಧನೆ ಮತ್ತು ಜಾಗೃತಿಯಂತಹ ಕಾರ್ಯಕ್ರಮ ಅಗತ್ಯ ಎನ್ನುತ್ತಾರೆ ತಜ್ಞರು.

ಟೆರಾಂಟುಲಾ ಸಿಲೀಂದೆಗಳು ಪರಿಸರ ಸಮತೋಲನದಲ್ಲಿ ಪ್ರಮುಖ ಪಾತ್ರವಹಿಸುತ್ತವೆ. ಭಕ್ಷಕಗಳಾಗಿ ಕಾರ್ಯನಿರ್ವಹಿಸಿ, ಅಕಶೇರುಕ ಜೀವಿಗಳ ಸಂಖ್ಯೆಯನ್ನು ನಿಯಂತ್ರಿಸಿ ಇತರ ಪ್ರಾಣಿಗಳಿಗೆ ಆಹಾರವಾಗುತ್ತವೆ. ಇವುಗಳು ಸಹಜ ಪರಿಸರ, ಕೃಷಿ ವ್ಯವಸ್ಥೆಗಳಲ್ಲಿ ನೈಸರ್ಗಿಕ ಕೀಟ ನಿಯಂತ್ರಕರಾಗಿ ಕೆಲಸ ಮಾಡಲಿದ್ದು, ಬೀಟಲ್‌ಗಳು ಸೇರಿ ಇತರ ಕೀಟಗಳ ಸಂಖ್ಯೆ ನಿಯಂತ್ರಿಸುತ್ತವೆ.