ಗುಂಡಾಗಿರಿ ಪ್ರಶ್ನಿಸಿದರೆ ಜೈಲು ಗ್ಯಾರಂಟಿ

ಶಹಾಬಾದ್​: ಗೃಹ ಸಚಿವರ ತವರು ಜಿಲ್ಲೆಯಲ್ಲಿ ಗುಂಡಾಗಿರಿ ಮೀತಿಮಿರುತ್ತಿದ್ದು, ಈ ಬಗ್ಗೆ ಪ್ರಶ್ನಿಸಿದರೆ ಕೇಸ್​ ದಾಖಲಿಸಿ, ಜೈಲಿಗೆ ಹಾಕುವ ಕೆಲಸ ನಡೆಯುತ್ತಿದೆ ಎಂದು ಶಿವಸೇನೆ (ಏಕನಾಥ್​ ಶಿಂಧೆ ಬಣ) ರಾಜ್ಯಾಧ್ಯಕ್ಷರಾದ ಆಂದೋಲಾದ ಶ್ರೀ ಸಿದ್ಧಲಿಂಗ ಸ್ವಾಮೀಜಿ ಆರೋಪಿಸಿದರು.

ಶ್ರೀ ಜಗದಂಬಾ ದೇವಿ ದೇವಸ್ಥಾನ ಸಭಾಂಗಣದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ಶಿವಸೇನಾ (ಏಕನಾಥ ಶಿಂಧೆ ಬಣ) ತಾಲೂಕು ಕಚೇರಿ ಉದ್ಘಾಟನೆ ಹಾಗೂ ಪದಾಧಿಕಾರಿಗಳ ಪದಗ್ರಹಣ ಸಮಾರಂಭದಲ್ಲಿ ಮಾತನಾಡಿ, ಸಿಮೆಂಟ್​ ಉತ್ಪಾದನೆಗೆ ಖ್ಯಾತಿ ಪಡೆದಿದ್ದ ಶಹಾಬಾದ್​ನಲ್ಲಿಂದು ಉದ್ಯೋಗಕ್ಕಾಗಿ ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ. ಹಲವು ಕಾರ್ಖಾನೆಗಳು ಮುಚ್ಚಿದ್ದರಿಂದ ಜನ ಬೀದಿಪಾಲಾಗಿದ್ದಾರೆ. ಕನಿಷ್ಠ ಮೂಲಸೌಕರ್ಯಗಳಿಲ್ಲದೆ ಜನರು ಸಮಸ್ಯೆ ಅನುಭವಿಸುತ್ತಿದ್ದಾರೆ. ಈ ಬಗ್ಗೆ ಪ್ರಶ್ನಿಸಬೇಕಿರುವ ಬಿಜೆಪಿ ಮೌನವಾಗಿದೆ ಎಂದು ಕಿಡಿಕಾರಿದರು.

ಶಿವಸೇನಾ ನೋಂದವರ ಧ್ವನಿಯಾಗಿ ಕೆಲಸ ಮಾಡಲಿದ್ದು, ಮುಂಬರುವ ನಗರಸಭೆ, ಗ್ರಾಪಂ, ತಾಪಂ, ಜಿಪಂ ಚುನಾವಣೆಯಲ್ಲಿ ಸ್ಪರ್ಧಿಸುವುದಕ್ಕಾಗಿ ಸಿದ್ಧತೆ ನಡೆಸಲಾಗುತ್ತಿದೆ. ಬಾಳಾಸಾಹೇಬ್​ ಠಾಕ್ರೆ, ಏಕನಾಥ ಶಿಂಧೆ ಅವರಂತೆ ರಾಜ್ಯದಲ್ಲಿ ಪಕ್ಷವನ್ನು ಬಲಿಷ್ಠವಾಗಿ ಕಟ್ಟಲು ಜನರ ಸಹಕಾರ ಅಗತ್ಯವಾಗಿದೆ. ಕೈ, ಕಮಲದ ನಡುವೆ ಸೇನೆಯನ್ನು ಬಲಪಡಿಸುವ ಮೂಲಕ ಭ್ರಷ್ಟಾಚಾರ ರಹಿತ ಆಡಳಿತ ಒದಗಿಸುವ ಸಂಕಲ್ಪ ನಮ್ಮದಾಗಿದೆ ಎಂದರು.

ಜಿಲ್ಲಾಧ್ಯಕ್ಷ ಗುರುಶಾಂತ ಟೆಂಗಳಿ ಮಾತನಾಡಿ, ರಾಜ್ಯದ 27 ಜಿಲ್ಲೆಗಳಲ್ಲಿ ಪಕ್ಷ ಸಂಘಟನೆ ನಡೆಯುತ್ತಿದ್ದು, ಹಿಂದುತ್ವದ ಹೆಸರಲ್ಲಿ ಅಧಿಕಾರಕ್ಕೆ ಬಂದವರ ಬಂಡವಾಳ ಬಯಲಾಗಿದೆ. ಹಿಂದುತ್ವವಾದಿ ಠಾಕ್ರೆ ಅವರು ಹಾಕಿಕೊಟ್ಟ ದಾರಿಯಲ್ಲಿ ಪಕ್ಷ ಕಟ್ಟಲಾಗುತ್ತಿದೆ ಎಂದು ಹೇಳಿದರು.

ರಾಚೋಟೇಶ್ವರ ಸಂಸ್ಥಾನದ ಶ್ರೀ ಶಂಕ್ರಯ್ಯ ಸ್ವಾಮೀಜಿ ಸಾನ್ನಿಧ್ಯವಹಿಸಿದ್ದರು. ಸಿದ್ದು ಹಿರೇಮಠ ಮಾತನಾಡಿದರು. ಪ್ರಮುಖರಾದ ಅಂಬರೀಷ ಪುಲಸೆ, ರವಿ ಭಂಡಾರಿ, ಸುಭಾಶ್ಚಂದ್ರ ಕರದಳ್ಳಿಕರ್​, ಮಾರುತಿ ಪುಲಸೆ, ಕಿರಣ ಜಿಡಗಿಕರ್​, ಡಾ.ವಿಜಯಕುಮಾರ, ಅಶೋಕ ಇತರರಿದ್ದರು.

ತಾಲೂಕು ಅಧ್ಯಕ್ಷ ದಶರಥ ದೇಸಾಯಿ, ಮಹಿಳಾ ಟಕದ ತಾಲೂಕು ಅಧ್ಯಕ್ಷೆ ಉಷಾ ಭಗತ, ಸುರೇಶ ಮಾನ್ವಿಕರ್​ ಸೇರಿ ಹಲವರು ಪದಾಧಿಕಾರಿಗಳು ಪಕ್ಷದ ಧ್ವಜ ನೀಡಿ ಪದಗ್ರಹಣ ಮಾಡಲಾಯಿತು. ಬಸವೇಶ್ವರ ವೃತ್ತದಿಂದ ಶಾಸಿ ವೃತ್ತದವರೆಗೆ ಶ್ರೀ ಸಿದ್ಧಲಿಂಗ ಸ್ವಾಮಿಗಳ ಅದ್ದೂರಿ ಬೈಕ್​ ರ್ಯಾಲಿ ನಡೆಸಲಾಯಿತು.

"