ಇಟಗಿ: ಸೇವಾ ಮನೋಭಾವ ಹಾಗೂ ನಾಯಕತ್ವ ಗುಣಗಳೊಂದಿಗೆ ಸರ್ವತೋಮುಖ ವ್ಯಕ್ತಿತ್ವ ವಿಕಸನಕ್ಕೆ ವೇದಿಕೆ ಕಲ್ಪಿಸುವಲ್ಲಿ ಎನ್ಎಸ್ಎಸ್ ಸಹಕಾರಿಯಾಗಿದೆ ಎಂದು ಪ್ರೊ.ಈಶ್ವರ ಕರಮಳ್ಳನವರ ಹೇಳಿದರು. ಗ್ರಾಮದ ಜನತಾ ಶಿಣ ಪ್ರಸಾರ ಸಮಿತಿಯ ಬಿ.ಎಂ.ಸಾಣಿಕೊಪ್ಪ ಪದವಿ ಕಾಲೇಜಿನಲ್ಲಿ ಈಚೆಗೆ ಹಮ್ಮಿಕೊಂಡಿದ್ದ ಎನ್ಎಸ್ಎಸ್ ವಾರ್ಷಿಕ ವಿಶೇಷ ಶಿಬಿರದ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದರು. ಪ್ರಾಚಾರ್ಯ ಆರ್.ಬಿ.ಹುಣಶೀಕಟ್ಟಿ ಮಾತನಾಡಿ, ವಿದ್ಯಾರ್ಥಿಗಳು ಎನ್ಎಸ್ಎಸ್ನಂತಹ ಕ್ರಿಯಾತ್ಮಕ ಚಟುವಟಿಕೆಗಳಲ್ಲಿ ಸಕ್ರಿಯ ಭಾಗವಹಿಸುವ ಮೂಲಕ ದೇಶದ ಪ್ರಗತಿ ಮತ್ತು ಸುಸ್ಥಿರ ಅಭಿವೃದ್ಧಿ ಪ್ರವರ್ತಕರಾಗಬೇಕು ಎಂದರು. ಕಲ್ಮೇಶ ಮೆಳವಂಕಿಗೆ ಅತ್ಯುತ್ತಮ ಎನ್ಎಸ್ಎಸ್ ಸ್ವಯಂ ಸೇವಕ ಪ್ರಶಸ್ತಿ ಹಾಗೂ ಎಲ್ಲ ಶಿಬಿರಾರ್ಥಿಗಳಿಗೆ ಪ್ರಶಂಸನಾ ಪತ್ರ ವಿತರಿಸಲಾಯಿತು. ಎನ್ಎಸ್ಎಸ್ ಶಿಬಿರಾಧಿಕಾರಿ ಬಸವರಾಜ ಸವದಿ, ಸಹಶಿಬಿರಾಧಿಕಾರಿ ಶಿವಾನಂದ ಸುಣಗಾರ, ಪ್ರಾಧ್ಯಾಪಕರಾದ ಎಂ.ಆರ್.ಶಹಾಪುರ, ಗಣೇಶ ದುರ್ಗಣ್ಣವರ, ಲಲಿತಾ ಗೌಡ, ಬಿ.ಕೆ.ನಾವಲಗಟ್ಟಿ, ಶ್ರೀಧರ ಹಿರೇಮಠ ಇತರರಿದ್ದರು. ತೇಜಸ್ವಿನಿ ಹಂಚಿನಮನಿ ಸ್ವಾಗತಿಸಿದರು. ಸುಧಾರಾಣಿ ಶೆಟ್ಟೆನ್ನವರ ನಿರೂಪಿಸಿದರು.
