ಭೂಸ್ವಾಧೀನಕ್ಕೆ ಮುನ್ನ ಜನರ ಅಭಿಪ್ರಾಯ ಮುಖ್ಯ:ಬಿಕೆಎಸ್ ರಾಷ್ಟ್ರೀಯ ಅಧ್ಯಕ್ಷ ಸಾಯಿರೆಡ್ಡಿ ಹೇಳಿಕೆ-land acquisition

ಬಿಕೆಎಸ್ ರಾಷ್ಟ್ರೀಯ ಅಧ್ಯಕ್ಷ ಸಾಯಿರೆಡ್ಡಿ ಮಾತನಾಡಿ, ಭೂಸ್ವಾಧೀನಕ್ಕೂ ಮುನ್ನ ಸಾರ್ವಜನಿಕರ ಅಭಿಪ್ರಾಯ, ಗ್ರಾಮಸಭೆ ಹಾಗೂ ಸಮ್ಮತಿ ಪ್ರಕ್ರಿಯೆ ಪಡೆಯುವುದು ಮುಖ್ಯ. ಭೂಮಿ ಕಳೆದುಕೊಂಡ ರೈತರು, ಕಾರ್ಮಿಕರು ಸೇರಿ ಇತರೆ ಬಾಧಿತ ಕುಟುಂಬಗಳ ಪುನರ್ವಸತಿ ಮತ್ತು ಪುನರ್ ನಿರ್ಮಾಣದ ಹಕ್ಕುಗಳನ್ನು ಮಂಡಿಸಬಹುದು ಎಂದರು.

ಬಿಎಇಆರ್‌ಸಿ ಅಧ್ಯಕ್ಷ ಪ್ರಮೋದ್ ಚೌಧರಿ ಮಾತನಾಡಿ, ಕೃಷಿ ಭೂಮಿ ಸ್ವಾಧೀನದ ಹೆಸರಿನಲ್ಲಿ ಸಾವಿರಾರು ರೈತರು, ಕೃಷಿ ಕಾರ್ಮಿಕರು, ಗ್ರಾಮೀಣ ಕುಟುಂಬಗಳು ತಮ್ಮ ಜೀವನೋಪಾಯ, ಜೀವನಾಧಾರ ಮತ್ತು ಸಾಮಾಜಿಕ ಭದ್ರತೆ ಕಳೆದುಕೊಳ್ಳುತ್ತಿರುವ ಸಂದರ್ಭದಲ್ಲಿ ಭೂಸ್ವಾಧೀನ ಕಾನೂನುಗಳ ಕುರಿತು ಸಮಗ್ರ ಅರಿವು ಮೂಡಿಸಲು ಕೆಲಸ ಮಾಡುತ್ತಿದ್ದೇವೆ. ರೈತರು ಮತ್ತು ಭೂಸ್ವಾಧೀನದಿಂದ ಬಾಧಿತರಾದ ಕುಟುಂಬಗಳಿಗೆ ದೊರೆಯುವ ಹಕ್ಕುಗಳ ಕುರಿತು ಸಮಗ್ರ ಚರ್ಚೆ ನಡೆಸಿದ್ದೇವೆ ಎಂದರು.

ಸರ್ಕಾರ, ಭೂಸ್ವಾಧೀನ ಪ್ರಾಧಿಕಾರಗಳ ಕಾನೂನುಬದ್ಧ ಜವಾಬ್ದಾರಿ, ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ ರೈತರು ಗಮನಿಸಬೇಕಾದ ಕಾನೂನು ಅಂಶಗಳು ಮತ್ತು ನ್ಯಾಯಾಲಯಗಳ ಮಹತ್ವದ ತೀರ್ಪುಗಳ ಕುರಿತು ವಕೀಲ ವಿಷ್ಣು ಹೆಗಡೆ ವಿಚಾರ ಮಂಡಿಸಿದರು. ಭೀಮಸೇನ ಕೋಕರೆ, ಪುಟ್ಟಸ್ವಾಮಿ ಗೌಡ, ಪ್ರಾಂತ ಅಧ್ಯಕ್ಷ ಹಾಡ್ಯ ರಮೇಶ್ ರಾಜು ಮತ್ತಿತರರಿದ್ದರು.