ಎಂಎಸ್​ಎಂಇ ನೂತನ ನೀತಿ ಜಾರಿ ಶೀಘ್ರ

ಕಲಬುರಗಿ: ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆ (ಎಂಎಸ್​ಎಂಇ) ಹೊಸ ನೀತಿ ಶ್ರೀ ಜಾರಿಗೊಳಿಸುವ ಮೂಲಕ ರಾಜ್ಯದಲ್ಲಿ ಕೈಗಾರಿಕಾ ಬೆಳವಣಿಗೆಗೆ ಪೂರಕ ವಾತಾವರಣ ನಿರ್ಮಿಸಲಾಗುತ್ತದೆ ಎಂದು ಸಣ್ಣ ಕೈಗಾರಿಕೆ ಸಚಿವ ಶರಣಬಸಪ್ಪ ದರ್ಶನಾಪುರ ಹೇಳಿದರು.

ನಗರದ ಕಲ್ಯಾಣ ಕರ್ನಾಟಕ ವಾಣಿಜ್ಯೋದ್ಯಮ ಸಂಸ್ಥೆ(ಕೆಕೆಸಿಸಿಐ) ಸಭಾಂಗಣದಲ್ಲಿ ಸಣ್ಣ ಕೈಗಾರಿಕೆ ಇಲಾಖೆ ಬುಧವಾರ ಆಯೋಜಿಸಿದ್ದ ಕಲಬುರಗಿ ವಿಭಾಗ ಮಟ್ಟದ ಪಾಲುದಾರರ ಸಮಾಲೋಚನಾ ಕಾರ್ಯಾಗಾರ ಉದ್ಘಾಟಿಸಿ ಮಾತನಾಡಿದ ಅವರು, ಸಣ್ಣ, ಸೂಕ್ಷ್ಮ ಮತ್ತು ಮಧ್ಯಮ ಉದ್ಯಮಗಳು ರಾಜ್ಯದಲ್ಲಿ ಕೈಗಾರಿಕೆ ಬೆಳವಣಿಗೆ ಜತೆ ಉದ್ಯೋಗ ಸೃಷ್ಟಿಯಲ್ಲಿ ಬಹುದೊಡ್ಡ ಪಾತ್ರ ವಹಿಸುತ್ತಿವೆ. ಸಣ್ಣ ಕೈಗಾರಿಕೆ ಅಭಿವೃದ್ಧಿ ಹೊಂದಿ ಜಾಗತಿಕ ಮಟ್ಟದಲ್ಲಿ ಸ್ಪರ್ಧಿಸುವಂತೆ ಬಲಿಷ್ಠ ಪರಿಸರ ವ್ಯವಸ್ಥೆ ರೂಪಿಸಲು ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಿದರು.

ಎಂಎಸ್​ಎಂಇ ನೀತಿ ಮೂಲಕ ಉತ್ಪಾದನಾ ಕ್ಷೇತ್ರಕ್ಕೆ ಶಕ್ತಿ ತುಂಬಿ ಕೈಗಾರಿಕೆ ಬಲಪಡಿಸುವುದು ಮತ್ತು ರಾಜ್ಯವನ್ನು ಜಾಗತಿಕ ಮಟ್ಟದಲ್ಲಿ ಉತ್ಪಾದನಾ ಕೇಂದ್ರವನ್ನಾಗಿ ಹೊರತರುವುದು ನಮ್ಮ ಗುರಿಯಾಗಿದೆ ಎಂದರು.

ಹೊಸ ನೀತಿ ಮೂಲಕ ಎಂಎಸ್​ಎಂಇ ಪರಿಸರ ಇನ್ನಷ್ಟು ಬಲಪಡಿಸುವ ಉದ್ದೇಶದಿಂದ ಪ್ರೋತ್ಸಾಹಧನ, ಸೌಲಭ್ಯ ಒಳಗೊಂಡ ಸಮಗ್ರ ಚಟುವಟಿಕೆ ರೂಪುರೇಷೆಯನ್ನು ಸರ್ಕಾರ ಪರಿಚಯಿಸಲಿದೆ. ಈ ನೀತಿಯು ಹಣಕಾಸಿನ ಅನುಕೂಲ, ನಿಯಂತ್ರಣ ಪ್ರಕ್ರಿಯೆ ಮತ್ತು ಸಣ್ಣ ಉದ್ಯಮಗಳಿಗೆ ಅಗತ್ಯ ಮೂಲಸೌಲಭ್ಯ ಬಲವರ್ಧನೆಗೆ ಆದ್ಯತೆ ನೀಡಲಿದೆ ಎಂದು ಹೇಳಿದರು.

ಕರ್ನಾಟಕವನ್ನು ಎಂಎಸ್​ಎಂಇಗಳಿಗೆ ಅತ್ಯಂತ ಬೆಂಬಲಕಾರಿ ಪರಿಸರ ಹೊಂದಿರುವ ಭಾರತದ ಪ್ರಮುಖ ರಾಜ್ಯಗಳಲ್ಲಿ ಒಂದಾಗಿ ರೂಪಿಸುವುದು ನಮ್ಮ ದೃಢ ಸಂಕಲ್ಪ. ಕಾರ್ಯಾಗಾರದಲ್ಲಿ ನೂತನ ನೀತಿಗೆ ಪೂರಕವಾಗಿ ಸೂಕ್ತ ಸಲಹೆ ನೀಡಬೇಕು ಎಂದು ಕೋರಿದರು.

ಜಿಲ್ಲಾಧಿಕಾರಿ ಬಿ.ಫೌಜಿಯಾ ತರನ್ನುಮ್​ ಮಾತನಾಡಿ, ಕಲಬುರಗಿ 3ನೇ ಹಂತದ ಕೈಗಾರಿಕೆ ಪ್ರದೇಶದಲ್ಲಿ ಸುಮಾರು 595 ಎಕರೆ ಜಮೀನು ಹಂಚಿಕೆಗೆ ಸಿದ್ಧವಾಗಿದೆ. ಹೊಸ ನೀತಿ ಜಾರಿಗೆ ಮುನ್ನ ರಾಜ್ಯದ ನಾಲ್ಕು ವಿಭಾಗಗಳಲ್ಲಿ ಉದ್ಯಮಿಗಳ ಸಲಹೆ ಪಡೆಯಲಾಗುತ್ತಿದೆ. ಹೀಗಾಗಿ ಈ ಕಾರ್ಯಾಗಾರವನ್ನು ಗಂಭೀರ ಪರಿಗಣಿಸಿ ಸೂಕ್ತ, ಅಳವಡಿಕೆಗೆ ಪೂರಕವಾದ ಅಂಶವುಳ್ಳ ಸಲಹೆ ನೀಡಬೇಕು ಎಂದರು.

ಕೈಗಾರಿಕೆ ಇಲಾಖೆ ಹಿರಿಯ ಅಧಿಕಾರಿ ಮುದ್ದುಕುಮಾರ್​, ಕೆಕೆಸಿಸಿಐ ಮಾಜಿ ಅಧ್ಯಕ್ಷ ಶಶಿಕಾಂತ ಪಾಟೀಲ್​, ಕೆಕೆಸಿಸಿಐ ಕೈಗಾರಿಕೆ ಮತ್ತು ಎಂಎಸ್​ಎಂಇ ಅಧ್ಯಕ್ಷ ಅಭಿಜಿತ್​ ಪಡಶೆಟ್ಟಿ, ರಾಯಚೂರು ಚೇಂಬರ್​ ಕಾರ್ಯದರ್ಶಿ ಜಂಬಣ್ಣ ಯಕಲಾಸ್ಪುರ್​, ಯಾದಗಿರಿ ಚೇಂಬರ್​ ಉಪಾಧ್ಯಕ್ಷ ವಿಷ್ಣು ವ್ಯಾಸ್​, ಕೆಕೆಸಿಸಿಐ ಖಜಾಂಚಿ ಸಿಎ ಉತ್ತಮ ಬಜಾಜ್​ ಇತರರಿದ್ದರು.

ಕೈಗಾರಿಕೆ ಇಲಾಖೆ ಹೆಚ್ಚುವರಿ ನಿರ್ದೇಶಕ ಮಾಣಿಕ್​ ರೂಜಿ ಸ್ವಾಗತಿಸಿ ಪ್ರಾಸ್ತಾವಿಕ ಮಾತನಾಡಿದರು. ಜಿಲ್ಲಾ ಕೈಗಾರಿಕೆ ಕೇಂದ್ರದ ಜಂಟಿ ನಿರ್ದೇಶಕ ಅಬ್ದುಲ್​ ಅಜೀಂ ವಂದಿಸಿದರು. ನಂತರ ಫೈನಾನ್ಸ್​, ಟೆಕ್ನಾಲಜಿ, ಡಿಜಿಟಲೈಜೇಷನ್​, ಮಾರ್ಕೆಟ್​, ಮೂಲಸೌಲಭ್ಯ, ಸ್ಕಿಲ್ಲಿಂಗ್​, ಇನೊವೇಷನ್​, ಗ್ರೀನ್​ ಟೆಕ್ನಾಲಜಿ ಇತರ ವಿವಿಧ ವಿಷಯದ ತಾಂತ್ರಿಕ ಗೋಷ್ಠಿಗಳು ನಡೆದವು. ಕೆಕೆಸಿಸಿಐ ಕಾರ್ಯದರ್ಶಿ ಶಿವರಾಜ ಇಂಗಿನಶೆಟ್ಟಿ ಸಂಸ್ಥೆ ಮನವಿಪತ್ರವನ್ನು ಸಚಿವ ದರ್ಶನಾಪುರಗೆ ಸಲ್ಲಿಸಿದರು.