ಶ್ರದ್ಧಾಭಕ್ತಿಯಿಂದ ನಾಗರ ಪಂಚಮಿ ಆಚರಣೆ

ಬೆಂಗಳೂರು:

ಶ್ರಾವಣ ಮಾಸದ ಶುಕ್ಲ ಪಕ್ಷದ ಪಂಚಮಿ ದಿನವಾದ ಸೋಮವಾರ ನಗರದಾದ್ಯಂತ ಜನರು ನಾಗರಪಂಚಮಿಯನ್ನು ಶ್ರದ್ಧಾ- ಭಕ್ತಿಯಿಂದ ಆಚರಿಸಿದರು.

ನಾಗರಪಂಚಮಿಯು ಸಾಲುಸಾಲು ಹಬ್ಬಗಳಿಗೆ ನಾಂದಿಯೂ ಹೌದು. ಇದರ ನಂತರ ರಕ್ಷಾಬಂಧನ, ವರಮಹಾಲಕ್ಷ್ಮೀ ಹಬ್ಬ, ಶ್ರೀಕೃಷ್ಣ ಜನ್ಮಾಷ್ಟಮಿ, ಗೌರಿ- ಗಣೇಶ ಹಬ್ಬ ಇತ್ಯಾದಿ ಸಂಭ್ರಮ ಮುಂದುವರಿಯುತ್ತದೆ.

ನಾಗರಪಂಚಮಿ ಪ್ರಯುಕ್ತ ಮುಂಜಾನೆಯಿಂದಲೇ ಮನೆ ಸಮೀಪದ ಅಶ್ವತ್ಥಕಟ್ಟೆಯ ನಾಗರಕಲ್ಲು ಹಾಗೂ ಹುತ್ತದ ಬಳಿ ತೆರಳಿ ಅರಿಶಿನ ಕುಂಕುಮ ಹಾಗೂ ಹೂಗಳಿಂದ ಅಲಂಕರಿಸಿ, ತಂಬಿಟ್ಟು, ಹಣ್ಣು-ಕಾಯಿ ಅರ್ಪಿಸಿ ನೈವೇದ್ಯ ಮಾಡಿದ ಭಕ್ತರು ಹಾಲಿನಿಂದ ತನಿ ಎರೆಯುವ ಮೂಲಕ ಪೂಜೆ ನೆರವೇರಿಸಿದರು.

ನಾಗರಪಂಚಮಿ ಹೆಣ್ಣುಮಕ್ಕಳಿಗೆ ಸಂಭ್ರಮದ ಹಬ್ಬ. ಇದು ಅಣ್ಣ- ತಂಗಿ ಸೇರಿ ಪೂಜೆ ಮಾಡುವ ಹಬ್ಬವೂ ಹೌದು. ಹಾಗಾಗಿ ಹೆಣ್ಣುಮಕ್ಕಳು ಸಹೋದರರ ಒಳಿಗಾಗಿ ಪ್ರಾರ್ಥಿಸಿ ಹುತ್ತಕ್ಕೆ ತನಿ ಎರೆಯುತ್ತಾರೆ. ಈ ಬಾರಿಯ ಪಂಚಮಿ ದಿನ ಸೋಮವಾರ ಬಂದಿದ್ದು, ಇದು ಶಿವನ ವಾರವೂ ಆಗಿರುವುದರಿಂದ ಶಿವದೇವಾಲಯಗಳಲ್ಲಿ ವಿಶೇಷ ಅಲಂಕಾರದೊಂದಿಗೆ ಪೂಜೆ ಮಾಡಲಾಯಿತು.

ದೊಡ್ಡ ಆಲದ ಮರದ ಬಳಿಯ ಮುಕ್ತಿನಾಗ ದೇವಾಲಯ, ಚಾಮರಾಜಪೇಟೆಯ ರಾಮೇಶ್ವರ ದೇವಾಲಯದ ನಾಗಬನದಲ್ಲಿ ಭಕ್ತರು ನಾಗರಕಲ್ಲಿಗೆ ಹಾಲಿನ ಅಭಿಷೇಕ ಮಾಡಿದರು. ಓಕಳಿಪುರ ಸಮೀಪದ ಅಮ್ಮ ನಾಗಮ್ಮ ದೇವಾಲಯ, ವಿಜಯನಗರದಲ್ಲಿನ ಸುಬ್ರಹ್ಮಣ್ಯ ಸ್ವಾಮಿ ದೇವಾಲಯಗಳಲ್ಲಿ ಪೂಜೆ ಸಲ್ಲಿಸಲಾಯಿತು.

ಉತ್ತರ ಕರ್ನಾಟಕದಲ್ಲಿ ನಾಗರಪಂಚಮಿ ಸಂಭ್ರಮ ಮೂರು ದಿನಗಳ ಕಾಲ ಆಚರಿಸಲಾಗುತ್ತದೆ. ಮೊದಲ ದಿನ ರೊಟ್ಟಿ ಪಂಚಮಿ, ಎರಡನೇ ದಿನ ನಾಗರ ಚೌತಿ, ಮೂರನೇ ದಿನ ನಾಗರ ಪಂಚಮಿ ಎಂದು ಆಚರಿಸಲಾಗುತ್ತದೆ. ಹಾಗಾಗಿ ನಗರದಲ್ಲಿ ಉತ್ತರ ಕರ್ನಾಟಕದ ಮಂದಿ ನೆಲೆಸಿರುವ ಬಡಾವಣೆಗಳಲ್ಲಿ ನಾಗಪಂಚಮಿ ಅತ್ಯಂತ ವಿಜೃಂಭಣೆಯಿಂದ ಆಚರಣೆಗೊಳ್ಳುತ್ತಿರುವುದು ವಿಶೇಷವಾಗಿತ್ತು.