ಸಂಪನ್ಮೂಲ, ತಂತ್ರಜ್ಞಾನ ಸದ್ಬಳಕೆ ಮಾಡಿಕೊಳ್ಳಿ

ಬಸವಕಲ್ಯಾಣ: ಜವಾಹರ್​ ನವೋದಯ ವಿದ್ಯಾಲಯಗಳು ಸಂಪನ್ಮೂಲಗಳಿಂದ ಮತ್ತು ತಂತ್ರಜ್ಞಾನದಿಂದ ಸಂಪತ್​ ಭರಿತವಾಗಿದ್ದು, ಇದನ್ನು ಸದ್ಬಳಕೆ ಮಾಡಿಕೊಂಡು ವಿದ್ಯಾಭ್ಯಾಸ ಉತ್ತಮ ಪಡಿಸುವ ಜತೆಗೆ ರಾಷ್ಟ್ರ ಕಟ್ಟುವ ಕಾರ್ಯಕ್ಕೆ ಮುಂದಾಗಬೇಕು ಎಂದು ತಹಸೀಲ್ದಾರ್​ ಡಾ.ದತ್ತಾತ್ರೇಯ ಗಾದಾ ಸಲಹೆ ನೀಡಿದರು.

ನಗರದ ಜವಾಹರ್​ ನವೋದಯ ವಿದ್ಯಾಲಯದಲ್ಲಿ ಬುಧವಾರ ಆಯೋಜಿಸಿದ್ದ ನವೋದಯ ಸಂಸ್ಥಾಪನಾ ಸಮಾರಂಭ ಉದ್ಘಾಟಿಸಿದ ಮಾತನಾಡಿದ ಅವರು, ತಂತ್ರಜ್ಞಾನವು ಯುವ ಪೀಳಿಗೆಯನ್ನು ಆಕರ್ಷಿಸುತ್ತದೆ. ಆದರೆ ವಿದ್ಯಾರ್ಥಿಗಳು ತಮ್ಮ ಕಲಿಕೆಗೆ ಮತ್ತು ರಾಷ್ಟ್ರ ಹಿತಕ್ಕೆ ಯಾವುದು ಅಗತ್ಯವೋ ಅದನ್ನೇ ಮಾಡಬೇಕು.ಹಾಗಾದರೆ ಮಾತ್ರ ವಿದ್ಯಾರ್ಥಿಯ ಜೀವನ ಉತ್ತಮವಾಗುತ್ತದೆ ಎಂದರು.

ನಾನು ಸಹ ನವೋದಯ ವಿದ್ಯಾಲಯದಲ್ಲಿ ವಿದ್ಯಾಭ್ಯಾಸ ಮಾಡಿ ಕಠಿಣ ಪರಿಶ್ರಮಪಟ್ಟು ಮೇಲೆ ಬಂದವನು. ತಾವುಗಳು ಸಹ ತಮ್ಮ ಜೀವನದಲ್ಲಿ ಇಷ್ಟಪಟ್ಟು ಓದುವುದನ್ನು ರೂಢಿಸಿಕೊಳ್ಳಬೇಕು. ಶಿಸ್ತಿನ ಜೀವನ ತಮ್ಮದಾಗಿಸಿಕೊಳ್ಳಬೇಕು. ಅಂದಿನ ಪಾಠಗಳನ್ನು ಅಂದೇ ಅಭ್ಯಾಸ ಮಾಡಿ ನೋಟ್ಸ್​ ತಯಾರಿಸಿಕೊಳ್ಳಬೇಕು. ಆಗ ನಿಮಗೆಲ್ಲ ಪರೀಕ್ಷೆ ಒಂದು ಉತ್ಸವ ಆಗುತ್ತದೆ ಎಂದು ಹೇಳಿದರು.

ಕ್ಷೇತ್ರ ಶಿಕ್ಷಣಾಧಿಕಾರಿ ಸಿದ್ದವಿರಯ್ಯ ರುದ್ನೂರ ಮಾತನಾಡಿ, ನವೋದಯ ವಿದ್ಯಾಲಯದ ವಿದ್ಯಾರ್ಥಿಗಳು ಸಾಮಾನ್ಯ ವಿದ್ಯಾರ್ಥಿಗಳಲ್ಲ. ಜಿಲ್ಲಾ ಮಟ್ಟದಲ್ಲಿ ಆಯ್ಕೆಯಾಗಿ ಬಂದವರು. ಇಲ್ಲಿ ಶಿಕ್ಷಕರು ಕೂಡ ರಾಷ್ಟ್ರ ಮಟ್ಟದಲ್ಲಿ ಆಯ್ಕೆಯಾಗಿ ಬರುತ್ತಾರೆ. ಹಾಗಾಗಿ ವಿದ್ಯಾರ್ಥಿಗಳು ಇಲ್ಲಿನ ಸಂಪನ್ಮೂಲ ಸದ್ಬಳಕೆ ಮಾಡಿಕೊಂಡು ತಾನು ಬೆಳೆದಿರುವ ಸಮಾಜಕ್ಕೆ ಏನಾದರೂ ಕೊಡಬೇಕೆಂಬ ಸಂಕಲ್ಪ ಮಾಡಬೇಕು ಎಂದರು.

ವಿದ್ಯಾಲಯದ ಪ್ರಾಚಾರ್ಯ ವಿ.ನಾಗರಾಜನ್​ ಅಧ್ಯಕ್ಷತೆ ವಹಿಸಿದ್ದರು. ಹಳೆಯ ವಿದ್ಯಾರ್ಥಿಗಳಾದ ಡಾ. ಜ್ಞಾನೇಶ್ವರ ಪಾಟೀಲ್​, ಡಾ.ಶ್ರೀನಿವಾಸ, ಡಾ.ಪ್ರಶಾಂತ ಹೊಸಮನಿ, ಡಾ.ಮಂಜುನಾಥ ಮಂಗಲಗೆ, ವಿದ್ಯಾಲಯದ ಶಿಕ್ಷಕರಾದ ಸತೀಶಕುಮಾರ ಸ್ವಾಮಿ, ಮದನ ಲಾಮತುರೆ, ಲಕ್ಷ್ಮೀಕಾಂತ ದುದ್ದಣಿಗಿ, ಕಿರಣ ಪತ್ತಾರ್​, ಚೇತನ ಜಂಬಗಿ, ಸಂಜು ರಾಠೋಡ್​, ಅಲ್ಕಾ ಇದ್ದರು. ಧರ್ಮಣ್ಣ ಚಿಟ್ಟಾ ಸ್ವಾಗತಿಸಿದರು. ಕೆ.ರಾಜೇಶ ವಂದಿಸಿದರು. ಶ್ರೀಶೈಲಪ್ಪ ನಿರೂಪಣೆ ಮಾಡಿದರು.