ರಾಜ್ಯ ರಾಜಕಾರಣದಲ್ಲಿ ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರು ಅತ್ಯಂತ ಸಕ್ರಿಯರಾಗಿರುವ ಕುರಿತು ಲೇವಡಿ ಮಾಡಿದ ಅಥಣಿ ಶಾಸಕ ಲಕ್ಷ್ಮಣ ಸವದಿ, ಈ ಹಿಂದೆ ಜೆಡಿಎಸ್-ಬಿಜೆಪಿ ಮೈತ್ರಿ ಆಗದಿದ್ದಾಗ, ಬಿಜೆಪಿಯಲ್ಲಿ ವಿಪಕ್ಷ ನಾಯಕ ಹಾಗೂ ರಾಜ್ಯಾಧ್ಯಕ್ಷರ ಆಯ್ಕೆ ವಿಳಂಬವಾಗಿದ್ದಕ್ಕೆ ಜೆ.ಟಿ. ದೇವೇಗೌಡರು ಸದನದಲ್ಲಿ ನನ್ನನ್ನು ಕೆಣಕಿದ್ದರು. ಆಗ ನಾನು, ಸ್ವಲ್ಪ ದಿನಗಳಲ್ಲಿ ಕುಮಾರಸ್ವಾಮಿ ಅವರನ್ನೇ ಡೆಪ್ಯುಟೇಷನ್ (ನಿಯೋಜನೆ) ಮೇಲೆ ಬಿಜೆಪಿಗೆ ಕಳಿಸಿಕೊಡ್ತಾರೆ, ಆಮೇಲೆ ಎಲ್ಲವೂ ಸರಿ ಹೋಗುತ್ತೆ ಎಂದು ಹೇಳಿದ್ದೆ. ನಾನು ಅಂದು ಹೇಳಿದ ಮಾತು ಈಗ ಅವರಿಗೆ ಮನವರಿಕೆಯಾಗಿರಬಹುದು ಎಂದು ಕಾಲೆಳೆದರು. ಇದೇ ವೇಳೆ ಸಚಿವ ಸಂಪುಟ ವಿಸ್ತರಣೆ ವಿಳಂಬದ ಬಗ್ಗೆ ಮಾತನಾಡಿದ ಅವರು, ಗೆದ್ದಿರುವ ಎಲ್ಲಾ ಶಾಸಕರೂ ಮಂತ್ರಿ ಸ್ಥಾನದ ಆಕಾಂಕ್ಷಿಗಳೇ ಆಗಿರುತ್ತಾರೆ, ಈ ಬಗ್ಗೆ ಹೈಕಮಾಂಡ್, ಮುಖ್ಯಮಂತ್ರಿಗಳು ಹಾಗೂ ರಾಜ್ಯ ಉಸ್ತುವಾರಿಗಳು ಚರ್ಚಿಸುತ್ತಿದ್ದು, ಇದೇ ಜುಲೈ 10 ರಿಂದ 15ರ ಒಳಗಾಗಿ ಒಂದು ಸೂಕ್ತ ತೀರ್ಮಾನ ಹೊರಬೀಳಲಿದೆ ಎಂದು ತಿಳಿಸಿದರಲ್ಲದೆ, ಸದ್ಯಕ್ಕೆ ತಾವೇನೂ ದೆಹಲಿಗೆ ಹೋಗುವ ಆಲೋಚನೆ ಮಾಡಿಲ್ಲ ಎಂದು ಸ್ಪಷ್ಟಪಡಿಸಿದರು.
