ಖಮೇನಿ ಬೆಂಬಲಿಸುವವರು ಕೂಡಲೇ ಬಂಧಿಸಿ

ಅಫಜಲಪುರ: ಮಧ್ಯ ಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದಲ್ಲಿ ಇರಾನ್​ ಅಧ್ಯಕ್ಷ ಖಮೇನಿ ಹತ್ಯೆಯಾಗಿದ್ದಕ್ಕೆ ಕರ್ನಾಟಕದಲ್ಲಿ ಕೆಲವರು ಸಾರ್ವಜನಿಕವಾಗಿ ಕಂಬನಿ ಮಿಡಿದಿದ್ದು, ಖಮೇನಿ ಬೆಂಬಲಿಸುವವರನ್ನು ಕೂಡಲೇ ಜೈಲಿಗೆ ಹಾಕಬೇಕು ಎಂದು ಶಿವಸೇನಾ ಪಕ್ಷದ ರಾಜ್ಯಾಧ್ಯಕ್ಷ ಹಾಗೂ ಆಂದೋಲಾದ ಶ್ರೀ ಸಿದ್ಧಲಿಂಗ ಸ್ವಾಮೀಜಿ ಆಗ್ರಹಿಸಿದರು.

ಶ್ರೀ ಸಿದ್ಧೇಶ್ವರ ಸ್ವಾಮೀಜಿ ಪ್ರವಚನ ಮೈದಾನದಲ್ಲಿ ಹಿಂದೂ ಸಮ್ಮೇಳನ ಆಯೋಜನ ಸಮಿತಿಯಿಂದ ಭಾನುವಾರ ಆಯೋಜಿಸಿದ್ದ ವಿರಾಟ ಹಿಂದೂ ಸಮಾವೇಶ ಉದ್ಘಾಟಿಸಿ ಮಾತನಾಡಿ, ಜಗತ್ತಿಗೆ ಸಂಸ್ಕಾರ, ಧರ್ಮದ ಹಾದಿಯನ್ನು ತಿಳಿಸಿದ ಸನಾತನ ಧರ್ಮವನ್ನು ಯಾರಿಂದಲೂ ನಾಶ ಮಾಡಲು ಸಾಧ್ಯವಿಲ್ಲ. ಎದುರಾಗಿ ಬರುವವರು ಬೂದಿಯಾಗುತ್ತಾರೆ. ಪ್ರತಿ ಗ್ರಾಮಗಳಲ್ಲಿ ಹಿಂದುಗಳು ಒಂದಾಗುತ್ತಿರುವುದು ನೋಡಿ ವಿರೋಧಿಗಳಿಗೆ ನಿದ್ದೆ ಹತ್ತುತ್ತಿಲ್ಲ ಎಂದರು.

ಮುಸ್ಲಿಮರಿಂದಲೇ ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಆಗಿದ್ದಾರೆಂದು ಖಮೇನಿಯನ್ನು ಬೆಂಬಲಿಸಿದವರನ್ನು ಬಂಧಿಸುತ್ತಿಲ್ಲ. ಇದು ರಾಜ್ಯದ ದುರ್ದೈವಾಗಿದೆ. ಹಿಂದೂ ಸಮ್ಮೇಳನವೆಂದರೆ ಉರಿದುಕೊಳ್ಳುವವರು, ಇಫ್ತಿಯಾರ್​ ಕೂಟ ಅಂದಾಗ ಮಾತ್ರ ಸಂತೋಷ ಪಡುತ್ತಾರೆ. ಕಲಬುರಗಿ ಕೆಲ ನಾಯಕರು ಚುನಾವಣೆ ಬಂದಾಗ ಮಾತ್ರ ನಾಮಪತ್ರದಲ್ಲಿ ಹಿಂದೂ ಎಂದು ಬರೆಯುತ್ತಾರೆ. ಹಿಂದೂ ಎಂದು ಬರೆದಿರುವ ಕಾರಣಕ್ಕೆ ಪಂಚಾಯತ್​ರಾಜ್​ ಮತ್ತು ಐಟಿಬಿಟಿ ಇಲಾಖೆ ಸಚಿವರಾಗಲು ಕಾರಣವಾಗಿದೆ ಎಂದು ಟೀಕಿಸಿದರು.

ಶ್ರೀ ಕೈಲಾಸಲಿಂಗ ಶಿವಾಚಾರ್ಯ, ಶ್ರೀ ವಿಶ್ವಾರಾಧ್ಯ ಮಳೇಂದ್ರ ಶಿವಾಚಾರ್ಯ, ಶ್ರೀ ಗಂಗಾಧರ ಸ್ವಾಮೀಜಿ, ಶ್ರೀ ಮರುಳಾರಾಧ್ಯ ಶಿವಾಚಾರ್ಯರು ಸಾನ್ನಿಧ್ಯ ವಹಿಸಿದ್ದರು.

ಹಿಂದೂ ಸಮ್ಮೇಳನ ಆಯೋಜನಾ ಸಮಿತಿ ಅಧ್ಯ ಮಳೇಂದ್ರ ಡಾಂಗೆ, ಪ್ರಮುಖರಾದ ಸಂತೋಷ ದಾಮಾ, ಮಲ್ಲಿಕಾರ್ಜುನ ನಿಂಗದಳ್ಳಿ, ರಮೇಶ ನೀಲಗಾರ, ಗಂಗಾಧರ ಶ್ರೀಗಿರಿ, ಪ್ರಭಾವತಿ ಮೇತ್ರಿ, ಶರಣು ಶೆಟ್ಟಿ, ಶಂಕರ ಮ್ಯಾಕೇರಿ, ಅರ್ಚನಾ ಪುರೋಹಿತ, ಜ್ಯೋತಿ ಅಂಬೂರೆ, ಮುರುಂದ್ರ ಮಸಳಿ, ಮೌನೇಶ ಪತ್ತಾರ್​ ಇತರರಿದ್ದರು.

ಪ್ರಮುಖ ಬೀದಿಗಳಲ್ಲಿ ಭಾರತ ಮಾತೆ, ಶರಣರು, ಸಂತರು ಹಾಗೂ ಸ್ವಾತಂತ್ರ ಹೋರಾಟಗಾರರ ಭಾವಚಿತ್ರದ ಭವ್ಯ ಮೆರವಣಿಗೆ ನಡೆಯಿತು.

"