ವಿವೇಕ ಅರಿಯಲು ಕವಿರಾಜಮಾರ್ಗ ಸಹಕಾರಿ: ಎಂ.ಎಸ್. ಆಶಾದೇವಿ

ಜೈನ ಮಿಲನ್, ಬೆಂಗಳೂರು ಸೆಂಟ್ರಲ್ ಹಾಗೂ ಜಯನಗರದ ಶ್ರೀ ಚಕ್ರೇಶ್ವರಿ ಮಹಿಳಾ ಸಮಾಜದ ಸಭಾಂಗಣದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ‘ಜೈನ ಸಾಹಿತ್ಯ ಸಿರಿ’ ಕಾರ್ಯಕ್ರಮದ ತಿಂಗಳ ಉಪನ್ಯಾಸದಲ್ಲಿ ಅವರು ಮಾತನಾಡಿದರು.

ಮಾನವ ಕುಲ ವಿನಾಶದ ಹಂತಕ್ಕೆ ಹೋಗುತ್ತಿರುವ ಈ ಕಾಲಘಟ್ಟದಲ್ಲಿ ಶ್ರೀವಿಜಯನ ವಿವೇಕ ನಮಗೆ ಅಗತ್ಯವಾಗಿದೆ. ಯಾವುದೇ ಒಂದು ರಾಜ್ಯ ನಾಡಾಗಲು ಕವಿಗಳು ಮತ್ತು ರಾಜರು ಸೇರಬೇಕು ಕಲೆಗಳೂ ಇರಬೇಕು. ಶ್ರೀವಿಜಯ ತನ್ನ ಕಾಲದ ಜನ ಸಾಮಾನ್ಯರ ಅಭಿರುಚಿ ಬಗ್ಗೆ ಹೇಳುತ್ತಾ, ನನ್ನ ಕನ್ನಡ ನಾಡಿನ ಜನ ಓದಲು ಬರೆಯಲು ಬಾರದಿದ್ದರೂ ಒಂದು ಕಾವ್ಯವನ್ನು ಕೇಳಿ ಅದು ಉತ್ತಮವೋ, ಅಲ್ಲವೋ ಎಂದು ನಿರ್ಧರಿಸಬಲ್ಲ ವಿವೇಕಶಾಲಿಗಳು. ‘ಕುರಿತೋದದೆಯುಂ ಕಾವ್ಯ ಪ್ರಯೋಗ ಪರಿಣಿತರು‘ ಅಂತಹ ತಾಕತ್ತು ಕನ್ನಡ ಜನರಿಗೆ ಇತ್ತೆಂದು ತಿಳಿಸಿದ್ದಾನೆ ಎಂದು ವಿವರಿಸಿದರು.

ಶ್ರೀವಿಜಯನ ಕವಿರಾಜಮಾರ್ಗ ಯಾಕೆ ಮುಖ್ಯವಾಗುತ್ತದೆ ಎಂದರೆ ತನ್ನ ಕಾವ್ಯದಲ್ಲಿ ‘ವಸುಧಾ ವಲಯ ವಿಲೀನ ವಿಶದ ವಿಷಯ ವಿಶೇಷಂ’ ಎಂದಿರುವ ಮಾತಿನಲ್ಲಿ ಆ ಕಾಲದಲ್ಲಿಯೇ ಕನ್ನಡಿಗರಿಗೆ ನಾವು ಜಾಗತಿಕ ಹಾಗೂ ಸ್ಥಳೀಯ ಅಸ್ಮಿತೆಯನ್ನು ಉಳಿಸಿಕೊಳ್ಳುವ ಮಾತುಗಳನ್ನು ಶ್ರೀವಿಜಯ ಹೇಳಿದ್ದಾರೆ. ಇವರ ಕಾವ್ಯದ ಮಾತುಳು ಕುವೆಂಪು ಅವರ ವಿಶ್ವಮಾನವ ತತ್ವಕ್ಕೆ ಮೂಲ ಎಂಬುದನ್ನು ಗಮನಿಸಬೇಕು. 8ನೇ ಶತಮಾನದಲ್ಲಿ ಪಂಪನಿಗಿಂತ ಪೂರ್ವದಲ್ಲಿ ಜೈನ ಪರಂಪರೆಯ ಶ್ರೀವಿಜಯ ಕವಿ ಬರೆದ ಕವಿರಾಜಮಾರ್ಗ ಲಾಕ್ಷಣಿಕ ಗ್ರಂಥವಾಗಿದ್ದರೂ ಕನ್ನಡ ನಾಡಿನ ಬಗ್ಗೆ ಕನ್ನಡಿಗರ ಬಗ್ಗೆ ಹೆಮ್ಮೆಪಡಲು ಈ ಕಾವ್ಯವನ್ನು ಕನ್ನಡಿಗರು ಅರಿಯಬೇಕು ಎಂದು ಎಂ.ಎಸ್. ಆಶಾದೇವಿ ನುಡಿದರು.

ಶೋಭಾ ವಿಮುಕ್ತ ಜೈನ್ ಮಾತನಾಡಿ, ಶ್ರೀವಿಜಯನ ಕವಿರಾಜಮಾರ್ಗ ಕಾವ್ಯದ ಮೂಲಕ ಕನ್ನಡ ನಾಡಿನ ಹಾಗೂ ಕನ್ನಡಿಗರ ಬಗ್ಗೆ ತಿಳಿಯಲು ಸಾಧ್ಯವಾಗಿಸಿದ್ದು ಸಾಹಿತ್ಯ ಸಿರಿಯಂತಹ ಕಾರ್ಯಕ್ರಮ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ಕಾರ್ಯಕ್ರಮದಲ್ಲಿ ಸೆಂಟ್ರಲ್ ಜೈನ್ ಮಿಲನ್‌ನ ಅಧ್ಯಕ್ಷೆ ಮಮತಾ ಕಾಂತರಾಜ್, ಸಂಚಾಲಕರಾದ ಡಾ. ಪದ್ಮಿನಿ ನಾಗರಾಜು, ವಿಮಕ್ತ ಜೈನ್, ಬ್ರಾಹ್ಮಿಲ ಮದನಕುಮಾರ ಉಪಸ್ಥಿತರಿದ್ದರು.