ಸರ್ಕಾರಕ್ಕೆ ತಲೆನೋವಾದ ಸಂಪುಟ ವಿಸ್ತರಣೆ!...1990ರ ಬೆಂಗಳೂರಿನಲ್ಲಿನ 'ನಾಳೆ ಬಾ' ಬರಹ ಉಲ್ಲೇಖಿಸಿ ವಿಜಯೇಂದ್ರ ಕಿಡಿ | BY Vijayendra

ದೆಹಲಿಯ 10 ಜನಪಥ್ ಬಾಗಿಲಲ್ಲಿ ಇಂದು ಕಾಂಗ್ರೆಸ್ ನಾಯಕರಿಗೆ ನಾಳೆ ಬಾ ಎಂಬ ಸಂದೇಶ ಸಿಗುತ್ತಿದ್ದು, 2028ರ ಮುಂಬರುವ ಸಾರ್ವತ್ರಿಕ ವಿಧಾನಸಭಾ ಚುನಾವಣೆಯಲ್ಲಿ ಮತ ಕೇಳಲು ಜನರ ಬಳಿ ಹೋದಾಗ, ಖುದ್ದು ಕರ್ನಾಟಕದ ಜನತೆಯೇ ಕೈ ನಾಯಕರಿಗೆ ನಾಳೆ ಬಾ ಎಂದು ಹೇಳಿ ಕಳುಹಿಸಲಿದ್ದಾರೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ ವೈ ವಿಜಯೇಂದ್ರ ರಾಜ್ಯ ಸರ್ಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

ವಿಜಯೇಂದ್ರ ಪೋಸ್ಟ್​

ಒಂದೆಡೆ ಕರ್ನಾಟಕ ರಾಜ್ಯವು ರೈತರ ಸಂಕಷ್ಟ, ಬರಗಾಲದ ಆತಂಕ, ಹದಗೆಟ್ಟ ರಸ್ತೆಗಳು, ಮೂಲಸೌಕರ್ಯಗಳ ಸಂಪೂರ್ಣ ವೈಫಲ್ಯ ಹಾಗೂ ಸಾರ್ವಜನಿಕರ ಹೆಚ್ಚುತ್ತಿರುವ ದೂರು-ಸಮಸ್ಯೆಗಳನ್ನು ಎದುರಿಸುತ್ತಿದ್ದರೆ, ಇನ್ನೊಂದೆಡೆ ರಾಜ್ಯದ ಕಾಂಗ್ರೆಸ್ ಸರ್ಕಾರ ಮಾತ್ರ ತನ್ನ ಆಂತರಿಕ ಅಧಿಕಾರ ಕಸರತ್ತು ಹಾಗೂ ಕುರ್ಚಿ ಸಮರದಲ್ಲೇ ಮುಳುಗಿಹೋಗಿದೆ. ಕರ್ನಾಟಕದ ಜ್ವಲಂತ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವ ಬಗ್ಗೆ ಚರ್ಚಿಸುವ ಬದಲು, ಕಾಂಗ್ರೆಸ್ ನಾಯಕರು ಯಾರು ರಾಜೀನಾಮೆ ನೀಡಬೇಕು, ಯಾರು ಸಚಿವರಾಗಬೇಕು ಮತ್ತು ಅಧಿಕಾರವನ್ನು ಯಾರು ಉಳಿಸಿಕೊಳ್ಳಬೇಕು ಎಂಬುದರ ಕುರಿತಾಗಿಯೇ ನಿರಂತರವಾಗಿ ಚರ್ಚಿಸುತ್ತಿದ್ದಾರೆ.

ಇಂದು ದೆಹಲಿಯ 10 ಜನಪಥ್ ಬಾಗಿಲಿನಲ್ಲಿ ಕಾಂಗ್ರೆಸ್ ನಾಯಕರಿಗೆ ನಾಳೆ ಬಾ ಎಂದು ಹೇಳಲಾಗುತ್ತಿದೆ. ಆದರೆ, ಮುಂದಿನ ಚುನಾವಣೆಯಲ್ಲಿ ಮತ ಕೇಳಲು ಈ ನಾಯಕರು ಮತದಾರರ ಮನೆಗೆ ಹೋದಾಗ ಖುದ್ದು ರಾಜ್ಯದ ಜನತೆಯೇ ಅವರಿಗೆ ನಾಳೆ ಬಾ ಎಂದು ಹೇಳಿ ವಾಪಸ್ ಕಳುಹಿಸಲಿದ್ದಾರೆ ಎಂದು ವಿಜಯೇಂದ್ರ ಬರೆದುಕೊಂಡಿದ್ದಾರೆ.