ಅಂತಾರಾಷ್ಟ್ರೀಯ ವಸ್ತು ಸಂಗ್ರಹಾಲಯ ದಿನ

ಈ ಪ್ರದರ್ಶನದಲ್ಲಿ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ನಿವೃತ್ತ ಛಾಯಾ ಮತ್ತು ಚಲನಚಿತ್ರ ಅಧಿಕಾರಿ ಟಿ. ಕೆಂಪಣ್ಣ ಅವರು ಸೆರೆಹಿಡಿದಿರುವ ಕರ್ನಾಟಕದ ಪ್ರಾಚೀನ ಐತಿಹಾಸಿಕ ದೇವಾಲಯಗಳ ಛಾಯಾಚಿತ್ರಗಳು ಪ್ರದರ್ಶನಗೊಳ್ಳಲಿವೆ.

ಪ್ರದರ್ಶನದ ಜತೆಗೆ ಶಾಸನ ತಜ್ಞರಾದ ಡಾ. ಕೆ.ಆರ್. ಗಣೇಶ್ ಅವರಿಂದ ‘ಶಾಸನಗಳಲ್ಲಿ ಸಾಂಸ್ಕೃತಿಕ ಐಕ್ಯತೆ’ ಎಂಬ ವಿಷಯದ ಬಗ್ಗೆ ಉಪನ್ಯಾಸ ಕಾರ್ಯಕ್ರಮ ಏರ್ಪಡಿಸಲಾಗಿದ್ದು, ಬೆಂಗಳೂರು ವಿಶ್ವವಿದ್ಯಾಲಯದ ಕನ್ನಡ ಅಧ್ಯಯನ ಕೇಂದ್ರದ ಹಿರಿಯ ಪ್ರಾಧ್ಯಾಪಕ ಡಾ. ಮುನಿಯಪ್ಪ ಉದ್ಘಾಟಿಸಲಿದ್ದಾರೆ.

ಈ ಬಾರಿಯ ವಸ್ತು ಸಂಗ್ರಹಾಲಯದ ದಿನದ ವಿಶೇಷತೆ ಎಂದರೆ ಕನ್ನಡದ ಮೊದಲ ಉಪಲಬ್ಧ ಶಾಸನವಾದ ಹಲ್ಮಿಡಿ ಶಾಸನದ ಪ್ರದರ್ಶನ. 90 ವರ್ಷಗಳ ಹಿಂದೆ ಅಂದರೆ 1936ರಲ್ಲಿ ಪ್ರಸಿದ್ಧ ಪುರಾತತ್ವ ಶಾಸಜ್ಞರಾದ ಡಾ. ಎಂ.ಎಚ್. ಕೃಷ್ಣ ಅವರು ಹಾಸನ ಜಿಲ್ಲೆಯ ಬೇಲೂರು ತಾಲೂಕಿನ ಹಲ್ಮಿಡಿ ಗ್ರಾಮದಲ್ಲಿ ಮೊದಲಿಗೆ ಈ ಶಾಸನವನ್ನು ಶೋಧಿಸಿ ಬೆಳಕಿಗೆ ತರುವ ಮೂಲಕ ಕನ್ನಡ ಭಾಷೆ/ಲಿಪಿಯು ಭಾರತದಲ್ಲಿಯೇ ಅತ್ಯಂತ ಪ್ರಾಚೀನ ಭಾಷೆ/ಲಿಪಿಗಳಲ್ಲಿ ಒಂದೆಂದು ದೃಢಪಡಿಸಿದರು. ಅಂದಿನಿಂದಲೂ ಹಲ್ಮಿಡಿ ಶಾಸನವು ಬೆಂಗಳೂರಿನ ಸರಕಾರಿ ವಸ್ತುಸಂಗ್ರಹಾಲಯದಲ್ಲಿ ಪ್ರದರ್ಶನಗೊಳ್ಳುತ್ತಿದೆ.

ಪ್ರಸ್ತುತ ಸರಕಾರಿ ವಸ್ತುಸಂಗ್ರಹಾಲಯವು ನವೀಕರಣದ ಹಂತದಲ್ಲಿರುವುದರಿಂದ, ಈ ಶಾಸನವು ಸಾರ್ವಜನಿಕರ/ಇತಿಹಾಸ ಪ್ರಿಯರ ವೀಕ್ಷಣೆಗೆ ಲಭ್ಯವಿರುವುದಿಲ್ಲ. ಒಂದು ವಾರ ಪೂರ್ತಿ ನಡೆಯುವ ಈ ಪ್ರದರ್ಶನದ ಮೂಲಕ ಹಲ್ಮಿಡಿ ಶಾಸನವನ್ನು ಹತ್ತಿರದಿಂದ ವೀಕ್ಷಿಸುವ ಅವಕಾಶವಿರುತ್ತದೆ. ಹೀಗಾಗಿ, ವಿದ್ಯಾರ್ಥಿಗಳು, ಸಂಶೋಧಕರು, ಇತಿಹಾಸ ಆಸಕ್ತರು, ಸಾರ್ವಜನಿಕರು ಈ ಅವಕಾಶವನ್ನು ಸದುಪಯೋಗಪಡಿಸಿಕೊಳ್ಳಬೇಕು ಎಂದು ರಾಜ್ಯ ಪುರಾತತ್ವ, ಸಂಗ್ರಹಾಲಯಗಳು ಮತ್ತು ಪರಂಪರೆ ಇಲಾಖೆ (ವಸ್ತು ಸಂಗ್ರಹಾಲಯಗಳು) ನಿರ್ದೇಶಕಿ ಡಾ. ಸ್ಮಿತಾ ರೆಡ್ಡಿ ಕೋರಿದ್ದಾರೆ.