ಉನ್ನತ ಶಿಕ್ಷಣ ಸಂಸ್ಥೆಗಳಿಗೆ ಜಿಎಸ್​ಟಿ ಶಾಕ್​

ಕಲಬುರಗಿ: ಹೊರಗುತ್ತಿಗೆ ನೌಕರರು, ಪಿಂಚಣಿದಾರರು, ಇತರೆ ಖರ್ಚುಗಳಿಗೆ ಹಣ ಹೊಂದಿಸುವಲ್ಲಿ ಪ್ರಯಾಸ ಪಡುತ್ತಿರುವ ಉನ್ನತ ಶಿಕ್ಷಣ ಸಂಸ್ಥೆಗಳಾದ ವಿಶ್ವವಿದ್ಯಾಲಯಗಳಿಗೆ ಜಿಎಸ್​ಟಿ ಭರಿಸಲು ಸೂಚನೆ ನೀಡಿರುವುದು ದೊಡ್ಡ ಹೊಡೆತ ನೀಡಿದಂತಾಗಿದೆ. ರಾಜ್ಯದಲ್ಲಿ ಸುಮಾರು 32 ವಿಶ್ವವಿದ್ಯಾಲಯಗಳಿದ್ದು, ಎಲ್ಲ ವಿವಿಗಳಿಗೂ ಸರಕು ಸೇವಾ ತೆರಿಗೆ ಭರಿಸಲು ಆದೇಶ ನೀಡಿರುವುದು ಆಡಳಿತ ಮಂಡಳಿಯನ್ನು ಚಿಂತೆಗೀಡು ಮಾಡಿದೆ.

2018ರಿಂದ ಪೂರ್ವಾನ್ವಯವಾಗುವಂತೆ ಕಾಲೇಜುಗಳ ಸಂಲಗ್ನತೆ ಶುಲ್ಕದ ಮೇಲಿನ ಸರಕು ಸೇವಾ ತೆರಿಗೆ (ಜಿಎಸ್​ಟಿ) ಭರಿಸಲು ಸೂಚನೆ ನೀಡಲಾಗಿದೆ. ಇದರ ಪ್ರಕಾರ ಗುಲ್ಬರ್ಗ ವಿಶ್ವವಿದ್ಯಾಲಯವೂ ಮೂರು ಕೋಟಿ ರೂ. ಅಸಲು ಹಾಗೂ ಬಡ್ಡಿ ಸೇರಿ ಸುಮಾರು ಏಳು ಕೋಟಿ ರೂ. ಪಾವತಿಸಬೇಕಿದೆ. ಈ ಹಣ ಹೊಂದಾಣಿಕೆ ಯುನಿವರ್ಸಿಟಿಗೆ ಕಷ್ಟಕರವಾಗಿದೆ.

ವಿಶ್ವವಿದ್ಯಾಲಯಕ್ಕೆ ವಾರ್ಷಿಕ 87 ಕೋಟಿ ರೂ. ವೆಚ್ಚವಾಗುತ್ತಿದ್ದು, ಆದರೆ ವಾರ್ಷಿಕ 59 ಕೋಟಿ ರೂ. ಆದಾಯ ಬರುತ್ತಿದೆ. ಇನ್ನುಳಿದ 27 ಕೋಟಿ ರೂ. ಹೊಂದಿಸುವುದು ದೊಡ್ಡ ಸವಾಲಾಗಿದೆ. ಸರ್ಕಾರ ಪೂರ್ಣಾವಧಿ ನೌಕರರಿಗೆ (ಬೋಧಕ ಮತ್ತು ಬೋಧಕೇತರ) ವಾರ್ಷಿಕ 31.9ಕೋಟಿ ರೂ. ವೇತನ ರೂಪದಲ್ಲಿ ನೀಡುತ್ತಿದೆ. ಪಿಂಚಣಿಗಾಗಿ ವಾರ್ಷಿಕ 54 ಕೋಟಿ ರೂ. ರ್ಖಚಾಗುತ್ತಿದ್ದು, ಈ ಪೈಕಿ ಸರ್ಕಾರ ಕೇವಲ 20 ಕೋಟಿ ರೂ. ನೀಡಿದೆ. ಆಡಳಿತಾತ್ಮಕ, ಪರೀಕ್ಷಾಂಗದ ವೆಚ್ಚ ಸೇರಿ ಇತರೆ ಖರ್ಚುಗಳೂ ಇವೆ. ಪಿಂಚಣಿಯ ಒಟ್ಟು ಮೊತ್ತದಲ್ಲಿ ವಿಶ್ವವಿದ್ಯಾಲಯ ಶೇ.75 ಹಣ ಭರಿಸಬೇಕಿದ್ದು, ಇಲ್ಲದಿದ್ದರೆ ನೀಡುವ ಅನುದಾನವೂ ಕಡಿತಗೊಳಿಸುವುದಾಗಿ ರಾಜ್ಯ ಸರ್ಕಾರ ತಾಕೀತು ಮಾಡಿದೆ.

ಶಿಕ್ಷಕೇತರ ಹೊರಗುತ್ತಿಗೆ ನೌಕರರು 320, ಅತಿಥಿ ಶಿಕ್ಷಕರು 150, ಭದ್ರತಾ ಸಿಬ್ಬಂದಿ 42 ಜನ ಸೇರಿ ವಿವಿಧ ಹಂತದಲ್ಲಿ ಕೆಲಸ ಮಾಡುತ್ತಿರುವ ಸಿಬ್ಬಂದಿಗೆ ವಿವಿ ಸಂಪನ್ಮೂಲದಿಂದಲೇ ಹಣ ಹೊಂದಾಣಿಕೆ ಮಾಡಬೇಕಿದೆ. ಒಟ್ಟು 641 ಜನ ಪಿಂಚಣಿದಾರರಿದ್ದಾರೆ. ವಿಶ್ವವಿದ್ಯಾಲಯಲ್ಲಿ ಪ್ರಸಕ್ತ 29 ಜನ ಬೋಧಕರಿದ್ದು, ಮುಂದಿನ 2&3 ತಿಂಗಳಲ್ಲಿ ಈ ಸಂಖ್ಯೆ 12ಕ್ಕೆ ಬಂದು ನಿಲ್ಲಲಿದೆ. 12 ವಿಭಾಗಗಳಲ್ಲಿ ಒಬ್ಬರೂ ಶಿಕ್ಷಕರಿಲ್ಲ. 8 ವಿಭಾಗಗಳಲ್ಲಿ ಒಬ್ಬರೇ ಶಿಕ್ಷಕರು ಕಾರ್ಯನಿರ್ವಹಿಸುತ್ತಿದ್ದಾರೆ.

ಖಾಸಗಿ ಕಾಲೇಜುಗಳಿಗೆ ಸ್ನಾತಕೋತ್ತರ ಕೇಂದ್ರ (ಪಿಜಿ ಸೆಂಟರ್​)ಗಳನ್ನು ನೀಡಿದೆ. ಹೀಗಾಗಿ ಉನ್ನತ ಶಿಕ್ಷಣಕ್ಕಾಗಿ ವಿಶ್ವವಿದ್ಯಾಲಯಕ್ಕೆ ಬರುವ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯ ಕಡಿಮೆಯಾಗಿದೆ. ಬೋಧಕರ ನೇಮಕ ಪ್ರಕ್ರಿಯೆ ವಿಳಂಬವಾಗುತ್ತಿದ್ದು, ಸರ್ಕಾರವೂ ಅನುದಾನವನ್ನು ಗಣನೀಯವಾಗಿ ಕಡಿತಗೊಳಿಸಿದೆ. ಹೀಗಾಗಿ ವಿಶ್ವವಿದ್ಯಾಲಯ ಶೋಚನೀಯ ಸ್ಥಿತಿಗೆ ಬಂದು ನಿಂತಿದೆ. ಈ ಪರಿಸ್ಥಿತಿ ಸರಿದೂಗಿಸಲು ಸರ್ಕಾರ ಅಗತ್ಯ ಅನುದಾನ ಒದಗಿಸಬೇಕಿದೆ.

​ವಿವಿ ಪ್ರತ್ಯೇಕದ ನಂತರ ಸಮಸ್ಯೆ

ಗುಲ್ಬರ್ಗ ವಿಶ್ವವಿದ್ಯಾಲಯ ಈ ಮೊದಲು ಏಳು ಜಿಲ್ಲೆಗಳನ್ನು ಒಳಗೊಂಡಿತ್ತು. ವಿದ್ಯಾರ್ಥಿಗಳ ಸಂಖ್ಯೆಯೂ ಸಾಕಷ್ಟಿತ್ತು. ಜತೆಗೆ ಆದಾಯವೂ ತೃಪ್ತಿಕರವಾಗಿತ್ತು. ಆದರೆ ಮೊದಲು ಬಳ್ಳಾರಿ ಕೃಷ್ಣದೇವರಾಯ ವಿವಿ, ನಂತರ ರಾಯಚೂರು ಮಹರ್ಷಿ ಆದಿಕವಿ ವಾಲ್ಮೀಕಿ ವಿವಿಗಳು ಗುವಿವಿಯಿಂದ ಪ್ರತ್ಯೇಕಗೊಂಡವು. ಈ ಪ್ರಕ್ರಿಯೆ ಇಷ್ಟಕ್ಕೆ ನಿಲ್ಲದೆ ಬೀದರ್​ನಲ್ಲೂ ಪ್ರತ್ಯೇಕ ವಿವಿ ಸ್ಥಾಪನೆಯಾಗುವ ಮೂಲಕ ಗುಲ್ಬರ್ಗ ವಿವಿ ಏಕಾಂಗಿ ಆಯಿತು. ಯುನಿವರ್ಸಿಟಿ ವಿಭಜನೆಗೊಂಡು ಹೊಸ ಮೂರು ವಿಶ್ವವಿದ್ಯಾಲಗಳು ಹುಟ್ಟಿಕೊಂಡರೂ ನೌಕರರ ಸಂಖ್ಯೆ, ಹೊರಗುತ್ತಿಗೆ ನೌಕರರ ಸಂಖ್ಯೆ ಯಥಾಸ್ಥಿತಿಯಲ್ಲಿದೆ. ಆದರೆ ಆದಾಯ ಮೂಲವಾದ ಕಾಲೇಜುಗಳು ಆಯಾ ವಿವಿಗಳಿಗೆ ಸೇರಿಕೊಂಡಿವೆ. ಹೀಗಾಗಿ ಆದಾಯ ಕಡಿಮೆಯಾಗಿ ವೆಚ್ಚದ ಪ್ರಮಾಣ ಹೆಚ್ಚಾಗಿದೆ.

ಕರ್ನಾಟಕದಲ್ಲಿ 32 ಸರ್ಕಾರಿ ವಿಶ್ವವಿದ್ಯಾಲಯಗಳಿದ್ದು, ಎಲ್ಲ ವಿವಿಗಳಿಗೂ ಸರಕು ಸೇವಾ ತೆರಿಗೆ ಭರಿಸುವಂತೆ ಜಿಎಸ್​ಟಿ ಪ್ರಾಧಿಕಾರ ಸೂಚನೆ ನೀಡಿದೆ. ಈ ಆದೇಶದ ವಿರುದ್ಧ ಬೆಂಗಳೂರು ಹಾಗೂ ಮೈಸೂರು ವಿವಿಗಳು ಪ್ರಾಧಿಕಾರಕ್ಕೆ ಅರ್ಜಿ ಸಲ್ಲಿಸಿದ್ದವು. ಸಮಗ್ರ ವಿಚಾರಣೆ ನಡೆಸಿದ ಪ್ರಾಧಿಕಾರ ಶಿಕ್ಷಣವನ್ನು ಜಿಎಸ್​ಟಿಯಿಂದ ಹೊರಗಿಡುವಂತೆ ಸಲಹೆ ನೀಡಿ, ತೆರಿಗೆಯಿಂದ ವಿನಾಯಿತಿ ನೀಡಿತ್ತು. ಹೀಗಾಗಿ ಬೆಂಗಳೂರು, ಮೈಸೂರು ಯುನಿವರ್ಸಿಟಿಗಳು ಟ್ಯಾಕ್ಸ್​ನಿಂದ ದೂರವಾಗಿವೆ. ಇದೇ ಮಾದರಿಯಲ್ಲಿ ಗುಲ್ಬರ್ಗ ವಿವಿಯನ್ನು ಜಿಎಸ್​ಟಿಯಿಂದ ಮುಕ್ತಗೊಳಿಸಲು ಬೆಳಗಾವಿ ಜಿಎಸ್​ಟಿ ಆಯುಕ್ತಾಲಯಕ್ಕೆ ಗುವಿವಿ ಮೊರೆ ಹೋಗಿದೆ.

"

ವಿಶ್ವವಿದ್ಯಾಲಯದ ಸದ್ಯದ ಪರಿಸ್ಥಿತಿ ಸರ್ಕಾರದ ಗಮನಕ್ಕೂ ಇದೆ. ಈ ತಿಂಗಳಾಂತ್ಯಕ್ಕೆ ಸರ್ಕಾರ ಬೋಧಕ ಸಿಬ್ಬಂದಿ ನೇಮಕಕ್ಕೆ ಹಸಿರು ನಿಶಾನೆ ನೀಡುವ ಸಾಧ್ಯತೆಗಳಿದೆ. ಸಹಾಯಕ ಪ್ರಾಧ್ಯಾಪಕರು, ಸಹ ಪ್ರಾಧ್ಯಾಪಕ, ಪ್ರಾಧ್ಯಾಪಕರು ಸೇರಿ ಸುಮಾರು 200 ಹುದ್ದೆ ಭತಿಯಾಗಲಿವೆ. ಸರ್ಕಾರ ಈ ಹುದ್ದೆಗಳಿಗೆ ಮೀಸಲು ನಿರ್ಧರಿಸಿದ ನಂತರ ನೇಮಕ ಪ್ರಕ್ರಿಯೆ ಪ್ರಾರಂಭಗೊಳ್ಳಲಿದೆ.

— ಪ್ರೊ.ಶಶಿಕಾಂತ ಉಡಕೇರಿ, ಕುಲಪತಿ, ಗುಲ್ಬರ್ಗ ವಿಶ್ವವಿದ್ಯಾಲಯ