ಬೆಂಗಳೂರಿನಲ್ಲಿ ಪಾರ್ಕಿಂಗ್​ಗೆ ಹೊಸ ನಿಯಮ ರೂಪಿಸಲು ಮುಂದಾದ ಸರ್ಕಾರ: ಮನೆಯ ಮುಂದಿನ ರಸ್ತೆಯಲ್ಲಿ ಕಾರು ಪಾರ್ಕಿಂಗ್​ಗೆ​ ಭಾರೀ ಶುಲ್ಕ? | parking rules

ಬೆಂಗಳೂರು: ನಗರದಲ್ಲಿನ ಸಂಚಾರ ದಟ್ಟಣೆ ಮತ್ತು ಪಾರ್ಕಿಂಗ್ ಸಮಸ್ಯೆ ನೀಗಿಸಲು ಮುಂದಾಗಿರುವ ರಾಜ್ಯ ಸರ್ಕಾರ, ಗ್ರೇಟರ್ ಬೆಂಗಳೂರು ಏರಿಯಾ(ಪಾರ್ಕಿಂಗ್) ನಿಯಮಗಳು- 2026ರ ಅಡಿಯಲ್ಲಿ ಹೊಸ ನಿಯಮಗಳನ್ನು(New Parking rules) ಪರಿಚಯಿಸಿ, ಕರಡು ನಿಯಮಗಳನ್ನು ಬಿಡುಗಡೆ ಮಾಡಿದೆ. ಆ ನಿಯಮಗಳಿಗೆ ಆಕ್ಷೇಪಣೆವಿದ್ದಲ್ಲಿ ಸೆ. 11ರೊಳಗೆ ಸಲ್ಲಿಸುವಂತೆ ಕೋರಿದೆ.

ಪ್ರಸ್ತಾವಿತ ಕರಡು ನಿಯಮಗಳಲ್ಲಿ, ನಗರದ ಸಂಚಾರ ದಟ್ಟಣೆ ಮತ್ತು ಪಾರ್ಕಿಂಗ್ ಸಮಸ್ಯೆ ನೀಗಿಸಲು, ಗಂಟೆಗಳ ಆಧಾರದಲ್ಲಿ ಶುಲ್ಕ ವಿಧಿಸಲು ಮುಂದಾಗಿದೆ. A, B, C ಆಧಾರದ ಮೇಲೆ ರಸ್ತೆಗಳನ್ನು ವರ್ಗೀಕರಿಸಿ, ಅವುಗಳ ಆಧಾರದ ಮೇಲೆ ಶುಲ್ಕ ನಿಗದಿ ಮಾಡಲಾಗುತ್ತದೆ ಎನ್ನಲಾಗಿದೆ. C ವರ್ಗದ ರಸ್ತೆಗಳಲ್ಲಿ ಕಾರಿಗೆ 40 ರೂ. ಮತ್ತು ಬೈಕ್​ಗೆ 20 ರೂ. B ವರ್ಗದ ರಸ್ತೆಗಳಲ್ಲಿ ಕಾರುಗಳಿಗೆ 60 ರೂ. ಮತ್ತು ಬೈಕ್​ಗಳಿಗೆ 30 ರೂ. A ವರ್ಗದ ರಸ್ತೆಗಳಲ್ಲಿ ಕಾರುಗಳಿಗೆ 80 ರೂ. ಹಾಗೂ ಬೈಕ್​ಗಳಿಗೆ 40 ರೂಪಾಯಿವರೆಗೂ ಶುಲ್ಕ ನಿಗದಿ ಮಾಡಲಾಗಿದೆ.

ಸರ್ಕಾರ ಹೊರಡಿಸಿರುವ ಕರಡು ನಿಯಮಗಳಲ್ಲಿ ಪ್ರಮುಖವಾಗಿ, ಬೆಂಗಳೂರಿನ ನಿವಾಸಿಗಳು ಮನೆಯ ಮುಂದಿನ ರಸ್ತೆಗಳಲ್ಲಿ ಕಾರುಗಳನ್ನು ನಿಲ್ಲಿಸುತ್ತಿದ್ರೆ, ಅದರ ಮಾಲೀಕರು ರಸ್ತೆಯನ್ನು ಪಾರ್ಕಿಂಗ್ ಮಾಡಿಕೊಳ್ಳುವ ಹಿನ್ನೆಲೆ ವಾರ್ಷಿಕವಾಗಿ 25,000 ರೂ.ವರೆಗಿನ ಶುಲ್ಕವನ್ನು ಪಾವತಿಸುವ ಪ್ರಸ್ತಾಪವನ್ನು ಸೇರಿಸಲಾಗಿದೆ. ಸಣ್ಣ ಕಾರುಗಳಿಗೆ 15,000 ರೂ. ಸೆಡಾನ್‌ಗಳಿಗೆ 20,000 ರೂ. ಹಾಗೂ ಎಸ್‌ಯುವಿ ಕಾರುಗಳಿಗೆ 25,000 ರೂಪಾಯಿ ನಿಗದಿ ಮಾಡಲಾಗಿದೆ.

ಇನ್ನೂ ರಸ್ತೆಬದಿಯೇತರ ಪಾರ್ಕಿಂಗ್‌ಗಳಿಗೆ ಕಡಿಮೆ ಶುಲ್ಕ ಪ್ರಸ್ತಾಪಿಸಲಾಗಿದೆ. ಕಾರುಗಳಿಗೆ ಪ್ರತಿ ಗಂಟೆಗೆ 20 ರಿಂದ 40 ರೂ.ಗಳವರೆಗೆ ಶುಲ್ಕ ವಿಧಿಸಬಹುದು. ದ್ವಿಚಕ್ರ ವಾಹನಗಳಿಗೆ, ಪ್ರಸ್ತಾಪಿತ ಗಂಟೆಯ ಶುಲ್ಕವು 10 ರಿಂದ 20 ರೂ.ಗಳ ವ್ಯಾಪ್ತಿಯಲ್ಲಿರಲಿದೆ. ಮತ್ತು ಮಾಸಿಕವಾಗಿ 1,000ದಿಂದ 4,000 ರೂಪಾಯಿ ನಿಗದಿಪಡಿಸಲು ಪ್ರಸ್ತಾಪಿಸಲಾಗಿದೆ.

ಇನ್ನೂ ರಸ್ತೆ ಬದಿಯ ಪಾರ್ಕಿಂಗ್ ಸ್ಥಳಗಳನ್ನು ವಾಹನ ಸವಾರರು ದೀರ್ಘಕಾಲದವರೆಗೆ ಆಕ್ರಮಿಸಿಕೊಳ್ಳುವುದನ್ನು ತಡೆಯುವ ಉದ್ದೇಶವನ್ನು ಈ ಪ್ರಸ್ತಾವಿತ ನಿಯಮಗಳು ಹೊಂದಿವೆ. ಕರಡು ನೀತಿಯ ಪ್ರಕಾರ, ವಾಹನವೊಂದು ಎರಡು ಗಂಟೆಗಳಿಗಿಂತ ಹೆಚ್ಚು ಕಾಲ ನಿಲುಗಡೆಯಲ್ಲಿದ್ದಾಗ ಪಾರ್ಕಿಂಗ್ ಶುಲ್ಕ ಹೆಚ್ಚಾಗುತ್ತದೆ.

ನಗರಾಭಿವೃದ್ಧಿ ಇಲಾಖೆಯು ಆಗಸ್ಟ್ 11ರಂದು ಕರಡು ಅಧಿಸೂಚನೆಯನ್ನು ಹೊರಡಿಸಿದೆ. ಪ್ರಸ್ತಾವಿತ ನಿಯಮಗಳು ಇನ್ನೂ ಅಂತಿಮಗೊಂಡಿಲ್ಲ. ಗೆಜೆಟ್‌ನಲ್ಲಿ ಅಧಿಸೂಚನೆ ಪ್ರಕಟವಾದ ದಿನಾಂಕದಿಂದ 30 ದಿನಗಳ ಒಳಗಾಗಿ ಸಾರ್ವಜನಿಕರು ತಮ್ಮ ಆಕ್ಷೇಪಣೆಗಳು ಮತ್ತು ಸಲಹೆಗಳನ್ನು ಸಲ್ಲಿಸಲು ಅವಕಾಶ ನೀಡಲಾಗಿದೆ.