ರಾಷ್ಟ್ರೀಯ ಕೆಲಸಕ್ಕೆ ಮನ್ನಣೆ ನೀಡಿ

ಕೆಂಭಾವಿ: ಇನ್ನೇನು ಕೆಲವೇ ದಿನಗಳಲ್ಲಿ ಆರಂಭವಾಗುವ ಮತದಾರರ ಪಟ್ಟಿ ಪರಿಷ್ಕರಣೆ ಕಾರ್ಯಕ್ರಮದಲ್ಲಿ ಎಲ್ಲ ಬಿಎಲ್​ಒಗಳು ಸರಿಯಾದ ರೀತಿಯಲ್ಲಿ ಕಾರ್ಯನಿರ್ವಹಿಸಿ ರಾಷ್ಟ್ರೀಯ ಕೆಲಸಕ್ಕೆ ಮನ್ನಣೆ ನೀಡಬೇಕು ಎಂದು ಕಂದಾಯ ಇಲಾಖೆ ಎಸ್​ಐಆರ್​ (ಸ್ಪೆಷಲ್​ ಇಂಟೆನ್​ಸಿವ್​ ರಿವಿಜನ್​) ನೋಡಲ್​ ಅಧಿಕಾರಿ ಸಂಗಮೇಶ ಹೇಳಿದರು.

ಪಟ್ಟಣದ ಬಾಲಕರ ಸರ್ಕಾರಿ ಪ್ರೌಢಶಾಲೆಯಲ್ಲಿ ಮಂಗಳವಾರ ಏರ್ಪಡಿಸಿದ್ದ ಮತದಾರರ ಪಟ್ಟಿ ವಿಶೇಷ ಸಮಗ್ರ ಪರಿಷ್ಕರಣಾ-2026ರ ತರಬೇತಿ ಕಾರ್ಯಕ್ರಮದಲ್ಲಿ ಬಿಎಲ್​ಒಗಳನ್ನು ಉದ್ದೇಶಿಸಿ ಮಾತನಾಡಿದ ಅವರು, ಮತದಾರರ ಪಟ್ಟಿ ಶುದ್ಧಿಕರಿಸುವ ಪ್ರಕ್ರಿಯೆ ಇದಾಗಿದ್ದು ಭಾರತ ದೇಶದ ಪ್ರತಿಯೊಬ್ಬ 18 ವರ್ಷ ತುಂಬಿದ ಪ್ರಜೆ ಮತದಾನದಿಂದ ವಂಚಿತವಾಗಬಾರದು. ಈ ನಿಟ್ಟಿನಲ್ಲಿ ಮತದಾರರ ಚೀಟಿಯಲ್ಲಿ ಹಲವು ಲೋಪದೋಷ ಕಂಡು ಬಂದಿದ್ದರೆ ಅವುಗಳನ್ನು ಸರಿಪಡಿಸಿ ನಿಜವಾದ ಮತದಾರರ (ಭಾರತ ದೇಶದ ಪ್ರಜೆಯಾಗಿರಬೇಕು) ಪಟ್ಟಿಯನ್ನು ಪರಿಷ್ಕರಿಸುವಂತೆ ಸೂಚನೆ ನೀಡಿದರು.

ಭಾರತ ದೇಶದ ಯಾವುದೇ ನಾಗರಿಕ ಮತದಾನದಿಂದ ವಂಚಿತವಾಗಬಾರದು ಮತ್ತು ಭಾರತೀಯ ನಾಗರಿಕನಲ್ಲದ ಮತದಾರ ಈ ದೇಶದಲ್ಲಿ ಮತದಾನ ಮಾಡಬಾರದು ಎಂಬ ಮಹತ್ವದ ಎರಡು ವಿಧಾನಗಳಿಂದ ಈ ಎಸ್​ಐಆರ್​ ಕಾರ್ಯನಿರ್ವಹಿಸುತ್ತಿದೆ. ಜೂ.30ರಿಂದ ಈ ಮತದಾನ ಪಟ್ಟಿ ಪರಿಷ್ಕರಣೆ ಕಾರ್ಯ ಆರಂಭವಾಗಲಿದ್ದು ಎಲ್ಲ ಬಿಎಲ್​ಒಗಳು ತಮಗೆ ನಿರ್ವಹಿಸಿದ ಕೆಲಸ ಅಚ್ಚುಕಟ್ಟಾಗಿ ಮನೆ ಮನೆಗೆ ತೆರಳಿ ಮತದಾರರ ಚೀಟಿ ಸರಿಪಡಿಸುವಂತೆ ಹೇಳಿದರು.

ಹಿರಿಯ ಪತ್ರಕರ್ತ ಸಂಜೀವರಾವ ಕುಲಕರ್ಣಿ ಮಾತನಾಡಿ, ಮತದಾರರ ಪಟ್ಟಿ ಪರಿಷ್ಕರಣೆ ಒಂದು ಮಹತ್ವ ಜವಾಬ್ದಾರಿಯಾಗಿದ್ದು ವಲಯದ 87 ಮತಗಟ್ಟೆಗಳ ಬಿಎಲ್​ಒಗಳ ತರಬೇತಿ ಇಂದು ನಡೆಯುತ್ತಿದೆ. ಈ ತರಬೇತಿಯಲ್ಲಿ ಹಲವು ಬಿಎಲ್​ಒಗಳು ಗೈರಾಗಿರುವುದು ಕಂಡು ಬಂದಿದ್ದು ಅಧಿಕಾರಿಗಳು ಈ ಬಗ್ಗೆ ಹೆಚ್ಚಿನ ನಿಗಾ ವಹಿಸಿ ಎಲ್ಲ ಬಿಎಲ್​ಒಗಳು ಸರ್ಕಾರದ ಕಾರ್ಯದಲ್ಲಿ ಭಾಗವಹಿಸುವಂತೆ ಮನವಿ ಮಾಡಿದರು.

ಕಂದಾಯ ನಿರೀಕ್ಷಕ ರಾಜೇಸಾಬ್​ ಕಂದಗಲ್​, ಗ್ರಾಮ ಅಢಳಿತಾಧಿಕಾರಿ ಬ್ರಹ್ಮದೇವನ ಮಡು, ಪುರಸಭೆ ಸಿಬ್ಬಂದಿ ಸಿದ್ರಾಮಯ್ಯ ಇಂಡಿ, ಬಸವರಾಜ ಬೋರಗಿ, ಕಾಶೀನಾಥ, ಸಿದ್ಧನಗೌಡ, ಶಿವು ಚೌಹ್ಹಾಣ್​, ವೀರೇಶ ಭಜಂತ್ರಿ, ಕುಮಾರ ಮೋಪಗಾರ ಇದ್ದರು.

"

ವಲಯದಲ್ಲಿ 87 ಮತಗಟ್ಟೆಗಳಿದ್ದು ಈ ಮತಗಟ್ಟೆಗಳ ಜವಾಬ್ದಾರಿ ಬಿಎಲ್​ಒಗಳ ಮೇಲಿದೆ. ಮಂಗಳವಾರ ನಡೆದ ವಿಶೇಷ ತರಬೇತಿಗೆ ಗೈರಾದ ಕೆಂಭಾವಿ, ಮಾಲಗತ್ತಿ, ಯಾಳಗಿ ಸೇರಿ ಹಲವು ಬಿಎಲ್​ಒಗಳಿಗೆ ಕಾರಣ ಕೇಳಿ ನೋಟೀಸ್​ ನೀಡಲಾಗುವುದು.

— > ರಾಜೇಸಾಬ ಕಂದಗಲ್​ ಕಂದಾಯ ನಿರೀಕ್ಷಕ