ಜೆಸ್ಕಾಂ ಇಲಾಖೆ ಸಂಪೂರ್ಣ ವಿಫಲ

ಯಾದಗಿರಿ: ಗುರುಮಠಕಲ್​ ಮತಕ್ಷೇತ್ರ ಸೇರಿ ಇಡೀ ಜಿಲ್ಲೆಯಲ್ಲಿ ಜೆಸ್ಕಾಂ ಇಲಾಖೆ ತನ್ನ ಕಾರ್ಯವೈಖರಿಯಲ್ಲಿ ಸಂಪೂರ್ಣ ವಿಫಲವಾಗಿದ್ದು, ತಾವು ಕೂಡಲೇ ಈ ಬಗ್ಗೆ ಗಮನ ಹರಿಸಿ ಜನರ ಸಮಸ್ಯೆಗೆ ಸ್ಪಂದಿಸಲು ಜೆಸ್ಕಾಂ ಅಧಿಕಾರಿಗಳಿಗೆ ಸೂಚಿಸಬೇಕು. ಇಲ್ಲದಿದ್ದರೆ ನಾನೇ ಖುದ್ದಾಗಿ ಜೆಸ್ಕಾಂ ಕಚೇರಿಗೆ ಬೀಗ ಹಾಕಬೇಕಾಗುತ್ತದೆ ಎಂದು ಶಾಸಕ ಶರಣಗೌಡ ಕಂದಕೂರ ಎಚ್ಚರಿಸಿದರು.

ನೂತನ ಜಿಲ್ಲಾಧಿಕಾರಿ ಪಾಂಡ್ವೆ ರಾಹುಲ್​ ತುಕರಾಂ ಅವರನ್ನು ಸೋಮವಾರ ಮಧ್ಯಾಹ್ನ ಡಿಸಿ ಕಚೇರಿಯಲ್ಲಿ ಭೇಟಿ ಮಾಡಿ ಶುಭಕೋರಿಸಿದ ಶಾಸಕರು, ಸುಮಾರು ಅರ್ಧ ಗಂಟೆಗೂ ಹೆಚ್ಚು ಕಾಲ ಜಿಲ್ಲೆಯ ವಿವಿಧ ಸಮಸ್ಯೆಗಳ ಮೇಲೆ ಬೆಳಕು ಚೆಲ್ಲಿ ಅವುಗಳ ಪರಿಹಾರಕ್ಕೆ ತಕ್ಷಣ ಕಾರ್ಯಪೃವತ್ತರಾಗಬೇಕು ಎಂದು ಹೇಳಿದರು.

ಜಿಲ್ಲೆಯ ಜೆಸ್ಕಾಂ ಅಧಿಕಾರಿ, ಸಿಬ್ಬಂದಿ ಅವರಿಗೆ ಜನರ ಬಗ್ಗೆ ಕಾಳಜಿ ಇಲ್ಲ. ವಿದ್ಯುತ್​ ಪದೇಪದೆ ಕೈಕೊಡುವುದರಿಂದ ನಗರದ ಎಲ್ಲ ವಾರ್ಡ್​ಗಳಲ್ಲಿ ಕುಡಿಯುವ ನೀರಿನ ಸರಬರಾಜಿಗೆ ತೀವ್ರ ತೊಂದರೆಯಾಗಿದೆ. ಜಿಲ್ಲೆಯ ನೂರಾರು ಹಳ್ಳಿಗಳಲ್ಲಿ ವಿದ್ಯುತ್​ ಕಂಬಗಳು ನೆಲಕ್ಕುರುಳಿವೆ. ತಂತಿಗಳು ಹರಿದುಹೋಗಿವೆ. ಟಿಸಿಗಳು ಸುಟ್ಟಿವೆ. 2&3ದಿನಗಳಿಂದ ವಿದ್ಯುತ್​ ಇಲ್ಲ. ಈ ಬಗ್ಗೆ ನಾವು ಸೇರಿ ಸಾರ್ವಜನಿಕರು ವಿಷಯ ತಿಳಿಸಲು ಪೋನ್​ ಮಾಡಿದರೆ ಎತ್ತುವುದಿಲ್ಲ. ಎತ್ತಿದರೂ ಅರೆಬರೆ ಉತ್ತರ ನೀಡುತ್ತಾರೆ. ಗುರುಮಠಕಲ್​ ಮತ್ತು ಯಾದಗರಿ ಜೆಸ್ಕಾಂ ಎಇಇಗಳು ಹೆಲ್ಪ್​ಲೆಸ್​ ಅಧಿಕಾರಿಗಳಾಗಿದ್ದಾರೆ. ಗುರುಮಠಕಲ್​ನಲ್ಲಿ ಕುಡಿಯವು ನೀರಿಗಾಗಿ ಕರೆಂಟ್​ ಕೊಡಿ ಎಂದು ಅಲ್ಲಿನ ಮುಖ್ಯಾಧಿಕಾರಿ ಜೆಸ್ಕಾಂ ಅಧಿಕಾರಿಗೆ ತಿಳಿಸಿದರೂ ಕ್ಯಾರೆ ಎನ್ನುತ್ತಿಲ್ಲ ಹೀಗೆ ಜಿಲ್ಲೆಯ ಜೆಸ್ಕಾಂ ಇಲಾಖೆ ವೈಫಲ್ಯಗಳ ಪಟ್ಟಿಯನ್ನೇ ಶಾಸಕ ಕಂದಕೂರ ಡಿಸಿ ಮುಂದೆ ಇಟ್ಟರು.

ಎಲ್ಲವನ್ನು ಕೇಳಿಸಿಕೊಂಡ ಡಿಸಿ ರಾಹುಲ್​, ಸರ್​ ಇದೆಲ್ಲವೂ ಸರಿ ಮಾಡುವುದಾಗಿ ಹೇಳಿದರು. ನಾನು ಕಳೆದ ಮೂರು ವರ್ಷಗಳಲ್ಲಿ ಡಿಸಿ ಅವರಿಗೆ ಭೇಟಿ ಮಾಡಬೇಕೆಂದು ಕಚೇರಿಗೆ ಬಂದನಲ್ಲ. ಆದರೆ ಜಿಲ್ಲೆಯಲ್ಲಿ ಆಡಳಿತ ವೈಫಲ್ಯ ಮಿತಿ ಮೀರಿದೆ. ಕೆಲ ಅಧಿಕಾರಿಗಳು ಕೆಲಸ ಮಾಡುವ ಇಚ್ಛೆ ಇದ್ದರೂ ಉಳಿದವರ ಸೋಮಾರಿತನದಿಂದ ಆಗುತ್ತಿಲ್ಲ. ಹೀಗೆ ಆಗಲು ತಾವು ಬಿಡಬಾರದು ಎಂದು ಹೇಳಿದರು.

ಜಿಲ್ಲೆಯಲ್ಲಿ ಹಗಲು ರಾತ್ರಿ ಎನ್ನದೇ ಅತಿಭಾರದ ವಾಹನಗಳು ಸಂಚರಿಸುತ್ತಿವೆ. ಎಲ್ಲಿಂದ ಎಲ್ಲಗೆ ಹೊಗುತ್ತಿವೆ. ಒಳಗಡೆ ಏನಿದೆ ಎಂದು ಪರಿಶೀಲಿಸಬೇಕು. ಇವುಗಳ ಓಡಾಡದಿಂದ ನಮ್ಮ ರಸ್ತೆಗಳು ಹಾಳಾಗಿವೆ ಎಂದು ಶಾಸಕರು ಜಿಲ್ಲಾಧಿಕಾರಿಗಳ ಗಮನಕ್ಕೆ ತಂದರು.

ಈ ಎಲ್ಲ ಸಮಸ್ಯೆಗೆ ಸಕರಾತ್ಮಕವಾಗಿ ಸ್ಪಂಧಿಸಿದ ಡಿಸಿ, ಸಿಇಒ ಅವರು ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳ ಸಭೆ ಕರೆದು ಸರಿ ಮಾಡುವ ಭರವಸೆ ನೀಡಿದರು.

ಇನ್ನೂ ಜತೆಗಿದ್ದ ಜಿಪಂ ಸಿಇಒ ಅವರನ್ನು ಉದ್ದೇಶಿಸಿ ಹೇಳಿದ ಶಾಸಕರು, ಗ್ರಾಪಂ ಪಿಡಿಒಗಳು ಪಂಚಾಯಿತಿಗೆ ಬರುವುದಿಲ್ಲ. ಪಂಚಾಯಿತಿ ವ್ಯಾಪ್ತಿಯ ಹಳ್ಳಿಗಳಲ್ಲಿ ನೂರೆಂಟು ಸಮಸ್ಯೆಗಳಿವೆ. ಅವುಗಳನ್ನು ಬಗೆಹರಿಸಬೇಕಾದ ಸ್ಥಳಿಯ ಅಧಿಕಾರಿಗಳು ಕೈಗೆ ಸಿಗುತ್ತಿಲ್ಲ. ಕುಡಿಯುವ ನೀರು, ಕರೆಂಟ್​, ಚರಂಡಿ ಸ್ವಚ್ಛಗೊಳಿಸುವಿಕೆ ಸೇರಿ ಅನೇಕ ಸಮಸ್ಯೆಗಳಿದ್ದರೂ ಅವರು ಕೇರ್​ ಮಾಡುತ್ತಿಲ್ಲ, ಕಾರಣ ತಾವು ಈ ಬಗ್ಗೆ ವೈಯಕ್ತಿಕವಾಗಿ ಪರಿಶೀಲನೆ ಮಾಡುವ ಮೂಲಕ ಜನರಿಗೆ ಸ್ಪಂದಿಸಬೇಕು. ಅಧಿಕಾರಿಗಳು ಕೆಲಸ ಮಾಡಿಲ್ಲ ಎಂದರೆ ನೇರವಾಗಿ ನಮಗೆ ಜನರಿಂದ ಪೊನ್​ ಬರುತ್ತಿವೆ. ನಾವು ಸಹ ಅವರಿಗೆ ಹೇಳಿದರೆ ಸಕಾಲಕ್ಕೆ ಸ್ಪಂದನೆ ಮಾಡುವುದಿಲ್ಲ. ನಗರದಲ್ಲಿ ಟ್ಯಾಂಕರ್​ ಮೂಲಕ ನೀರು ಸರಬರಾಜು ಮಾಡಿದರೆ ಸಮಸ್ಯೆನೇ ಇರುತ್ತಿರಲಿಲ್ಲ ಎಂದು ಶಾಸಕರು ಸಮಸ್ಯೆಗಳನ್ನು ಈ ಇಬ್ಬರು ಅಧಿಕಾರಿಗಳ ಮುಂದೆ ಬಿಚ್ಚಿಟ್ಟರು. ಶಾಸಕರ ಪ್ರಶ್ನೆ ಮತ್ತು ಬೇಡಿಕೆಗಳನ್ನು ಶಾಂತವಾಗಿ ಆಲಿಸಿದ ಸಿಇಒ ಲವೀಶ್​ ಒರ್ಡಿಯಾ ಅವರು ಆದಷ್ಟು ಬೇಗನೆ ಎಲ್ಲವೂ ಸರಿಮಾಡುವುದಾಗಿ ಹೇಳಿದರು.