ಸೇಡಂನಲ್ಲಿ ಶವದೊಂದಿಗೆ ಮಿಂಚಿನ ಪ್ರತಿಭಟನೆ

ಸೇಡಂ: ಊಡಗಿ ಗ್ರಾಮದಲ್ಲಿ ಸೋಮವಾರ ತಡರಾತ್ರಿ ದಲಿತ ಯುವಕನ ಕೊಲೆ ಮಾಡಿದವರ ಬಂಧನಕ್ಕೆ ಒತ್ತಾಯಿಸಿ ಮಾದಿಗ ಸಮಾಜದಿಂದ ಶವದೊಂದಿಗೆ ಪಟ್ಟಣದ ಬಸವೇಶ್ವರ ವೃತ್ತದಲ್ಲಿ ಮಂಗಳವಾರ ಮಿಂಚಿನ ಪ್ರತಿಭಟನೆ ನಡೆಸಲಾಯಿತು.

ಕಲಬುರಗಿ ಜಿಮ್ಸ್​ನಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿದ ನಂತರ ನಗರಕ್ಕೆ ಆಗಮಿಸಿದ ಶವದೊಂದಿಗೆ ಕುಟುಂಬಸ್ಥರು, ಮಾದಿಗ ಸಮಾಜದ ಪ್ರಮುಖರು ದಿಢೀರ್​ ಪ್ರತಿಭಟನೆ ನಡೆಸಿದರು. ಅಂಗಡಿಯೊಂದರ ಬಳಿ ತೆರಳಿದ್ದ ಭಾಗ್ಯವಂತನ ಮೇಲೆ ಅದೇ ಗ್ರಾಮದ ನಬಿ ಮತ್ತು ಐದಾರು ಸಂಗಡಿಗರು ಮನಸೋ ಇಚ್ಚೆ ಹಲ್ಲೆ ಮಾಡಿದ್ದಾರೆ. ತಕ್ಷಣ ಆಸ್ಪತ್ರೆಗೆ ಕರೆದೊಯ್ದರೂ ಕೊನೆಯುಸಿರೆಳೆದಿದ್ದಾನೆ. ಇದೊಂದು ಉದ್ದೇಶಪೂರ್ವಕ ಕೃತ್ಯ. ಆದರೆ ಒಬ್ಬನನ್ನು ಮಾತ್ರ ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳುತ್ತಿದ್ದು, ಇನ್ನುಳಿದವರ ಬಂಧನ ಯಾವಾಗ ಎಂದು ಸಮಾಜದ ಮುಖಂಡ ವಿಜಯಕುಮಾರ ಆಡಕಿ ಪ್ರಶ್ನಿಸಿದರು.

ಸರ್ಕಾರದ ನಿಯಮದಂತೆ ಅಲ್ಪ ಪರಿಹಾರ ಯಾವುದಕ್ಕೂ ಸಾಲದು. ಗಂಡನ ಕಳೆದುಕೊಂಡು ಪತ್ನಿ ಬದುಕು ಸಾಗಿಸುವುದು ಕಷ್ಟಕರ. ಪತ್ನಿಗೆ ಸರ್ಕಾರಿ ನೌಕರಿ ಹಾಗೂ 50 ಲಕ್ಷ ರೂ. ಪರಿಹಾರ ನೀಡಬೇಕು ಎಂದು ಒತ್ತಾಯಿಸಿದರು.

ಸ್ಥಳಕ್ಕೆ ಭೇಟಿ ನೀಡಿದ ಹೆಚ್ಚುವರಿ ಎಸ್​ಪಿ ಮಹೇಶ ಮೇಘಣ್ಣನವರ್​, ತಹಸೀಲ್ದಾರ್​ ಶ್ರೀಯಾಂಕಾ ಧನಶ್ರೀ, ಡಿವ್​ೈಎಸ್​ಪಿ ಸಂಗಮನಾಥ ಹಿರೇಮಠ, ಸಮಾಜ ಕಲ್ಯಾಣ ಸಹಾಯಕ ನಿರ್ದೇಶಕಿ ಡಾ.ಶ್ರುತಿ ಅವರು, ಸರ್ಕಾರದ ಪರಿಹಾರ ಹಣ ನಿಯಮದಂತೆ ನಾಳೆ ಜಮೆ ಆಗಲಿದೆ. ನೌಕರಿ ಇನ್ನುಳಿದ ಕೆಲಸಕ್ಕಾಗಿ ಸರ್ಕಾರಕ್ಕೆ ದಾಖಲೆ ಸಲ್ಲಿಸಲಾಗುವುದು ಎಂದು ಹೇಳಿದರು. ಇದಕ್ಕೊಪ್ಪದ ಪ್ರತಿಭಟನಾಕಾರರು ಸ್ಥಳಕ್ಕೆ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಬಂದು ಸಿಎಂ ಜತೆ ಮಾತನಾಡಿ ವಿಶೇಷ ಪ್ರಕರಣವೆಂದು ಪರಿಗಣಿಸಿ ಪರಿಹಾರ ಕೊಡಿಸಬೇಕು ಎಂದು ಪಟ್ಟು ಹಿಡಿದರು.

ಹೆಚ್ಚುವರಿ ಎಸ್​ಪಿ ಮೇಘಣ್ಣನವರ್​ ಮೊಬೈಲ್​ನಲ್ಲಿ ಸಚಿವರ ಜತೆ ಮಾತನಾಡಿ ವಿಷಯ ತಿಳಿಸಿದರು. ಸಾಧ್ಯವಾದಷ್ಟು ಗರಿಷ್ಠ ಹಂತದ ಪರಿಹಾರ ಕೊಡಿಸಲಾಗುವುದು ಎಂದು ಭರವಸೆ ನೀಡಿದ್ದಾರೆ ಎಂದು ಪ್ರತಿಭಟನಾನಿರತರ ಗಮನಕ್ಕೆ ತಂದ ಬಳಿಕ ಹೋರಾಟ ಹಿಂತೆಗೆದುಕೊಳ್ಳಲಾಯಿತು.

ಮಾಜಿ ಶಾಸಕ ರಾಜಕುಮಾರ ಪಾಟೀಲ್​ ತೆಲ್ಕೂರ, ವಿಶ್ವ ಹಿಂದೂ ಪರಿಷತ್​ ಉತ್ತರ ಪ್ರಾಂತ ಕಾರ್ಯದರ್ಶಿ ಶಿವಕುಮಾರ ಬೋಳಶೆಟ್ಟಿ, ಮಾದಿಗ ಸಮಾಜದ ಶಿವಪುತ್ರಪ್ಪ ಮೋಘಾ, ರಾಮು ಕಣೇಕಲ್​, ಹಣಮಂತ ಭರತನೂರ, ಮೈಲಾರಿ ಕಾಸ್ತರ, ಭೀಮಾಶಂಕರ ಕೊರವಿ, ಮಹಾವೀರ ಅಳ್ಳೊಳ್ಳಿ, ಹಣಮಂತ ಊಡಗಿ ಇತರರಿದ್ದರು.

"