ರೈತರ ಜೀವನಾಡಿಗೆ ಬೇಕಿದೆ ಜೀವದಾನ

ನೂರಾರು ಹೆಕ್ಟೇರ್​ ಪ್ರದೇಶಕ್ಕೆ ನೀರುಣಿಸುವ ಹೂಡದಳ್ಳಿ ಗ್ರಾಮದ ಬೃಹತ್​ ಕೆರೆ ಇದೀಗ ಅಕ್ಷರಶ- ಅನಾಥವಾಗಿದೆ. ಸಮರ್ಪಕ ನಿರ್ವಹಣೆಯಿಲ್ಲದೆ ಕೆರೆ ಹಾಳಾಗುತ್ತಿದೆ.

ಗಾರಂಪಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹೂಡದಳ್ಳಿ ಗ್ರಾಮದಲ್ಲಿ ಮಾಜಿ ಮುಖ್ಯಮಂತ್ರಿ ವೀರೇಂದ್ರ ಪಾಟೀಲ್​ ಅವರ ಅವಧಿಯಲ್ಲಿ ಜನ ಹಾಗೂ ರೈತರ ಅನುಕೂಲಕ್ಕಾಗಿ ಕೆರೆ ನಿರ್ಮಿಸಲಾಗಿತ್ತು. 49.57 ಎಂಸಿ (ಮಿಲಿಯನ್​ ಕ್ಯೂಬಿಕ್​) ನೀರು ಸಂಗ್ರಹ ಸಾಮಾರ್ಥ್ಯ ಹೊಂದಿದ್ದು, ಸುಮಾರು 200 ಹೆಕ್ಟೇರ್​ ಪ್ರದೇಶಕ್ಕೆ ಈ ಕೆರೆ ನೀರುಣಿಸುತ್ತಿದೆ. ಮಳೆಗಾಲದಲ್ಲಿ ಸಂಪೂರ್ಣ ಭರ್ತಿಯಾಗಿ ಬೇಸಿಗೆಯಲ್ಲಿ ಭರ್ಜರಿ ನೀರು ನೀಡುತಿತ್ತು. ಕೆಲ ವರ್ಷಗಳಿಂದ ಅಧಿಕಾರಿಗಳು ಕೆರೆಯ ನಿರ್ವಹಣೆ ಮರೆತಿದ್ದರಿಂದ ಎಲ್ಲೆಂದರಲ್ಲಿ ಗಿಡಗಂಟಿಗಳು ಬೆಳೆದಿವೆ. ಏರಿಯ ಮೇಲಿನ ರಸ್ತೆಯಂತು ಮುಳ್ಳಿನ ಗಿಡಗಳಿಂದಲೇ ಆವೃತವಾಗಿದೆ. ಬೇರುಗಳು ಕೆರೆಯ ಏರಿ ಆಳಕ್ಕೆ ಇಳಿಯುತ್ತಿರುವುದರಿಂದ, ಏರಿ ಸಡಿಲಗೊಂಡು ಒಡೆಯುವ ಅಪಾಯ ಎದ್ದುಕಾಣುತ್ತಿದೆ ಎನ್ನುತ್ತಾರೆ ಗ್ರಾಮಸ್ಥರು.

ಇದಲ್ಲದೆ ಕೆರೆಯ ಏರಿ ಕೆಳಭಾಗದಲ್ಲಿ ಕಂದಕ (ಬಿರುಕು) ನಿರ್ಮಾಣವಾಗಿದೆ. ಇದರಿಂದಾಗಿ ನಿತ್ಯವೂ ಸಾಕಷ್ಟು ಪ್ರಮಾಣದ ನೀರು ಹರಿದು ಹೋಗುತ್ತಿದೆ. ಹೀಗೆಯೇ ಮುಂದುವರೆದರೆ ಮುಂಬರುವ ದಿನಗಳಲ್ಲಿ ಕೆರೆ ಖಾಲಿಯಾಗಿ, ಸುತ್ತಮುತ್ತಲಿನ ಅಂತರ್ಜಲ ಮಟ್ಟ ಕುಸಿಯುವ ಭೀತಿ ಎದುರಾಗಿದೆ.

ಈ ಕೆರೆ ನೀರನ್ನು ನಂಬಿಕೊಂಡು ನೂರಾರು ಎಕರೆ ಪ್ರದೇಶದಲ್ಲಿ ರೈತರು ಕೃಷಿ ಮಾಡುತ್ತಿದ್ದಾರೆ. ಒಂದು ವೇಳೆ ಕೆರೆಯ ಒಡ್ಡು ಒಡೆದರೆ ಕೃಷಿ ಚಟುವಟಿಕೆಗಳಿಗೆ ತೀವ್ರ ಹೊಡೆತ ಬೀಳಲಿದೆ. ಕೆರೆಯ ಕೆಳಭಾಗದ ಫಲವತ್ತಾದ ಜಮೀನುಗಳ ಮಣ್ಣು ಕೊಚ್ಚಿ ಹೋಗುವ ಆತಂಕವಿದೆ. ಅಲ್ಲದೆ ಕುಡಿಯುವ ನೀರಿಗೂ ತತ್ವಾರ ಉಂಟಾಗಲಿದೆ ಎಂಬ ಆಂತಕ ಎದುರಾಗಿದೆ.

ಈಗಲಾದರೂ ಸಂಬಂಧಪಟ್ಟ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಎಚ್ಚೆತ್ತು ಹಾಳಾಗಿರುವ ಹೂಡದಳ್ಳಿ ಕೆರೆಯ ರಕ್ಷಣೆ ಮುಂದಾಗಬೇಕಿದೆ ಎಂಬುದು ರೈತರು ಹಾಗೂ ಸಾರ್ವಜನಿಕರ ಒತ್ತಾಯವಾಗಿದೆ.

ಹೂಡದಳ್ಳಿ ಗ್ರಾಮದ ಕೆರೆಯ ಬಂಡ್​ 2021ರಲ್ಲಿ ಒಡೆದು ಸಂಪೂರ್ಣ ಖಾಲಿಯಾಗಿತ್ತು. ಅಲ್ಲದೆ ಸಾವಿರಾರು ರೈತರ ಜಮೀನಿನಲ್ಲಿನ ಫಲವತ್ತಾದ ಮಣ್ಣು ಕೊಚ್ಚಿ ಹೋಗಿ ಅಪಾರ ಪ್ರಮಾಣದ ಹಾನಿ ಸಂಭವಿಸಿತ್ತು. ಇದೀಗ ಅಂತಹದ್ದೇ ಸನ್ನಿವೇಶ ಎದುರಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಈಗಲೂ ಕೆರೆಯ ಒಡ್ಡಿನ ಕೆಳಭಾಗದಲ್ಲಿ ಸಣ್ಣದೊಂದು ರಂಧ್ರ ಬಿದ್ದಿದ್ದು, ಅದರಿಂದ ನಿತ್ಯವೂ ನೀರು ಹೋಗುತ್ತಿವೆ. ಭಾರೀ ಪ್ರಮಾಣದಲ್ಲಿ ಮಳೆಯಾದರೆ ನೀರಿನ ರಭಸಕ್ಕೆ ಒಡ್ಡು ಒಡೆದು ಹೋಗುವ ಭೀತಿ ಎದುರಾಗಿದೆ.

"

ಪ್ರತಿ ವರ್ಷ ಮಳೆಗಾಲದಲ್ಲಿ ಕೆರೆ ತುಂಬಿದಾಗ ನಮಗೆ ಸಂತೋಷವಾಗುತ್ತಿತ್ತು. ಆದರೆ ಈ ಬಾರಿ ಕೆರೆ ಏರಿಯಲ್ಲಿ ಕಂದಕ ಬಿದ್ದಿರುವುದು ನಮ್ಮ ನಿದ್ದೆಗೆಡಿಸಿದೆ. ಸಂಬಂಧಪಟ್ಟ ಅಧಿಕಾರಿಗಳು ಕೂಡಲೇ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಬೇಕು. ದುರಸ್ತಿ ಕಾರ್ಯ ಕೈಗೊಂಡು ಕೆರೆ ರಕ್ಷಣೆಗೆ ಮುಂದಾಗಬೇಕು.

— > ಮಲ್ಲಿಕಾರ್ಜುನ ಬಿರಾದಾರ, ರೈತ, ಹೂಡದಳ್ಳಿ

"

ಹೂಡದಳ್ಳಿ ಕೆರೆ ಏರಿ (ಬಂಡ) ಮೇಲೆ ಗಿಡಗಂಟಿಗಳು ಬೆಳೆದಿವೆ. ತೆರವು ಕಾರ್ಯ ಶೀಘ್ರವೇ ಮಾಡುತ್ತೇವೆ. ಏರಿ ಕೆಳಗೆ ಕಂದಕ ಬಿದ್ದಿರುವುದು ನನ್ನ ಗಮನಕ್ಕೆ ಬಂದಿಲ್ಲ. ಶೀಘ್ರವೇ ಭೇಟಿ ನೀಡಿ ಪರಿಶೀಲಿಸಿ ಕ್ರಮಕೈಗೊಳ್ಳಲಾಗುವುದು.

— > ಶಿವಾಜಿ ರಾಠೋಡ್​, ಅಭಿಯಂತ, ಸಣ್ಣನಿರಾವರಿ ಇಲಾಖೆ, ಚಿಂಚೋಳಿ