ಪಂಪ್​ಸೆಟ್​ಗೆ ಅಳವಡಿಸಿದ ವಿದ್ಯುತ್​ ತಂತಿ ಕಳವು

ಕೆಂಭಾವಿ: ಪಟ್ಟಣ ಸೇರಿ ವಲಯದ ಹಲವೆಡೆ ಮಳೆಗಾಲ ಆರಂಭವಾಗಿ ಮಳೆ ಬಾರದೆ ರೈತರು ಕಂಗಾಲಾಗಿದ್ದು ಇದರ ಬೆನ್ನಲ್ಲೆ ರೈತರ ಪಂಪ್​ಸೆಟ್​ ಅಳವಡಿಸಿದ ಬೆಲೆಬಾಳುವ ಮೋಟಾರ್​ ಮತ್ತು ಕೇಬಲ್​ ಕಳವು ಮಾಡುವ ಮೂಲಕ ರೈತರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ನಾರಾಯಣಪುರ ಎಡದಂಡೆ ಕಾಲುವೆ ಸೇರಿ ಇಲ್ಲಿಂದ ಭಾಗವಾಗಿರುವ ಐಬಿಸಿ, ಎಸ್​ಬಿಸಿ ಕಾಲುವೆಗಳ ಪಕ್ಕ ಮತ್ತು ತಮ್ಮ ಜಮೀನುಗಳ ಬಾವಿಗಳಲ್ಲಿ ಅಳವಡಿಸಿರುವ ಪಂಪ್​ಸೆಟ್​ನ ಮುಖ್ಯ ಕೇಬಲ್​ ಕಳುವು ಮಾಡುವ ಮೂಲಕ ಮಂಗಳವಾರ ಕಳ್ಳರು ತಮ್ಮ ಕೈ ಚಳಕ ತೋರಿಸಿದ್ದಾರೆ.

ಬೆಲೆ ಬಾಳುವ ತಾಮ್ರ ತಂತಿಯ ಆಸೆಗೆ ಬಿದ್ದಿರುವ ಕಳ್ಳರು ನೆಲದಲ್ಲಿ ತೋಡಿ ಅಳವಡಿಸಿರುವ ಕೇಬಲ್​ ಕಳುವು ಮಾಡಿದ್ದಾರೆ. ಒಂದೆರಾತ್ರಿ ಸುಮಾರು 10 ಕಿಮೀ ವರೆಗಿನ ಸುಮಾರು 20ಕ್ಕೂ ಹೆಚ್ಚು ವಿದ್ಯುತ್​ ಯಂತ್ರದ ಕೇಬಲ್​ ಕಳವು ಮಾಡಲಾಗಿದೆ. ಈ ಕುರಿತು ಪೊಲೀಸ್​ ಇಲಾಖೆಗೆ ಮೌಖಿಕವಾಗಿ ದೂರು ನೀಡಲಾಗಿದೆ ಎಂದು ರೈತರು ತಿಳಿಸಿದ್ದಾರೆ.

ಪ್ರತಿವರ್ಷ ನಡೆಯುವ ಈ ಕಳ್ಳತನ ದಂಧೆಗೆ ಕಡಿವಾಣ ಹಾಕಲು ಪೊಲೀಸ್​ ಇಲಾಖೆ ಮುಂದಾಗಬೇಕಿದ್ದು, ಮುಂಗಾರು ಕೈಕೊಟ್ಟಿರುವಾಗಲೇ ಅಲ್ಪ ನೀರು ಬಳಕೆಮಾಡಿಕೊಂಡು ಹತ್ತಿ ತೊಗರಿ ಬೆಳೆ ಬೆಳೆಯುವ ರೈತರಿಗೆ ಇಂಥ ಕಳ್ಳರ ಕಾಟ ಈಗ ಹೆಚ್ಚಾಗಿದೆ. ಹೀಗಾಗಿ ಕೂಡಲೇ ವಿಶೇಷ ತಂಡ ರಚಿಸಿ ಕಳ್ಳರನ್ನು ಮಟ್ಟ ಹಾಕುವಂತೆ ಈ ಭಾಗದ ಅನೇಕ ರೈತರು ಪೊಲೀಸ್​ ಇಲಾಖೆಗೆ ಮನವಿ ಮಾಡಿದ್ದಾರೆ.