ಶಾಲಾ ಹಂತದಲ್ಲಿ ಚುನಾವಣೆ ಅಗತ್ಯ

ಕೆಂಭಾವಿ: ಪ್ರೌಢಶಾಲಾ ಹಂತದಲ್ಲಿಯೇ ಮಕ್ಕಳಿಗೆ ಚುನಾವಣೆ ಮತ್ತು ಪ್ರಜಾಪ್ರಭುತ್ವದ ಬಗ್ಗೆ ಅರಿವು ಮೂಡಬೇಕಾದರೆ ಶಾಲಾ ಹಂತದಲ್ಲಿ ಅಣಕು ಚುನಾವಣೆ ನಡೆಸುವುದು ಅತ್ಯಂತ ಸೂಕ್ತ ಎಂದು ಮುಖ್ಯಗುರು ಡಿ.ಡಿ.ರಾಂಪೂರ ಹೇಳಿದರು.

ಮಾಲಗತ್ತಿ ಗ್ರಾಪಂ ವ್ಯಾಪ್ತಿಯ ಗೌಡಗೇರಿ ಗ್ರಾಮದ ಪಿಎಂಶ್ರೀ ಉನ್ನತಿಕರಿಸಿದ ಸರ್ಕಾರಿ ಪ್ರೌಢಶಾಲೆಯಲ್ಲಿ ಬುಧವಾರ ನಡೆದ ಶಾಲಾ ಸಂಸತ್​ ಚುನಾವಣೆಯ ಮೇಲುಸ್ತುವಾರಿ ವಹಿಸಿ ಮಾತನಾಡಿದ ಅವರು, ಪ್ರೌಢಶಾಲಾ ಹಂತ ಇದು ಮಕ್ಕಳ ಬುದ್ಧಿಮಟ್ಟ ಹೆಚ್ಚಿಸುವ ಮತ್ತು ಸಾಮಾನ್ಯ ಜ್ಞಾನ ಬೆಳೆಸುವ ಅತ್ಯಂತ ಶ್ರೇಷ್ಠ ಶಿಕ್ಷಣದ ಹಂತವಾಗಿದೆ. ಹೀಗಾಗಿ ನಮ್ಮ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಚುನಾವಣೆ ಅತ್ಯಂತ ಮಹತ್ವ ಸ್ಥಾನ ಪಡೆದಿದ್ದು, ಚುನಾವಣೆ ಕುರಿತು ಮಕ್ಕಳಲ್ಲಿ ಜಾಗೃತಿ ಮೂಡಿಸುವುದು ಶಾಲಾ ಸಂಸತ್​ನ ಮುಖ್ಯ ಉದ್ದೇಶವಾಗಿದೆ ಎಂದರು.

ನಂತರ ನಡೆದ ಚುನಾವಣೆಯಲ್ಲಿ ಒಟ್ಟು 14 ಸ್ಥಾನಗಳಿಗೆ 40 ಅಭ್ಯರ್ಥಿಗಳು ಸ್ಪರ್ಧಿಸಿದ್ದು, ಶಾಲೆಯ ಶಿಕ್ಷಕರು ಪ್ರತಿಯೊಂದು ಹಂತದ ಚುನಾವಣೆಯ ಪ್ರಕ್ರಿಯೆಯನ್ನು ಬ್ಯಾಲೆಟ್​ ಪೇಪರ್​ ಮೂಲಕ ವ್ಯವಸ್ಥಿತ ರೀತಿಯಲ್ಲಿ ನಡೆಸಿ, 14 ಜನ ವಿದ್ಯಾರ್ಥಿಗಳನ್ನು ಶಾಲಾ ಸಂಸತ್​ಗೆ ಆಯ್ಕೆ ಮಾಡಿದರು. 10ನೇ ತರಗತಿ ಪ್ರಭುಗೌಡ ಶಾಲಾ ಮುಖ್ಯಮಂತ್ರಿಯಾಗಿ, ಸಿದ್ದಮ್ಮ ಉಪ ಮುಖ್ಯಮಂತ್ರಿಯಾಗಿ ಆಯ್ಕೆಯಾದರು. ಉಳಿದಂತೆ ಅಶ್ವಿನಿ, ದೇವಮ್ಮ, ಶ್ರೀನಿಧಿ, ಭಾಗ್ಯಶ್ರೀ, ಹಣಮಂತ, ಕುಮಾರಗೌಡ, ವಿಜಯ, ರತ್ಮಮ್ಮ, ಅಭಿಷೇಕ, ರೇಣುಕಾ, ಶ್ರೀದೇವಿ ಶಾಲಾ ಸಂಸತ್​ನ ಮಂತ್ರಿಮಂಡಲದ ಸದಸ್ಯರಾಗಿ ಆಯ್ಕೆಯಾದರು.

ಶಿಕ್ಷಕರಾದ ಬಿ.ಎಸ್​.ದೇಸಾಯಿ, ನಿಂಗಣ್ಣ ಬಿರಾದಾರ, ಮಾಂತಗೌಡ ಬಿರಾದಾರ, ಶಿವಾನಂದ, ಹಣಮಂತಿ, ಹಳ್ಳೇರಾವ ಕುಲಕರ್ಣಿ ಚುನಾವಣೆಯ ವಿವಿಧ ಅಧಿಕಾರಿಗಳಾಗಿ ಕಾರ್ಯನಿರ್ವಹಿಸಿದರು.