ಭ್ರೂಣ ಹತ್ಯೆ ತಡೆಗೆ ಶಿಕ್ಷಣ ಅಗತ್ಯ

ಯಾದಗಿರಿ: ಜಿಲ್ಲೆಯಲ್ಲಿ ಭ್ರೂಣ ಹತ್ಯೆ ತಡೆಯಲು ಮಹಿಳೆಯರಿಗೆ ಕಡ್ಡಾಯವಾಗಿ ಶಿಕ್ಷಣದ ಅಗತ್ಯವಿದೆ ಎಂದು ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಹಾಗೂ ಜಿಲ್ಲಾ ನ್ಯಾಯಾಲಯದ ಹಿರಿಯ ಶ್ರೇಣಿ ನ್ಯಾಯಾಧೀಶ ಮರಿಯಪ್ಪ ಹೇಳಿದರು.

ನಾಯ್ಕಲ್​ ಗ್ರಾಪಂ ಆವರಣದಲ್ಲಿ ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರ, ಜಿಲ್ಲಾಡಳಿತ, ಜಿಪಂ, ಜಿಲ್ಲಾ ಪೊಲೀಸ್​ ಇಲಾಖೆ, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ಶಿಕ್ಷಣ ಇಲಾಖೆ ಮತ್ತು ಗ್ರಾಪಂನಿಂದ ಮಂಗಳವಾರ ಹಮ್ಮಿಕೊಂಡ ಕಾನೂನು ನೆರವು ಅರಿವು ಜನ ಜಾಗೃತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಜಿಲ್ಲೆಯಲ್ಲಿ ಭ್ರೂಣ ಹತ್ಯೆ ಪ್ರಕರಣ ಹೆಚ್ಚು ಕಂಡು ಬಂದಿದ್ದು, ಇದು ಆತಂಕಕಾರಿ ಬೆಳವಣಿಯಾಗಿದೆ. ಅಲ್ಲದೆ ಜಿಲ್ಲೆಯಾದ್ಯಂತ ಬಾಲ್ಯವಿವಾಹ ಪ್ರಕರಣಗಳು ಹೆಚ್ಚಳವಾಗಿವೆ. ಹೀಗಾಗಿ ಸೂಕ್ತ ಕಾನೂನು ನೆರವಿನ ಅಗತ್ಯವಿದೆ. ಅದಕ್ಕಾಗಿ ಸಂಬಂಧಿಸಿದವರು ಜಾಗೃತಿ ಮೂಡಿಸಬೇಕು ಎಂದು ಅಧಿಕಾರಿಗಳಿಗೆ ಸೂಚಿಸಿದರು.

ಬಾಲ್ಯ ವಿವಾಹಗಳು ನಡೆದರೆ ಕಾನೂನು ಪ್ರಕಾರ ಕಠಿಣ ಶಿಕ್ಷೆ ಅನುಭವಿಸಬೇಕಾಗುತ್ತದೆ. ಅಲ್ಲದೆ ಫೋಕ್ಸೋ ಪ್ರಕರಣ ದಾಖಾಲಿಸಲಾಗುತ್ತೆದೆ. ಬಾಲಕ-ಬಾಲಕಿಯರನ್ನು ಕಡ್ಡಾಯವಾಗಿ ಶಾಲೆಗೆ ಕಳುಹಿಸಿ ಶಿಕ್ಷಣವಂತರಾಗಿ ಮಾಡಬೇಕೆಂದು ಪಾಲಕರಿಗೆ ಮತ್ತು ಇತರರಿಗೆ ತಿಳಿ ಹೇಳಿದರು.

ಸಂಪನ್ನೂಲ ವ್ಯಕ್ತಿ ಹಾಗೂ ನ್ಯಾಯವಾದಿ ಬಿ.ಜಿ.ಪಾಟೀಲ್​ ಮಾತನಾಡಿ, ಸಾರ್ವಜನಿಕರು ಯಾವುದೇ ಕಾರಣ ಕಾನೂನು ಮೀರಿ ಕೆಲಸ ಕಾರ್ಯ ಮಾಡಬಾರದು. ಕಾನೂನಿನ ಚೌಕಟ್ಟಿನಲ್ಲಿ ಕೆಲಸ ಮಾಡಬೇಕು. ಬಿಎನ್​ಎಸ್​ ಕಾಯ್ದೆ ಅನ್ವಯವಾಗುತ್ತದೆ ಎಂದರು.

ಕಾನೂನು ಪ್ರಾಧಿಕಾರದ ಡಿಎಲ್​ಎಸ್​ ಹಣಮಂತ, ಗ್ರಾಪಂ ಪಿಡಿಒ ಚನ್ನಪ್ಪ ಕೆ.ಅರಕೇರಾ ಅಧ್ಯಕ್ಷತೆ ವಹಿಸಿದ್ದರು. ಕಾರ್ಯಕ್ರಮದಲ್ಲಿ ಗ್ರಾಪಂ ಕಾರ್ಯದರ್ಶಿ ರೇವಣಸಿದ್ದಪ್ಪ, ನ್ಯಾಯವಾದಿ ಸುಷ್ಮಾ ಡಿ.ಜಾಧವ್​, ಒಕ್ಕೂಟದ ಅಧ್ಯೆ ಸಂಗಮ್ಮ, ಎಂ.ಬಿ.ಕೆ ಚಂದ್ರಕಲಾ, ಆಸ್ಮಾ, ರಾಜೇಶ್ವರಿ, ವೆಂಕಟೇಶ ನಾಯ್ಕಲ್​, ಪರಶುರಾಮ ಖಾನಾಪುರ, ಅಯ್ಯಣ್ಣ ಗುತ್ತೇದಾರ್​, ಭೀಮಾಶಂಕರ, ಅಂಗನವಾಡಿ ಶಿಕ್ಷಕಿ ಚಂದಮ್ಮ, ಪಶು ಸಕಿ ತಾಯಮ್ಮ, ನಾರಿ ಸಕಿ ಗುರಲಿಂಗಮ್ಮ, ಸಿದ್ದಮ್ಮ ಹೊಸಮನಿ, ಮಲ್ಲಮ್ಮ, ಬಸ್ಸಮ್ಮ ಬೆಳೆನೋರ್​, ಭೀಮಮ್ಮ, ಖಾಜಾಬೀ ಗೊಡೆಕಾರ್​, ಜುಲೇಖಾ ಸೇರಿ ಅನೇಕರು ಭಾಗವಹಿಸಿದ್ದರು. ಅಲ್ಲದೆ ಗ್ರಾಮದ ವಿವಿಧ ಸಂಘ-ಸಂಸ್ಥೆ, ಸ್ತ್ರೀ ಶಕ್ತಿ ಮಹಿಳಾ ಗುಂಪುಗಳ ಸದಸ್ಯರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಪರಶುರಾಮ ಖಾನಾಪುರ ಸ್ವಾಗತಿಸಿದರು. ವೆಂಕಟೇಶ ಕಟ್ಟಿಮನಿ ನಿರೂಪಿಸಿ, ವಂದಿಸಿದರು.