ಸಂಪಾದಕೀಯ: ಡ್ರಗ್ಸ್​ ಫ್ಯಾಕ್ಟರಿ ಆತಂಕಕಾರಿ

ಈ ಹಿಂದೆ ವಿದೇಶಗಳಿಂದ ಅಥವಾ ಬೇರೆ ರಾಜ್ಯಗಳಿಂದ ಡ್ರಗ್ಸ್​ ಬೆಂಗಳೂರಿಗೆ ಸರಬರಾಜಾಗುತ್ತಿತ್ತು. ಆದರೆ ಈಗ, ನಗರದೊಳಗಿನ ವಸತಿ ಪ್ರದೇಶಗಳಲ್ಲಿಯೇ ರಾಸಾಯನಿಕಗಳನ್ನು ಬಳಸಿ ಸಿಂಥೆಟಿಕ್​ ಡ್ರಗ್ಸ್​ ತಯಾರಿಸುತ್ತಿರುವುದು ಬೆಳಕಿಗೆ ಬಂದಿದೆ. ಈ ಹಿಂದೆ 2020 ಮತ್ತು 2021ರಲ್ಲಿ ಕೂಡ ಎಲೆಕ್ಟ್ರಾನಿಕ್​ ಸಿಟಿ ಮತ್ತು ಜಿಗಣಿಯಲ್ಲಿ ಮಿನಿ ಡ್ರಗ್​ ಫ್ಯಾಕ್ಟರಿಗಳು ಪತ್ತೆಯಾಗಿದ್ದವು. ವಿದೇಶಿ ಪ್ರಜೆಗಳು ಅಡುಗೆ ಮನೆಯಲ್ಲಿಯೇ ಡ್ರಗ್ಸ್​ ತಯಾರಿಸುತ್ತಿದ್ದ ಪ್ರಕರಣಗಳು ವರದಿಯಾಗಿದ್ದವು.

ಈಗ ಪತ್ತೆಯಾಗಿರುವ ಘಟಕಗಳು ಈ ಜಾಲ ಎಷ್ಟು ಆಳವಾಗಿ ಬೇರೂರಿದೆ ಎಂಬುದಕ್ಕೆ ಸಾಕ್ಷಿಯಾಗಿವೆ. ಆರೋಪಿಗಳು ಜನನಿಬಿಡ ವಸತಿ ಪ್ರದೇಶಗಳನ್ನೇ ತಮ್ಮ ಕೃತ್ಯಕ್ಕೆ ಅಡಗುದಾಣ ಮಾಡಿಕೊಳ್ಳುತ್ತಿದ್ದಾರೆ. ಮನೆ ಮಾಲೀಕರು ಹೆಚ್ಚಿನ ಬಾಡಿಗೆಯ ಆಸೆಗೆ ಬಿದ್ದು, ಬಾಡಿಗೆದಾರರ ಹಿನ್ನೆಲೆ ಅಥವಾ ದಾಖಲೆಗಳನ್ನು ಪರಿಶೀಲಿಸದೆ ಮನೆಗಳನ್ನು ನೀಡುತ್ತಿರುವುದು ಈ ಜಾಲ ಬೆಳೆಯಲು ಪರೋಕ್ಷವಾಗಿ ಸಹಕಾರಿಯಾಗಿದೆ. ಡ್ರಗ್ಸ್​ ತಯಾರಿಸುತ್ತಿದ್ದವರ ಚಲನವಲನಗಳನ್ನು ನೆರೆಹೊರೆಯವರು ಗಮನಿಸದಿರುವುದು ಅಥವಾ ದೂರು ನೀಡದಿರುವುದು ಅಪರಾಧಿಗಳಿಗೆ ವರದಾನವಾಗಿದೆ.

ಡ್ರಗ್ಸ್​ ಎಂಬ ವಿಷ ಅದನ್ನು ಸೇವಿಸುವ ವ್ಯಕ್ತಿಯನ್ನಷ್ಟೇ ಅಲ್ಲ, ಇಡೀ ಸಮಾಜವನ್ನೇ ನಾಶಪಡಿಸುತ್ತದೆ. ಸಿಂಥೆಟಿಕ್​ ಡ್ರಗ್​ಗಳಾದ ಎಂಡಿಎಂಎ ಅಥವಾ ಮೆಫೆಡ್ರೋನ್​ ಸೇವನೆಯಿಂದ ಮಿದುಳಿನ ಮೇಲೆ ದುಷ್ಪರಿಣಾಮ ಆಗುತ್ತದೆ. ಕಿಡ್ನಿ ವೈಫಲ್ಯ, ಹೃದಯಾಘಾತ, ಮಾನಸಿಕ ಅಸ್ವಸ್ಥತೆಯಂತಹ ಗಂಭೀರ ಆರೋಗ್ಯ ಸಮಸ್ಯೆಗಳು ಕಾಡುತ್ತವೆ. ಬದುಕು ಹಳಿ ತಪ್ಪುತ್ತದೆ. ಸಮಾಜದಲ್ಲಿ ಅಪರಾಧಗಳು ಹೆಚ್ಚಾಗುವುದಕ್ಕೂ ಇದು ಪರೋಕ್ಷವಾಗಿ ಕಾರಣವಾಗುತ್ತದೆ. ಹೊಸ ವರ್ಷಾಚರಣೆ ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ ಡ್ರಗ್ಸ್​ ತಯಾರಿಕಾ ಘಟಕಗಳ ಮೇಲೆ ದಾಳಿ ನಡೆದಿರುವುದು ಶ್ಲಾಘನೀಯ. ಪಾರ್ಟಿಗಳಲ್ಲಿ ಯುವಜನರಿಗೆ ಹಂಚಲು ಸಿದ್ಧವಾಗುತ್ತಿದ್ದ ಕೋಟ್ಯಂತರ ರೂ. ಮೌಲ್ಯದ ಮಾದಕ ದ್ರವ್ಯಗಳನ್ನು ಜಪ್ತಿ ಮಾಡುವ ಮೂಲಕ ಪೊಲೀಸರು ಅನಾಹುತವನ್ನು ತಪ್ಪಿಸಿದ್ದಾರೆ.

ಪೊಲೀಸ್​ ಇಲಾಖೆ ಕೇವಲ ಪೆಡ್ಲರ್​ಗಳನ್ನು ಬಂಧಿಸಿ ಕೈತೊಳೆದುಕೊಳ್ಳಬಾರದು. ಬದಲಿಗೆ, ಈ ಡ್ರಗ್ಸ್​ ಫ್ಯಾಕ್ಟರಿಗಳ ಮೂಲವನ್ನು ಪತ್ತೆ ಹಚ್ಚಬೇಕು. ಮನೆ ಮಾಲೀಕರು ಬಾಡಿಗೆಗೆ ನೀಡುವ ಮುನ್ನ ಕಡ್ಡಾಯವಾಗಿ ಹಿನ್ನೆಲೆ ಪರಿಶೀಲಿಸಬೇಕು. ಸಾರ್ವಜನಿಕರು ಕೂಡ ತಮ್ಮ ಸುತ್ತಮುತ್ತ ನಡೆಯುವ ಸಂಶಯಾಸ್ಪದ ಚಟುವಟಿಕೆಗಳ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಬೇಕು. ಡ್ರಗ್ಸ್​ ಹಾವಳಿ ನಿಯಂತ್ರಿಸಲು ಸರ್ಕಾರ, ಪೊಲೀಸರು ಮತ್ತು ನಾಗರಿಕರು ಜಂಟಿಯಾಗಿ ಕೆಲಸ ಮಾಡಬೇಕಾದ ಅನಿವಾರ್ಯತೆ ಇದೆ.