ಅತಿಯಾದ ರಾಸಾಯನಿಕ ಗೊಬ್ಬರ ಬಳಸಬೇಡಿ

ಗುರುಮಠಕಲ್​: ಇನ್ನೇನು ಮುಂಗಾರು ಆರಂಭವಾಗಲಿದ್ದು, ರೈತರು ಅತಿಯಾದ ರಾಸಾಯನಿಕ ಗೊಬ್ಬರ ಬಳಸಬೇಡಿ. ಕಾಲಕ್ಕೆ ತಕ್ಕಂತೆ ಕೃಷಿ ಇಲಾಖೆಯ ಸಲಹೆ ಪಡೆದು ಬೆಳೆ ಬೆಳೆಯಬೇಕು ಎಂದು ಶಾಸಕ ಶರಣಗೌಡ ಕಂದಕೂರ ಹೇಳಿದರು.

ಪಟ್ಟಣದ ರೈತ ಸಂಪರ್ಕ ಕೇಂದ್ರದಲ್ಲಿ ಕೊಂಕಲ್​,ಯರಗೋಲ, ಸೈದಾಪುರ ಮತ್ತು ಗುರುಮಠಕಲ್​ ವಲಯಗಳ ರಸಗೊಬ್ಬರ ಮಾರಟಗಾರರನ್ನು ಕರೆಸಿ, ಮುಂಗಾರು ಬೀಜ ವಿತರಣೆ ಹಾಗೂ ರಾಯಚೂರಿನ ಕೃಷಿ ವಿಶ್ವವಿದ್ಯಾಲಯ ಹಾಗೂ ಯಾದಗಿರಿ ಕೃಷಿ ಇಲಾಖೆ ಸಂಯುಕ್ತಶ್ರಯದಲ್ಲಿ ಆಯೋಜಿಸಿದ ಕೃಷಿ ರಾಸಾಯನಿಕಗಳ ಸಮರ್ಪಕ ಬಳಕೆ ಬಗ್ಗೆ ಒಂದು ದಿನದ ತರಬೇತಿ ಕಾರ್ಯಕ್ರಮದ ಭಿತ್ತಿಪತ್ರವನ್ನು ಬಿಡುಗಡೆ ಮಾಡಿ ಅವರು ಮಾತನಾಡಿದರು.

ಮುಂಗಾರು ಬಿತ್ತನೆ ವೇಳೆ ರೈತರಿಗೆ ಅತೀಯಾದ ರಸಗೊಬ್ಬರ ಬಳಸದಿರಲು ಜಾಗೃತಿ ಮೂಡಿಸಿ ಮತ್ತು ಮಾರಾಟಗಾರರು ನಕಲಿ ಹತ್ತಿ ಬೀಜ ಮಾರಾಟ ಮಾಡದಂತೆ ಎಚ್ಚರ ವಹಿಸಬೇಕು. ಅಲ್ಲದೆ ಕೃಷಿ ಇಲಾಖೆ ಅಧಿಕಾರಿಗಳು ಸಹ ಇದನ್ನು ಗಮನಿಸಬೇಕು ಎಂದು ಎಚ್ಚರಿಕೆ ನೀಡಿದರು.

ರಸಗೊಬ್ಬರ ಅಂಗಡಿ ಮಾರಟಗಾರರು ತಮ್ಮ ಲಾಭಕ್ಕಾಗಿ ರೈತರನ್ನು ಬಲಿ ಪಡೆಯಬೇಡಿ. ಕೃಷಿ ಇಲಾಖೆಗಳ ನಿಯಮದಂತೆ ಮಾರಾಟ ಮಾಡಿ, ರೈತರು ಬಲಿಯಾದರೆ, ಅವರು ಬಿತ್ತುವ ಬೆಳೆಯಿಂದ ನಾವೇಲ್ಲರೂ ಬಲಿಯಾಗುತ್ತೇವೆ, ರಾಸಾಯನಿಕ ವಸ್ತುಗಳ ಅತಿಯಾದ ಬಳಕೆಯಿಂದ ಮತೆತ್ರದ ಜನರ ಆರೋಗ್ಯದ ಮೇಲೆ ದುಷ್ಪರಿಣಾಮಗಳು ಬೀರುತ್ತದೆ. ರಾಜ್ಯದಲ್ಲಿ ವಿಜಯಪುರ ಮತ್ತು ಯಾದಗಿರಿ ಜಿಲ್ಲೆಯ ಜನರು ಹೆಚ್ಚಾಗಿ ಕ್ಯಾನ್ಸರ್​,ಪಾರ್ಶ್ವವಾಯು, ಶುಗರ್​, ಬಿಪಿ, ಕಿಡ್ನಿ ವೈಪಲ್ಯ ಸೇರಿ ಇತರೆ ರೋಗಗಳಿಗೆ ತುತ್ತಾಗುತ್ತಿರುವ ವರದಿ ಬಂದಿದೆ. ಇದರಿಂದ ನಮ್ಮ ಪೀಳಿಗೆಯ ಆರೋಗ್ಯವನ್ನು ನಾವು ಕಾಪಾಡಿಕೊಳ್ಳಬೇಕು ಎಂಬ ನಿಟ್ಟಿನಲ್ಲಿ ನನ್ನಿಂದಲೇ ಈ ಕ್ರಾಂತಿ ಆರಂಭವಾಗಲಿ ಎಂಬ ಉದ್ದೇಶದಿಂದ ರಸಗೊಬ್ಬರ ಮಾರಾಟಗಾರರ ಜತೆಗೆ ಮಾತನಾಡುತ್ತಿದ್ದೇನೆ ಎಂದು ಅವರು ಹೇಳಿದರು.

ಬೀದಿಯಲ್ಲಿ ಚಹಾ ಅಂಗಡಿ, ಹಣ್ಣಿನ ಅಂಗಡಿ, ಚೈನೀಸ್​ ಪುಡ್​ ಹಾಗೂ ಡಾಬಾಗಳಲ್ಲಿ ಅತೀಯಾದ ರಾಸಾಯನಿಕ ಮತ್ತು ಪ್ಲಾಸ್ಟಿಕ್​ ಬಳಕೆಯಿಂದ ಜನರ ಅರೋಗ್ಯ ಹದಗೇಡುತ್ತಿದೆ, ಅಧಿಕಾರಿಗಳು ಕಡ್ಡಾಯವಾಗಿ ಈ ಕಡೆ ಪರಿಶೀಲಿಸಬೇಕು ಎಂದು ತಾಕೀತು ಮಾಡಿದರು. ಈ ವೇಳೆ ರಾಯಚೂರು ವಿಶ್ವವಿದ್ಯಾಲಯದ ಡೀನ್​ ಎ.ಜಿ.ಶ್ರೀನಿವಾಸ ಉಪನ್ಯಾಸ ನೀಡಿದರು. ಯಾದಗಿರಿ ಕೃಷಿ ಇಲಾಖೆ ಸಹಾಯಕ ಆಯುಕ್ತರು ಸುರೇಶ ಪ್ರಸ್ತಾವಿಕ ಮಾತನಾಡಿದರು. ಯುಬ್​ ಅಹಮದ್​, ಶಿವುಕುಮಾರ ರೆಡ್ಡಿ, ಐಲ್​ರೆಡ್ಡಿ, ಮಲ್ಲಿಕಾರ್ಜುನ ವಾರದ, ಗೌರೀಶ ಗುಮಡಾಲ್​, ಪ್ರಕಾಶ ಗುಮಡಾಲ್​, ವೆಂಕಟೇಶ, ನಾರಾಯಣರೆಡ್ಡಿ, ರವಿ ಹಜಾರೆ, ಲ್ಮ ನಾರಾಯಣರಡ್ಡಿ ಇತರರಿದ್ದರು.