ಚಿತ್ತಾಪುರ: ಪಟ್ಟಣದಲ್ಲಿನ ಸರ್ವೇ ನಂ. 112/2 ಹಾಗೂ 113ರಲ್ಲಿರುವ ಹಳೆಯ ಕೈಗಾರಿಕಾ ವಸಾಹತು ಪ್ರದೇಶ ಅಭಿವೃದ್ದಿಗೊಳಿಸಲು ಮುಂದಾಗಬೇಕು ಎಂದು ಸಣ್ಣ ಕೈಗಾರಿಕೆಗಳ ಸಂಘ (ಸಿಟಿಎಸ್ಎಸ್ಐಎ)ದ ತಾಲೂಕು ಅಧ್ಯಕ್ಷ ಸೈಯದ್ ನಿಜಾಮುದ್ದಿನ್ ಚಿಸ್ತಿ ಒತ್ತಾಯಿಸಿದರು. ಕೈಗಾರಿಕಾ ವಸಾಹತು ಪ್ರದೇಶಕ್ಕೆ ಶನಿವಾರ ಭೇಟಿ ನೀಡಿ ಕೆಎಸ್ಎಸ್ಐಡಿಸಿ ಸಹಾಯಕ ಮಹಾಪ್ರಬಂಧಕ ಮಲ್ಲಿಕಾರ್ಜುನ ಜಾಕಾ ಅವರಿಗೆ ಮನವಿಪತ್ರ ಸಲ್ಲಿಸಿ, ಒಳರಸ್ತೆಗಳ ಅಭಿವೃದ್ಧಿ, ಒಳಚರಂಡಿ ಹಾಗೂ ಮಳೆನೀರು ಹರಿಸುವ ಚರಂಡಿ ವ್ಯವಸ್ಥೆ ಕಲ್ಪಿಸಬೇಕು. ನೀರಿನ ಸರಬರಾಜು ಪೈಪ್ಲೈನ್, ಕಾಂಪೌಂಡ್ ಗೋಡೆ ನಿರ್ಮಾಣ ಹಾಗೂ ಬೀದಿ ದೀಪಗಳ ಅಳವಡಿಸಬೇಕು. ಬಾಕಿಯಿರುವ ಮಾರಾಟ ಪತ್ರಗಳ ನೋಂದಣಿ, ಕೈಗಾರಿಕಾ ವಸಾಹತು ನಿರ್ವಹಣೆಯನ್ನು ಚಿತ್ತಾಪುರ ಪುರಸಭೆಗೆ ಹಸ್ತಾಂತರಿಸಬೇಕು. ಅರ್ಹ ಕೈಗಾರಿಕಾ ನಿವೇಶನ ಹಂಚಿಕೆದಾರರಿಗೆ ಖಾತೆ ಉತಾರ ನೀಡಬೇಕು ಎಂದು ಕೋರಿದರು. ಉಪಾಧ್ಯಕ್ಷ ಶರಣರೆಡ್ಡಿ ಇಜಾರ್, ಕಾರ್ಯದರ್ಶಿ ಅಬ್ದುಲ್ ಬಾಸಿತ್, ಪ್ರಮುಖರಾದ ಮುಕ್ತಾರ್ ಪಟೇಲ್, ಎಂ.ಎ.ರಶೀದ್, ರುನಾಥ್ ರೆಡ್ಡಿ, ಶಿವು ಚೌಧರಿ, ತಯ್ಯಬ್ ಇತರರಿದ್ದರು.
