ಗಾಣಗಾಪುರ ಘತ್ತರಗಾ ಕ್ಷೇತ್ರ ಅಭಿವೃದ್ಧಿಪಡಿಸಿ

ಅಫಜಲಪುರ: ದೇವಲಗಾಣಗಾಪುರದ ದತ್ತಾತ್ರೇಯ ಮಹಾರಾಜ ದೇಗುಲ ಹಾಗೂ ಘತ್ತರಗಾದ ಭಾಗ್ಯವಂತಿ ದೇವಿ ಸೇರಿ ಮತಕ್ಷೇತ್ರದ ಪವಿತ್ರ ತೀರ್ಥಕ್ಷೇತ್ರಗಳಲ್ಲಿ ಮೂಲಸೌಕರ್ಯ ಅಭಿವೃದ್ಧಿಪಡಿಸುವ ಕುರಿತು ಕೇಂದ್ರದ ಪ್ರವಾಸೋದ್ಯಮ ಇಲಾಖೆ ಕಾರ್ಯದರ್ಶಿ ಭುವನೇಶ ಕುಮಾರ್​ ಜತೆ ನವದೆಹಲಿಯಲ್ಲಿ ಚರ್ಚಿಸಲಾಗಿದೆ ಎಂದು ಶಾಸಕ ಎಂ.ವೈ. ಪಾಟೀಲ್​ ತಿಳಿಸಿದ್ದಾರೆ.

ಗಾಣಗಾಪುರ ಮತ್ತು ತ್ತರಗಾ ಕ್ಷೇತ್ರಗಳು ರಾಷ್ಟ್ರ ಮಟ್ಟದಲ್ಲಿ ಹೆಸರುವಾಸಿಯಾಗಿದ್ದು, ಅಭಿವೃದ್ಧಿಪಡಿಸಿದರೆ ಸ್ಥಳಿಯ ಪ್ರವಾಸೋದ್ಯಮಕ್ಕೆ ಉತ್ತೇಜನ ದೊರೆತು ಉದ್ಯೋಗಾವಕಾಶ ಹೆಚ್ಚುವುದರ ಜತೆಗೆ ಪ್ರದೇಶದ ಆರ್ಥಿಕ ಹಾಗೂ ಸಾಮಾಜಿಕ ಪ್ರಗತಿಗೂ ಪೂರಕವಾಗಲಿದೆ ಎಂದು ಮನವರಿಕೆ ಮಾಡಿಕೊಡಲಾಗಿದೆ ಎಂದು ಅವರು ಪ್ರಕಟಣೆಯಲ್ಲಿ ಹೇಳಿದ್ದಾರೆ.

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯದ ಕಾರ್ಯದರ್ಶಿ ವಿ.ಉಮಾಶಂಕರ್​ ಅವರನ್ನು ಸಹ ಭೇಟಿಯಾಗಿ ಚೌಡಾಪುರದಿಂದ ದೇವಲ ಗಾಣಗಾಪುರಕ್ಕೆ ಚೆನ್ನೆ&ಸೂರತ್​ ಆರ್ಥಿಕ ಕಾರಿಡಾರ್​ಗೆ ಸಂಪರ್ಕ ಕಲ್ಪಿಸುವ ರಸ್ತೆ ನಿಮಾರ್ಣ ಹಾಗೂ ಕಲಬುರಗಿಯಿಂದ ಅತನೂರ (ಚೆನ್ನೆ&ಸೂರತ್​ ಎಕ್ಸ್​ಪ್ರೆಸ್​ವೇ ಜಂಕ್ಷನ್​)ವರೆಗೆ ರಾಷ್ಟ್ರೀಯ ಹೆದ್ದಾರಿ -150ಇ ಅನ್ನು ಚತುಷ್ಪಥ ಹೆದ್ದಾರಿಯಾಗಿ ಅಭಿವೃದ್ಧಿಪಡಿಸುವ ಕುರಿತು ಸಮಾಲೋಚನೆ ನಡೆಸಲಾಗಿದೆ. ಮಹಾರಾಷ್ಟ್ರ ಗಡಿಯ ಮುರುಮ್​ನಿಂದ ವಿಜಯಪುರ ಜಂಕ್ಷನ್​ವರೆಗೆ ದ್ವಿಪಥ ರಸ್ತೆ ಅಗಲೀಕರಣ ಹಾಗೂ ಸಮಗ್ರ ಸುಧಾರಣಾ ಕಾಮಗಾರಿ ಶೀಘ್ರ ಕೈಗೆತ್ತಿಕೊಳ್ಳಬೇಕು ಎಂದು ಮನವಿ ಮಾಡಲಾಗಿದೆ ಎಂದು ತಿಳಿಸಿದ್ದಾರೆ.

ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮ ಅಧ್ಯಕ್ಷ ಅರುಣಕುಮಾರ ಪಾಟೀಲ್​, ಕಲಬುರಗಿ&ಬೀದರ್​&ಯಾದಗಿರಿ ಹಾಲು ಒಕ್ಕೂಟದ ಅಧ್ಯಕ್ಷ ಆರ್​.ಕೆ. ಪಾಟೀಲ್​ ಇದ್ದರು.

"

ಕೇಂದ್ರದ ಪಿಎಂ ಇ ಡ್ರೆವ್​ ಯೋಜನೆ ಅಡಿ ಮಂಜೂರಾಗಿರುವ ವಿದ್ಯುತ್​ಚಾಲಿತ ಬಸ್​ಗಳ ಜತೆ ಹೆಚ್ಚುವರಿ ಇ-ಬಸ್​ಗಳನ್ನು ನೀಡಬೇಕು. ಇದರಿಂದ ಪರಿಸರಸ್ನೇಹಿ ಸಾರ್ವಜನಿಕ ಸಾರಿಗೆ ಮೂಲಕ ಪ್ರಯಾಣಿಕರಿಗೆ ಗುಣಮಟ್ಟದ ಸೇವೆ ಒದಗಿಸಲು ಅನುಕೂಲವಾಗಲಿದೆ ಎಂದು ಕೇಂದ್ರ ಹೆದ್ದಾರಿ ಕಾರ್ಯದರ್ಶಿ ವಿ.ಉಮಾಶಂಕರ್​ ಅವರಿಗೆ ಮನವಿ ಸಲ್ಲಿಸಲಾಗಿದೆ.

— > ಅರುಣಕುಮಾರ ಪಾಟೀಲ್​ ಕೆಕೆಆರ್​ಟಿಸಿ ಅಧ್ಯಕ್ಷ