ಓಪನ್ ಟೆರೇಸ್‌ನತ್ತ ನಗರದ ಜನರ ಚಿತ್ತ!

ಐಷಾರಾಮಿ ಮನೆ ಖರೀದಿಸುವ ಅಥವಾ ನಿರ್ಮಿಸುವ ಮಂದಿ ಓಪನ್ ಟೆರೇಸ್‌ನತ್ತ ಆಸಕ್ತಿ ತೋರುತ್ತಿದ್ದಾರೆ. ಸೂಪರ್ ಸೈಜ್ ಟೆರೇಸ್ ಮತ್ತು ಓಪನ್ ಸ್ಪೆಸ್ ಟೆರೇಸ್ ಈಗ ಹೆಚ್ಚು ಜನಪ್ರಿಯವಾಗುತ್ತಿದೆ. ಅಪಾರ್ಟ್‌ಮೆಂಟ್‌ಗಳಲ್ಲೂ ಈಗ ಓಪನ್ ಸ್ಪೆಸ್ ಅಥವಾ ಸಿಟ್‌ಔಟ್ ಸ್ಪೆಸ್ ಇತ್ತೀಚಿನ ಟ್ರೆಂಡ್ ಆಗಿದೆ.

ಬೆಂಗಳೂರು ಸೇರಿ ನಗರ ಪ್ರದೇಶಗಳಲ್ಲಿ ನಿರ್ಮಾಣವಾಗುತ್ತಿರುವ ದೊಡ್ಡ ದೊಡ್ಡ ಮನೆ (ಬಂಗಲೆ) ಹಾಗೂ ಅಪಾರ್ಟ್‌ಮೆಂಟ್‌ಗಳಲ್ಲಿ ಓಪನ್ ಟೆರೇಸ್‌ಗೆ ಬೇಡಿಕೆ ಹೆಚ್ಚಿದೆ. ಬಂಗಲೆಗಳಲ್ಲಿ ಅದರ ಆಕಾರಕ್ಕೆ ಅನುಗುಣವಾಗಿ ಓಪನ್ ಟೆರೇಸ್ ನಿರ್ಮಿಸಿದರೆ. ಹಸಿರು ವಲಯದಲ್ಲಿ ತಲೆ ಎತ್ತಲಿರುವ ಅಪಾರ್ಟ್‌ಮೆಂಟ್‌ಗಳಲ್ಲೂ ಒಂದು ಸಾವಿರದಿಂದ 500 ಚದರ ಅಡಿಯಷ್ಟು ವಿಸ್ತೀರ್ಣದಲ್ಲಿ ಓಪನ್ ಟೆರೇಸ್ ನಿರ್ಮಿಸಲಾಗುತ್ತಿದೆ.

ಇಷ್ಟೇ ಅಲ್ಲದೆ, ಈ ಸ್ಥಳದಲ್ಲಿ ನಿಂತು ಬೆಳಗಿನ ಸೂರ್ಯೋದಯ, ಸಂಜೆಯ ಸೂರ್ಯಾಸ್ತಮದ ಸಮಯದಲ್ಲಿ ಪ್ರಕೃತಿಯ ಸೊಬಗನ್ನು ಕಣ್ತುಂಬಿಕೊಳ್ಳುವುದೇ ಒಂದು ರೀತಿಯ ಹಿತಾನುಭವ ನೀಡುತ್ತದೆ. ಪರಿಸರ ಪ್ರೇಮಿಗಳಾಗಿದ್ದರೆ ಓಪನ್ ಟೆರೇಸ್ ಅನ್ನು ಅಂದವಾದ ಉದ್ಯಾನವನ್ನಾಗಿ ನಿರ್ಮಿಸಿಕೊಳ್ಳುತ್ತಾರೆ. ಇದರ ನಡುವೆ ಮೇಜು ಕುರ್ಚಿಗಳನ್ನು ಅಳವಡಿಸಿ ಕುಟುಂಬದವರೊಂದಿಗೆ ಸಂತೋಷದಿಂದ ಕಾಲ ಕಳೆಯಲು ಪೂರಕ ವಾತಾವರಣ ಮಾಡಿಕೊಳ್ಳುತ್ತಾರೆ.

ಓಪನ್ ಟೆರೇಸ್‌ನ ಸಾಕಷ್ಟು ಪ್ರಾಜೆಕ್ಟ್‌ಗಳು ಬೆಂಗಳೂರಿನಲ್ಲಿವೆ. ಕೆಲವು ಅಪಾರ್ಟ್‌ಮೆಂಟ್‌ಗಳು 600 ಚದರ ಅಡಿ ಬಿಟ್ಟು ಕೊಟ್ಟರೆ, ಇನ್ನೂ ಕೆಲವು ಒಂದು ಸಾವಿರಕ್ಕೂ ಹೆಚ್ಚು ಚದರ ಅಡಿಯಷ್ಟು ಟೆರೇಸ್ ನೀಡುತ್ತಿವೆ. ಕೋಟ್ಯಂತರ ಹಣ ಕೊಟ್ಟು ಖರೀದಿಸುವ ಮನೆ ಎಂದಮೇಲೆ ಬಯಸಿದಷ್ಟು ಆರಾಮದಾಯಕ ವಾತಾವರಣ ದೊರಕಿಸಿಕೊಡಬೇಕಲ್ಲವೇ? ಇಷ್ಟೆಲ್ಲ ಖರ್ಚು ಮಾಡಿ ಬೆಂಗಳೂರಿನ ಅದ್ಭುತ ವಾತಾವರಣ, ಸೌಂದರ್ಯವನ್ನು ಅನುಭವಿಸದಿದ್ದರೆ ಹೇಗೆ? ಇದಕ್ಕಾಗಿ ಓಪನ್ ಟೆರೇಸ್ ಜೊತೆಗೆ ಹೆಚ್ಚು ನೈಸರ್ಗಿಕ ಬೆಳಕು ಹೊಂದಲು ನೆಲದಿಂದ ಛಾವಣಿವರೆಗಿನ ಕಿಟಕಿಗಳು (ಫ್ರೆಂಚ್ ವಿಂಡೋ) ಇರುವ ಮನೆಗಳನ್ನು ಬಯಸುತ್ತಾರೆ. ಗ್ರಾಹಕರ ಬೇಡಿಕೆಗಳಿಗೆ ಅನುಗುಣವಾಗಿ ಮನೆ ನಿರ್ಮಿಸಿಕೊಡುವುದು ನಮ್ಮ ಕರ್ತವ್ಯ ಎನ್ನುತ್ತಾರೆ ನಗರದ ಬಿಲ್ಡರ್ಸ್‌.

ಓಪನ್ ಟೆರೇಸ್‌ನಿಂದ ಟೆರೇಸ್ ಗಾರ್ಡನ್‌ಗೆ ಹೆಚ್ಚು ಮಹತ್ವ ನೀಡಲಾಗುತ್ತಿದೆ. ಕೆಲವರು ಇಲ್ಲಿ ಆಕರ್ಷಕವಾದ ಶೋ ಗಿಡಗಳನ್ನು ಬೆಳೆಸಿದರೆ, ಹಲವರು ಔಷಧೀಯ ಸಸ್ಯಗಳನ್ನು ಇಲ್ಲವೆ ಮನೆಗೆ ನಿತ್ಯ ಬಳಕೆಯಾಗುವ ಹೂ, ತರಕಾರಿಗಳನ್ನು ಬೆಳೆಸುತ್ತಾರೆ. ಇನ್ನೂ ಹಲವರು ಸಂಜೆ ಮನೆಯವರೊಂದಿಗೆ ಕುಳಿತು ಕಾಲ ಕಳೆಯುವ ರೀತಿಯಲ್ಲಿ ಮೇಜು- ಕುರ್ಚಿಗಳನ್ನು ಅಳವಡಿಸುತ್ತಾರೆ. ಇದು ಅವರವರ ಅಭಿರುಚಿಗೆ ಅನುಗುಣವಾಗಿರುತ್ತದೆ.