ಕಾಂಗ್ರೆಸ್​ಗೆ ಹೆಣ್ಮಕ್ಕಳಿಂದ ತಕ್ಕ ಪಾಠ

ಯಾದಗಿರಿ : ನರೇಂದ್ರ ಮೋದಿ ಸರ್ಕಾರ ಜಾರಿಗೆ ತರಲು ಉದ್ದೇಶಿಸಿದ್ದ ಮಹಿಳಾ ಮೀಸಲಾತಿಗೆ ಸೋಲಾಗುವಂತೆ ಮಾಡಿದ ಕಾಂಗ್ರೆಸ್​ ಮತ್ತು ಮಿತ್ರಪಕ್ಷಗಳ ನಡೆ ಖಂಡಿಸಿ ಜಾತ್ಯತಿತ ಜನತಾದಳ (ಜೆಡಿಎಸ್​) ಜಿಲ್ಲಾ ಮಹಿಳಾ ಟಕ ನಗರದಲ್ಲಿ ಬುಧವಾರ ಬೃಹತ್​ ಪ್ರತಿಭಟನೆ ನಡೆಸಿತು. ಟಕದ ಜಿಲ್ಲಾಧ್ಯಕ್ಷೆ ನಾಗರತ್ನ ಅನಪುರ ನೇತೃತ್ವದಲ್ಲಿ ಜಿಲ್ಲೆಯ ಎಲ್ಲೆಡೆಯಿಂದ ಆಗಮಿಸಿದ ಸಾವಿರಾರು ಕಾರ್ಯಕರ್ತೆಯರು ನೇತಾಜಿ ಸರ್ಕಲ್​ನಲ್ಲಿ ಜಮಾಯಿಸಿ ಕಾಂಗ್ರೆಸ್​ ವಿರುದ್ಧ ೂಷಣೆ ಕೂಗಿದರು.

ದೇಶದ ಮಹಿಳೆಯರಿಗೆ ರಾಜಕೀಯವಾಗಿ ಮೀಸಲು ಒದಗಿಸಲು ಮಂಡಿಸಿದ್ದ ಬಿಲ್​ಗೆ ಉದ್ದೇಶಪೂರ್ವಕವಾಗಿ ಸೋಲಿಸಿದ್ದು ಕಾಂಗ್ರೆಸ್​ ಮತ್ತು ಅದರ ಮಿತ್ರಪಕ್ಷಗಳು. ಇದರಿಂದಾಗಿ ಹೆಣ್ಮಕ್ಕಳ ಬಗ್ಗೆ ಅವರಿಗಿರುವ ಕಾಳಜಿ ಎಂಥದ್ದು ಎಂಬುದು ಸಾಬೀತಾಗಿದೆ ಎಂದು ಅನಪುರ ಗುಡುಗಿದರು.

ಮಾಜಿ ಪ್ರಧಾನಿ ದೇವೇಗೌಡ ಸಹ ಇದನ್ನು ತರಲು ಮುಂದಾಗಿದ್ದಾಗ ಇದೇ ಕುತಂತ್ರ ಬುದ್ಧಿ ಉಪಯೋಗಿಸಿದ್ದ ಕಾಂಗ್ರೆಸ್​ಗೆ ಹೆಣ್ಮಕ್ಕಳು ರಾಜಕೀಯವಾಗಿ ಮುಂದೆ ಬರಬಾರದು ಎಂಬ ಧೋರಣೆ ಇದೆ. ಮಹಿಳಾ ಮೀಸಲು ಮಸೂದೆ ಸೋಲಿಸಿದ ಕಾಂಗ್ರೆಸ್​ಗೆ ಮುಂದಿನ ದಿನಗಳಲ್ಲಿ ಮಹಿಳೆಯರು ತಕ್ಕ ಪಾಠ ಕಲಿಸಲಿದ್ದಾರೆ ಎಂದು ಎಚ್ಚರಿಸಿದರು.

ಯುವ ನಾಯಕಿ ಪರಿಮಳ ಪಾಟೀಲ ಚಾಮನಳ್ಳಿ ಮಾತನಾಡಿ, 70 ವರ್ಷಗಳಿಂದಲೂ ಕಾಂಗ್ರೆಸ್​ ಮಹಿಳೆಯರ ವಿರೋಧಿಯಾಗಿದ್ದು, ಈಗ ಮೀಸಲಾತಿಯನ್ನು ಸೋಲಿಸುವ ಮೂಲಕ ಮತ್ತೊಮ್ಮೆ ತನ್ನ ನಿಲುವು ತೋರಿಸಿಕೊಟ್ಟಿದೆ ಎಂದು ಕಿಡಿಕಾರಿದರು.

ಪ್ರಮುಖರಾದ ಶಾರದಾ ಕಡೇಚೂರ, ಜಯಶ್ರೀ ಪೊಲೀಸ್​ ಪಾಟೀಲ್​, ನರ್ಮದಾ ಅವಂಗಪುರ, ಅಶ್ವಿನಿ ಹೊಸಮನಿ, ಸಾವಿತ್ರಮ್ಮ ಯಡ್ಡಳ್ಳಿ, ವಿಜಯಲಕ್ಷಿ$್ಮ ಹತ್ತಿಕುಣಿ, ಇಂದಿರಾ ಕೊಳ್ಳಿ, ಶಶಿಕಲಾ ಬಿರಾದಾರ, ಸಂಗೀತಾ ಚವ್ಹಾಣ್​, ಅನಸೂಯಾ ದಂತಾಪುರ, ಸಿದ್ಲಿಂಗಮ್ಮ ಯಲ್ಹೇರಿ, ಸುಭಾಶ್ಚಂದ್ರ ಕಟಕಟಿ ಹೊನಗೇರಾ, ವಿಶ್ವನಾಥ ಸಿರವಾರ, ಬಂದಪ್ಪ ಅರಳಿ, ಮಲ್ಲನಗೌಡ ಹಳಿಮನಿ ಕೌಳೂರ, ಅಜಯರೆಡ್ಡಿ ಯಲ್ಹೇರಿ, ದೇವಿಂದ್ರಪ್ಪ ಸುರಪುರ, ಕುಮಾರಗೌಡ ಹುಣಸಗಿ, ಶರಣಗೌಡ ಹೊಸಳ್ಳಿ, ಈಶ್ವರ ರಾಠೋಡ, ಜಯೇಂದ್ರ ಚವ್ಹಾಣ್​, ಯಂಕೋಬಾ ಕಂಚಗಾರಹಳ್ಳಿ, ಮಲ್ಲಿಕಾರ್ಜುನ ಮರಂಕಲ್​, ಧಮೇರ್ಶ್​ ವಡಗೇರಾ ಇತರರಿದ್ದರು. ಸ್ಥಳಕ್ಕೆ ಆಗಮಿಸಿದ ಹೆಚ್ಚುವರಿ ಜಿಲ್ಲಾಧಿಕಾರಿ ರಮೇಶ ಕೋಲಾರ ಅವರಿಗೆ ಮನವಿಪತ್ರ ಸಲ್ಲಿಸಲಾಯಿತು.

ಬೆಳಗ್ಗೆ 10ರ ಸುಮಾರಿಗೆ ನೇತಾಜಿ ಸರ್ಕಲ್​ ಬಳಿ ಜಮಾಯಿಸಿದ ಜೆಡಿಎಸ್​ ಮಹಿಳಾ ಕಾರ್ಯಕರ್ತರು ಹಾಗೂ ಜಿಲ್ಲಾಧ್ಯಕ್ಷ ಸುಭಾಷಚಂದ್ರ ಕಟಕಟಿ ನೆತ್ತಿ ಸುಡುವ ಬಿಸಿಲಲ್ಲೇ ಸುಮಾರು 40 ನಿಮಿಷ ಪ್ರತಿಭಟನೆ ನಡೆಸಿದ್ದು, ಸಂಚಾರಕ್ಕೆ ವ್ಯತ್ಯಯ ಉಂಟಾಗಿತ್ತು. ಬಂದೋಬಸ್ತ್​ ಕಲ್ಪಿಸಿದ ಪೊಲೀಸ್​ ಅಧಿಕಾರಿ ಮತ್ತು ಸಿಬ್ಬಂದಿ ಪಕ್ಕದ ರಸ್ತೆಯಿಂದ ವಾಹನ ಸಂಚಾರಕ್ಕೆ ಅನುವು ಮಾಡಿಕೊಟ್ಟರು. ಸರ್ಕಲ್​ ಸುತ್ತ ಜೆಡಿಎಸ್​ ಧ್ವಜಗಳನ್ನು ಕೈಯಲ್ಲಿ ಹಿಡಿದ ಮಹಿಳಾ ಕಾರ್ಯಕರ್ತರು ದೇವೇಗೌಡ, ಕೇಂದ್ರ ಮಂತ್ರಿ ಕುಮಾರಸ್ವಾಮಿ ಹಾಗೂ ಶಾಸಕ ಶರಣಗೌಡ ಕಂದಕೂರ ಪರ ೂಷಣೆಗಳನ್ನು ಕೂಗಿದರು.