ಮಾಹಿತಿ ಆಯೋಗದಲ್ಲಿ ಅವ್ಯವಸ್ಥೆ

ಬೆಂಗಳೂರು: ರಾಜ್ಯ ಮಾಹಿತಿ ಆಯೋಗದ ಅವ್ಯವಸ್ಥೆ ವಿರುದ್ಧ ಮಾಹಿತಿ ಆಯುಕ್ತರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಆಡಳಿತ ಅವ್ಯವಸ್ಥೆಗೆ ಆಯೋಗದ ಕಾರ್ಯದರ್ಶಿಯೇ ನೇರ ಹೊಣೆ ಎಂದು ಮಾಹಿತಿ ಆಯುಕ್ತರು ಆಕ್ರೋಶ ಹೊರಹಾಕಿದ್ದಾರೆ. ಅಲ್ಲದೆ, ಸರ್ಕಾರದ ಮುಖ್ಯ ಕಾರ್ಯದರ್ಶಿ ಮತ್ತು ರಾಜ್ಯಪಾಲರಿಗೆ ಪತ್ರದ ಮೂಲಕ ದೂರು ಸಲ್ಲಿಸಿದ್ದಾರೆ.

ಸಭೆಯಲ್ಲಿ ಮುಖ್ಯ ಮಾಹಿತಿ ಆಯುಕ್ತ ಕೆ.ರಾಮನ್, ಮಾಹಿತಿ ಆಯುಕ್ತರಾದ ರುದ್ರಣ್ಣ ಹರ್ತಿಕೋಟೆ, ರಾಜಶೇಖರ, ಕೆ. ಬದ್ರುದ್ದೀನ್, ಡಾ. ರೀಚರ್ಡ್ ವಿನ್ಸೆಂಟ್ ಡಿಸೋಜ, ಡಾ. ಮಹೇಶ್ ವಾಳ್ವೇಕರ್, ವೆಂಕಟ್‌ಸಿಂಗ್, ನಾರಾಯಣ ಚನ್ನಾಳ್ ಹಾಜರಿದ್ದರು.

ಮಾಹಿತಿ ಆಯೋಗದಲ್ಲಿ 2025-26ನೇ ಸಾಲಿನಲ್ಲಿ ಮಾಹಿತಿ ಹಕ್ಕು ಕಾಯ್ದೆ 2005 ಕಲಂ 19(3) ಹಾಗೂ 18(1)ರ ಅಡಿ ವಿವಿಧ ಮೇಲ್ಮನವಿದಾರರು ಆಯೋಗಕ್ಕೆ ದ್ವಿತೀಯ ಮೇಲ್ಮನವಿ ಅರ್ಜಿಗಳನ್ನು ಸಲ್ಲಿಸಿದ್ದು, ಪಾರದರ್ಶಕ ವಿಲೇವಾರಿಯ ಹೊಣೆಗಾರಿಕೆ ಮಾಹಿತಿ ಆಯುಕ್ತರದ್ದಾಗಿರುತ್ತದೆ.

2025ರ ಏಪ್ರಿಲ್ 1ರಿಂದ 2026ರ ಮಾರ್ಚ್31ರವರೆಗೆ 70 ಸಾವಿರ ಪ್ರಕರಣಗಳನ್ನು ವಿಚಾರಣೆ ನಡೆಸಿ, 46 ಸಾವಿರ ಪ್ರಕರಣ ವಿಲೇವಾರಿ ಮಾಡಲಾಗಿದೆ. ರಾಷ್ಟ್ರದಲ್ಲಿಯೇ ಕರ್ನಾಟಕ ಮಾಹಿತಿ ಆಯೋಗ ಮುಂಚೂಣಿಯಲ್ಲಿದೆ. ಆದರೆ, ಆಯೋಗದ ಆಡಳಿತ ಅವ್ಯವಸ್ಥೆ ಮಾತ್ರ ಸುಧಾರಣೆಗೊಂಡಿಲ್ಲ. ಆಯೋಗದ ಪ್ರಭಾರ ಕಾರ್ಯದರ್ಶಿ ಬಿ.ಸಿ. ಸತೀಶ್, ನೇಮಕವಾದ ನಂತರ ಇದುವರೆಗೂ ಕಚೇರಿಗೆ ಹಾಜರಾಗದೆ ಮತ್ತು ಭೌತಿಕವಾಗಿ ಆಡಳಿತ ವ್ಯವಸ್ಥೆ ಪರಿಶೀಲಿಸದೆ ಇರುವುದರಿಂದ ಬಹುಪಾಲು ಕೆಲಸ ಕಾರ್ಯಗಳು ಸ್ಥಗಿತಗೊಂಡಿವೆ.

ರಾಜ್ಯ ಮಾಹಿತಿ ಆಯುಕ್ತರು ಹಾಗೂ ಕಾರ್ಯದರ್ಶಿಗಳ ವಾಟ್ಸ್‌ಆ್ಯಪ್ ಗ್ರೂಪ್‌ನಲ್ಲಿ ಆಡಳಿತಾತ್ಮಕ ಸಿಬ್ಬಂದಿ, ಹೊರಗುತ್ತಿಗೆಯ ಸಿಬ್ಬಂದಿ ಸಮಸ್ಯೆ ಮತ್ತು ಪೀಠಗಳಲ್ಲಿ ಪ್ರತಿದಿನ ವಿದ್ಯುತ್, ನೆಟ್‌ವರ್ಕ್ ಸಮಸ್ಯೆ ಬಗೆಹರಿಸಲು ಸಂದೇಶ ಹಾಕಲಾಗುತ್ತಿತ್ತು. ಸಮಸ್ಯೆ ನಿವಾರಿಸಬೇಕಾದ ಕಾರ್ಯದರ್ಶಿ ಸತೀಶ್, ಏಕಾಏಕಿ ಗ್ರೂಪ್‌ನಿಂದ ನಿರ್ಗಮಿಸಿದ್ದಾರೆ. ಆ ಮೂಲಕ ಆಯುಕ್ತರ ಗೌರವಕ್ಕೆ ಚ್ಯುತಿ ತಂದಿದ್ದಾರೆ ಎಂದು ಸಭೆಯಲ್ಲಿ ಚರ್ಚೆಗಳು ನಡೆದಿವೆ.

ಆಯೋಗವು ಕಾರ್ಯಾರಂಭವಾಗಿ 21 ವರ್ಷ ಕಳೆದರೂ ವೃಂದ ಮತ್ತು ನೇಮಕಾತಿ ವರದಿಯನ್ನೇ ತಯಾರಿಸಿಲ್ಲ. ಕೇವಲ ಅನ್ಯಸೇವೆ ಮೇಲೆ ಅಧಿಕಾರಿ/ನೌಕರರು ಹಾಗೂ ಹೊರಗುತ್ತಿಗೆ ಸಿಬ್ಬಂದಿ ಸಾರ್ವಜನಿಕರ ಮೇಲ್ಮನವಿ ಅರ್ಜಿಗಳನ್ನು ವಿಲೇವಾರಿ ಮತ್ತು ಆಡಳಿತಾತ್ಮಕ ಕೆಲಸಗಳನ್ನು ನಿರ್ವಹಿಸುತ್ತಿದ್ದಾರೆ.

ೆಬ್ರವರಿ 13ರ ಆಯುಕ್ತರ ಸಭೆಯಲ್ಲಿ ಚರ್ಚಿಸಿ ಕಾರ್ಯದರ್ಶಿಗೆ ಜರೂರಾಗಿ ವರದಿ ತಯಾರಿಸಿ ಸರ್ಕಾರಕ್ಕೆ ಸಲ್ಲಿಸಲು ನಿರ್ದೇಶನ ನೀಡಲಾಗಿತ್ತು. ಆದರೆ, ಕಾರ್ಯದರ್ಶಿ ಸೌಜನ್ಯಕ್ಕೂ ಸರ್ಕಾರದ ವಿವಿಧ ಹುದ್ದೆಗಳಲ್ಲಿ ಅನುಭವವುಳ್ಳ ಇಬ್ಬರೂ ನಿವೃತ್ತ ಐಎಎಸ್ ಅಧಿಕಾರಿಗಳನ್ನು ಸಂಪರ್ಕಿಸದೆ ನಿರ್ಲಕ್ಷ್ಯತೆ ತೋರಿದ್ದಾರೆ.

ಆಂಧ್ರ ಪ್ರದೇಶದ ರಾಜ್ಯ ಮುಖ್ಯ ಮಾಹಿತಿ ಆಯುಕ್ತರು ಹಾಗೂ ರಾಜ್ಯ ಮಾಹಿತಿ ಆಯುಕ್ತರು ಅಧ್ಯಯನ ಮಾಡಲು ಕರ್ನಾಟಕ ಮಾಹಿತಿ ಆಯೋಗಕ್ಕೆ ಭೇಟಿ ನೀಡಲು ಪತ್ರ ಬರೆದಿದ್ದರು. ಈಬಗ್ಗೆ ಕಾರ್ಯದರ್ಶಿಗೆ ಟಿಪ್ಪಣಿ ಮೂಲಕ ಸೂಚಿಸಲಾಗಿತ್ತು. ಆದರೆ, ಸಭೆಗೆ ಹಾಜರಾಗದೆ, ಶಿಷ್ಠಾಚಾರಕ್ಕೆ ಯಾವುದೇ ಕ್ರಮ ಕೈಗೊಳ್ಳದೆ ಅಸಡ್ಡೆ ತೋರಿದ್ದಾರೆ. ಮಾಹಿತಿ ಆಯುಕ್ತರು ವಿಧಿಸಿರುವ ದಂಡದ ಮೊತ್ತ ಇಲ್ಲಿಯವರೆಗೂ 8 ಕೋಟಿ ರೂ. ಆಗಿದ್ದು, ವಸೂಲಿಗೆ ಯಾವುದೇ ಕ್ರಮ ಕೈಗೊಂಡಿಲ್ಲ.

ಮಾಹಿತಿಸೌಧದಲ್ಲಿ ನೂರಕ್ಕಿಂತ ಹೆಚ್ಚು ಮಹಿಳಾ ನೌಕರರು ಇದ್ದು, ಕಟ್ಟಡದ 3ನೇ ಮಹಡಿಯಲ್ಲಿ ಒಂದು ಶೌಚಗೃಹ ಇದೆ. 2 ವರ್ಷದಿಂದ ದುರಸ್ತಿಗೆ ಒಳಗಾಗಿದ್ದು, ಲೋಕೋಪಯೋಗಿ ಇಲಾಖೆಗೆ 2 ಲಕ್ಷ ರೂ. ಜಮಾ ಮಾಡಿದ್ದರೂ ದುರಸ್ತಿಯಾಗಿಲ್ಲ. ಬಯೋಮೆಟ್ರಿಕ್ ಹಾಜರಾತಿ ಕಡ್ಡಾಯ ಇದ್ದರೂ ಅಧಿಕಾರಿ, ನೌಕರರು ಸರಿಯಾದ ಸಮಯಕ್ಕೆ ಬರುತ್ತಿಲ್ಲ. ಪ್ರಿಂಟರ್ಸ್, ಹೈಬ್ರಿಡ್ ಮಾದರಿ ವಿಸಿ ಸಿಸ್ಟಂಗಳನ್ನು ಅಳವಡಿಸಲು 50 ಲಕ್ಷ ರೂ. ಪಾವತಿಸಿ ವರ್ಷ ಕಳೆದರೂ ಕಿಯೋನಿಕ್ಸ್ ಸಂಸ್ಥೆ ಅಳವಡಿಸಿಲ್ಲ. ಸಂಬಳ, ಇತರ ಭತ್ಯೆ, ವಾಹನ ನಿರ್ವಹಣೆಗೆ 10ನೇ ತಾರೀಖು ಕೈಚಾಚುವ ಪರಿಸ್ಥಿತಿ ಬಂದಿದೆ. ಹೊರಗುತ್ತಿಗೆ ನೌಕರರ ನೇಮಕಾತಿ ಗುತ್ತಿಗೆ ಪಡೆದಿರುವ ಏಜೆನ್ಸಿ ಅವಧಿ ಮುಗಿದರೂ ನವೀಕರಣಗೊಂಡಿಲ್ಲ.