ರಾಜ್ಯ

ಆರು ದಶಕಗಳ ಕಟ್ಟಡಕ್ಕೆ ಗುಡ್​ಬೈ!

ಕಲಬುರಗಿ ಎಂಎಸ್​ಕೆ ಮಿಲ್​ ರಸ್ತೆಯಲ್ಲಿ ನಿರ್ಮಾಣವಾಗಿರುವ ನೂತನ ಐಟಿಐ ಕಾಲೇಜು ಕಟ್ಟಡ.
ಕಲಬುರಗಿ ಎಂಎಸ್​ಕೆ ಮಿಲ್​ ರಸ್ತೆಯಲ್ಲಿ ನಿರ್ಮಾಣವಾಗಿರುವ ನೂತನ ಐಟಿಐ ಕಾಲೇಜು ಕಟ್ಟಡ.
ಜಯತೀರ್ಥ ಪಾಟೀಲ
Published on: 

ಪ್ರಮುಖ ಮುಖ್ಯಾಂಶಗಳು

  • 20 ಕೋಟಿ ರೂ. ವೆಚ್ಚದಲ್ಲಿ ಅತ್ಯಾಧುನಿಕ ಐಟಿಐ ಕಾಲೇಜು
  • ಶೀಘ್ರದಲ್ಲೆ ಹೊಸ ಆವರಣಕ್ಕೆ ಸ್ಥಳಾಂತರ
ಕಲಬುರಗಿ: ಆರು ದಶಕಗಳ ಕಾಲ ಸಾವಿರಾರು ಯುವಕರಿಗೆ ಕೌಶಲದ ದಾರಿ ತೋರಿದ ಕಟ್ಟಡವೀಗ ಇತಿಹಾಸದ ಪುಟ ಸೇರಲು ಸಿದ್ಧವಾಗಿದೆ. ಮಳೆ ಬಂದರೆ ಸೋರುವ ಛಾವಣಿ, ಶಿಥಿಲಗೊಂಡ ವರ್ಕ್​ಶಾಪ್​ಗಳು, ಹಳೆಯ ಲ್ಯಾಬ್​ಗಳು ಹಾಗೂ ತರಗತಿ ಕೊಠಡಿಗಳ ನಡುವೆ ತರಬೇತಿ ಪಡೆಯುತ್ತಿದ್ದ ವಿದ್ಯಾರ್ಥಿಗಳಿಗೆ ಇದೀಗ ಆಧುನಿಕ ಸೌಲಭ್ಯಗಳ ಹೊಸ ಜಗತ್ತು ತೆರೆದುಕೊಳ್ಳುತ್ತಿದೆ.
ನಗರದ ಎಂಎಸ್​ಕೆ ಮಿಲ್​ ರಸ್ತೆಯಲ್ಲಿರುವ ಸರ್ಕಾರಿ ಕೈಗಾರಿಕಾ ತರಬೇತಿ ಸಂಸ್ಥೆ (ಪುರುಷ) ಶೀಘ್ರದಲ್ಲೆ ಹೊಸ ಕಟ್ಟಡಕ್ಕೆ ಸ್ಥಳಾಂತರಗೊಳ್ಳಲಿದೆ. ಸುಮಾರು 20 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿರುವ ಅತ್ಯಾಧುನಿಕ ಕಟ್ಟಡದ ಕಾಮಗಾರಿ ಬಹುತೇಕ ಪೂರ್ಣಗೊಂಡಿದ್ದು, ವೈರಿಂಗ್​, ಸುಣ್ಣ-ಬಣ್ಣ ಸೇರಿ ಅಂತಿಮ ಹಂತದ ಕೆಲಸಗಳು ಭರದಿಂದ ಸಾಗಿವೆ.
13 ಎಕರೆ 20 ಗುಂಟೆ ವಿಶಾಲ ಪ್ರದೇಶದಲ್ಲಿ ಹರಡಿರುವ ಸರ್ಕಾರಿ ಐಟಿಐ ಕಟ್ಟಡಗಳ ನಿರ್ಮಾಣ 1960ರಲ್ಲಿ ಆರಂಭವಾಗಿ, 1963ರಲ್ಲಿ ಪೂರ್ಣಗೊಂಡಿತ್ತು. 1965ರಿಂದ ತರಗತಿಗಳು ಆರಂಭವಾಗಿದ್ದವು ಎಂಬ ದಾಖಲೆಗಳಿವೆ. ಹೀಗಾಗಿ ಹಳೆಯ ಕಟ್ಟಡಕ್ಕೆ ಈಗ ಬರೋಬ್ಬರಿ 63 ವರ್ಷಗಳ ಇತಿಹಾಸ. ಕಾಲಕ್ರಮೇಣ ಕಟ್ಟಡದ ವರ್ಕ್​ಶಾಪ್​ಗಳು, ಲ್ಯಾಬ್​ಗಳು ಹಾಗೂ ತರಗತಿ ಕೊಠಡಿಗಳು ಶಿಥಿಲಗೊಂಡಿದ್ದವು. ಮಳೆಗಾಲದಲ್ಲಿ ವಿದ್ಯಾರ್ಥಿಗಳು ಹಾಗೂ ಸಿಬ್ಬಂದಿ ಸಾಕಷ್ಟು ತೊಂದರೆ ಅನುಭವಿಸುತ್ತಿದ್ದರು. ಹಲವು ಬಾರಿ ದುರಸ್ತಿ ಕಾರ್ಯ ಕೈಗೊಂಡರೂ ಹಳೆಯ ಕಟ್ಟಡದ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಸಿಗುತ್ತಿರಲಿಲ್ಲ.
ಈ ಹಿನ್ನೆಲೆ ಕೌಶಲಾಭಿವೃದ್ಧಿ, ಉದ್ಯಮಶೀಲತೆ ಹಾಗೂ ಜೀವನೋಪಾಯ ಇಲಾಖೆ ಸಚಿವ ಡಾ. ಶರಣಪ್ರಕಾಶ ಪಾಟೀಲ್​ ಅವರು ಸಂಸ್ಥೆಗೆ ಭೇಟಿ ನೀಡಿ, ಹೊಸ ಕಟ್ಟಡ ನಿರ್ಮಾಣಕ್ಕೆ ಮುತುವರ್ಜಿ ವಹಿಸಿದ್ದರು. ಅದರ ಫಲವಾಗಿ ಇದೀಗ ಹೊಸ ಕಟ್ಟಡ ನಿರ್ಮಾಣಗೊಂಡಿದೆ.
ಕ್ಯಾಂಪಸ್​ನ ವಿವಿಧ ಭಾಗಗಳಿಗೆ ರಸ್ತೆ ಸಂಪರ್ಕ, ಸೌರ ವಿದ್ಯುತ್​ ವ್ಯವಸ್ಥೆ, ಅಗ್ನಿಶಾಮಕ ಸೌಲಭ್ಯ, ಒಳಚರಂಡಿ ವ್ಯವಸ್ಥೆ, ಸಿಸಿಟಿವಿ ಜಾಲ, ವಾಹನ ನಿಲುಗಡೆ ಹಾಗೂ ವಿದ್ಯಾರ್ಥಿಗಳಿಗೆ ಕುಡಿಯುವ ನೀರಿನ ಸೌಲಭ್ಯ ಕಲ್ಪಿಸುವ ಅಗತ್ಯವೂ ಇದೆ. ಈ ಎಲ್ಲ ಕಾಮಗಾರಿಗಳನ್ನು ಒಳಗೊಂಡಂತೆ ಸುಮಾರು 15 ಕೋಟಿ ರೂ. ಮೊತ್ತದ ಪ್ರತ್ಯೇಕ ಲೈನ್​ ಎಸ್ಟಿಮೇಟ್​ ಸಿದ್ಧಪಡಿಸಿ ಸಚಿವರು ಹಾಗೂ ಇಲಾಖೆಯ ಹಿರಿಯ ಅಧಿಕಾರಿಗಳಿಗೆ ಸಲ್ಲಿಸಲಾಗಿದೆ.
ಇಲ್ಲಿನ ವಿದ್ಯಾರ್ಥಿಗಳಿಗೆ ಕೆಜಿಟಿಟಿಐ, ಜಿಟಿಟಿಸಿ ಸೇರಿ ವಿವಿಧ ಸಂಸ್ಥೆಗಳ ಮೂಲಕ ಪ್ರಾಯೋಗಿಕ ತರಬೇತಿಯನ್ನೂ ನೀಡಲಾಗುತ್ತಿದೆ. ತರಬೇತಿ ಪಡೆದ ಹಲವು ವಿದ್ಯಾರ್ಥಿಗಳು ದೇಶ&ವಿದೇಶಗಳ ಹೆಸರಾಂತ ಕಂಪನಿಗಳು ಹಾಗೂ ಸರ್ಕಾರಿ ಸ್ವಾಮ್ಯದ ಸಂಸ್ಥೆಗಳಲ್ಲಿ ಉದ್ಯೋಗ ಪಡೆದಿದ್ದಾರೆ.
15 ಟ್ರೇಡ್​, 872 ಶಿಶುಕ್ಷುಗಳ ಬಲ
ಕಲಬುರಗಿ ಸರ್ಕಾರಿ ಐಟಿಐ 1998ರಲ್ಲಿ ಗ್ರೇಡ್​&1 ಕಾಲೇಜಾಗಿ ಮೇಲ್ದರ್ಜೆಗೇರಿದೆ. ಪ್ರಸ್ತುತ ಇಲ್ಲಿ 15 ಟ್ರೇಡ್​ಗಳು ಹಾಗೂ 40 ಯೂನಿಟ್​ಗಳು ಕಾರ್ಯನಿರ್ವಹಿಸುತ್ತಿವೆ. ಒಟ್ಟು 872 ಶಿಶುುಗಳ ಮಂಜೂರಾದ ಸಂಖ್ಯಾಬಲವಿದ್ದು, 61 ಬೋಧಕ ಸಿಬ್ಬಂದಿ ಹುದ್ದೆಗಳು ಮಂಜೂರಾಗಿವೆ. ಈ ಪೈಕಿ 49 ಹುದ್ದೆ ಭರ್ತಿಯಾಗಿದ್ದು, 12 ಹುದ್ದೆಗಳು ಖಾಲಿ ಇವೆ.
ಫಲಿತಾಂಶದಲ್ಲೂ ಮುನ್ನಡೆ
ಸರ್ಕಾರಿ ಐಟಿಐ ಕಾಲೇಜು ಶೈಕ್ಷಣಿಕ ಫಲಿತಾಂಶದಲ್ಲೂ ಉತ್ತಮ ಸಾಧನೆ ಮಾಡುತ್ತಿದೆ. ಕಳೆದ ನಾಲ್ಕು ವರ್ಷಗಳಿಂದ ಸತತವಾಗಿ ಉತ್ತಮ ಫಲಿತಾಂಶ ದಾಖಲಿಸುತ್ತಿದ್ದು, ಕ್ರಮವಾಗಿ ಶೇ.60.68, ಶೇ.65.35 ಹಾಗೂ ಶೇ.75.09 ಫಲಿತಾಂಶ ಬಂದಿದೆ. ಗುಣಮಟ್ಟದ ಬೋಧನೆ, ಲ್ಯಾಬ್​ ಹಾಗೂ ವರ್ಕ್​ಶಾಪ್​ಗಳ ಪ್ರಾಯೋಗಿಕ ಚಟುವಟಿಕೆಗಳು ಮತ್ತು ಬೋಧಕ&ಬೋಧಕೇತರ ಸಿಬ್ಬಂದಿಯ ಸಂಘಟಿತ ಪರಿಶ್ರಮವೇ ಉತ್ತಮ ಫಲಿತಾಂಶಕ್ಕೆ ಕಾರಣವಾಗಿದೆ. ಮುಂದಿನ ದಿನಗಳಲ್ಲಿ ಶೇ.80 ಫಲಿತಾಂಶ ಸಾಧಿಸುವ ಗುರಿ ಹೊಂದಲಾಗಿದೆ.
2.70 ಕೋಟಿ ರೂ. ಯಂತ್ರೋಪಕರಣ
ಹೊಸ ಕಟ್ಟಡಕ್ಕೆ ಅಗತ್ಯವಿರುವ ಯಂತ್ರೋಪಕರಣಗಳ ಖರೀದಿಗೂ ಒತ್ತು ನೀಡಲಾಗಿದೆ. ಸುಮಾರು 2.70 ಕೋಟಿ ರೂ. ವೆಚ್ಚದಲ್ಲಿ ಯಂತ್ರೋಪಕರಣಗಳನ್ನು ಹಂತಹಂತವಾಗಿ ಪೂರೈಸಲಾಗುತ್ತಿದೆ. ಈಗಾಗಲೇ ಲೇತ್​ ಮಶೀನ್​, ಡೀಸೆಲ್​ ಮೆಕಾನಿಕ್​ ಲ್ಯಾಬ್​ಗೆ ಅಗತ್ಯವಿರುವ ಉಪಕರಣ ಹಾಗೂ ಮೋಟರ್​ ವೆಹಿಕಲ್​ ಲ್ಯಾಬ್​ನ ಯಂತ್ರೋಪಕರಣಗಳು ಬಂದಿದ್ದು, ಹೊಸ ಕಟ್ಟಡದಲ್ಲಿ ಅಳವಡಿಸಲಾಗುತ್ತಿದೆ.
ಒಂದೇ ಸೂರಿನಡಿ ಹಲವು ಸೌಲಭ್ಯ
ಹೊಸ ಕಟ್ಟಡದಲ್ಲಿ ವಿದ್ಯಾರ್ಥಿಗಳ ತರಬೇತಿಗೆ ಅಗತ್ಯವಾದ ಆಧುನಿಕ ವ್ಯವಸ್ಥೆ ಕಲ್ಪಿಸಲಾಗಿದೆ. 12 ವರ್ಕ್​ಶಾಪ್​, 10 ಲ್ಯಾಬ್​, 15 ತರಗತಿ ಕೊಠಡಿ, ಪ್ರಾಚಾರ್ಯರು ಹಾಗೂ ಆಡಳಿತಾಧಿಕಾರಿಗಳ ಕೊಠಡಿ ಸೇರಿ ಆಡಳಿತ ಕಚೇರಿ, ಸೆಂಟ್ರಲ್​ ಇನ್ವೆಂಟರಿ ಸ್ಟೋರ್​, ರೆಕಾರ್ಡ್​ ವಿಭಾಗ ಮತ್ತು ಪ್ಲೇಸ್​ಮೆಂಟ್​ ಸೆಲ್​ಗಳು ಇರಲಿವೆ. ಇಷ್ಟಕ್ಕೆ ಸೀಮಿತವಾಗದೆ ಮತ್ತೊಂದು ಹೆಚ್ಚುವರಿ ಮಹಡಿ ನಿರ್ಮಿಸುವ ಪ್ರಸ್ತಾವನೆಯೂ ಇದೆ. ಇದರಲ್ಲಿ 5 ಹೆಚ್ಚುವರಿ ತರಗತಿ ಕೊಠಡಿ, ಟೊಯೋಟಾ, ಟಿಎನ್​ಎಸ್​ ಫೌಂಡೇಷನ್​, ಶಿಂಡರ್​ ಎಲೆಕ್ಟ್ರಿಕ್​ ಹಾಗೂ ಬಜಾಜ್​ ವರ್ಕ್​ಶಾಪ್​ಗಳು, ಲ್ಯಾಬ್​ಗಳು ಮತ್ತು 200 ಆಸನ ಸಾಮರ್ಥ್ಯದ ಆಡಿಟೋರಿಯಂ ನಿರ್ಮಿಸುವ ಉದ್ದೇಶವಿದೆ.
"

ಕಲಬುರಗಿ ಸರ್ಕಾರಿ ಐಟಿಐ ಕಾಲೇಜು ಆರು ದಶಕ ಕಂಡಿದ್ದು, ಕಟ್ಟಡ ಸಂಪೂರ್ಣ ಶಿಥಿಲಗೊಂಡು ವಿದ್ಯಾರ್ಥಿಗಳಿಗೆ ತೊಂದರೆಯಾಗಿತ್ತು. ಇದನ್ನು ಖುದ್ದಾಗಿ ಕಂಡು ತಕ್ಷಣ ಹೊಸ ಕಟ್ಟಡ ಮಂಜೂರು ಮಾಡಿಸಿ 20 ಕೋಟಿ ರೂ. ವೆಚ್ಚದಲ್ಲಿ ಅತ್ಯಾಧುನಿಕ ಕಟ್ಟಡ ನಿರ್ಮಿಸಲಾಗಿದೆ. ಹೆಚ್ಚುವರಿಯಾಗಿ ಇನ್ನೂ ಕೆಲ ಕೆಲಸಗಳು ಬಾಕಿ ಇದ್ದು, ಕಾಲೇಜು ಮಂಡಳಿ ಸಲ್ಲಿಸಿರುವ ಪ್ರಸ್ತಾವನೆಗೆ ಶ್ರೀ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು.

"

ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಅವರ ಮುತುವರ್ಜಿಯಿಂದಾಗಿ ಹೊಸ ಕಟ್ಟಡ ನಿರ್ಮಾಣ ಸಾಧ್ಯವಾಗಿದೆ. ಇದರಿಂದ ವಿದ್ಯಾರ್ಥಿಗಳು ಹಾಗೂ ಸಿಬ್ಬಂದಿಗೆ ಹೆಚ್ಚಿನ ಅನುಕೂಲವಾಗಲಿದೆ. ತರಗತಿ ಕೊಠಡಿ, ಸಿಸಿಟಿವಿ ಜಾಲ ಸೇರಿ ಇನ್ನೂ ಕೆಲವು ಕೆಲಸ ಬಾಕಿ ಇವೆ. ಈ ಕುರಿತು ಎಸ್ಟಿಮೇಟ್​ ಸಿದ್ಧಪಡಿಸಿ ಸಚಿವರು ಹಾಗೂ ಇಲಾಖೆ ಹಿರಿಯ ಅಧಿಕಾರಿಗಳಿಗೆ ಸಲ್ಲಿಸಲಾಗಿದೆ. ಶೀಘ್ರ ಪರಿಹಾರ ದೊರೆಯುವ ನಿರೀೆಯಿದೆ.

bidding farewell to
six-decade-old building!
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net