ಬಸವಾದಿ ಹಿಂದೂ ಸಮಾವೇಶ ರದ್ದುಗೊಳಿಸಿ

ಯಾದಗಿರಿ: ಶಹಾಪುರದಲ್ಲಿ ಮೇ 19ರಂದು ಹಮ್ಮಿಕೊಂಡ ಬಸವಾದಿ ಶರಣರ ಹಿಂದೂ ಸಮಾವೇಶ ರದ್ದು ಪಡಿಸಬೇಕು ಎಂದು ಸೌಹಾರ್ದ ಕರ್ನಾಟಕ ಸಂಟನೆಯ ಪದಾಧಿಕಾರಿಗಳು ಆಗ್ರಹಿಸಿದ್ದಾರೆ.

ಈ ಕುರಿತು ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಟನೆಯ ನೀಲಾ ಕೆ., ಪ್ರೊ.ಆರ್​.ಕೆ.ಹುಡಗಿ, ಡಾ.ಮೀನಾಕ್ಷಿ, ಹಿಂದೂ ಸಮಾವೇಶ, ಬಸವಾದಿ ಶರಣರ ಸಮಾವೇಶ ಮಾಡಲಿ, ಆದರೆ ಬಸವಾದಿ ಶರಣರನ್ನು ಹಿಂದೂ ಎಂಬ ಕೋಮುವಾದಿ ಚೌಕಟ್ಟಿನಲ್ಲಿ ಬಂಧಿಸಲು ಹೊರಟಿರುವ ಕೆಲವರು ಮತ್ತು ಕೆಲ ಮಠಾಧೀಶರನ್ನು ಬಳಸಿಕೊಂಡು ಬಸವಾದಿ ಶರಣರ ಹಿಂದೂ ಸಮಾವೇಶ ಎಂದು ಹೊಸ ಹೆಸರಿಟ್ಟು, ಆಯೋಜನೆ ಮಾಡಿ ಬಸವಾದಿ ಶರಣರನ್ನು ಕೋಮುವಾದಿಕರಣಗೊಳಿಸುವ ಇಂತಹ ಚಟುವಟಿಕೆ ಸಮಾಜದಲ್ಲಿ ಗೊಂದಲ ಮೂಡಿಸುತ್ತವೆ ಎಂದು ಹೇಳಿದರು.

ಇಂತಹ ಸಮಾವೇಶಗಳು ಸಮಾಜದಲ್ಲಿ ಶಾಂತಿ, ಸುವ್ಯವಸ್ಥೆಗೆ ಧಕ್ಕೆ ಉಂಟು ಮಾಡುವ ಸಂಭವ ಹೆಚ್ಚಾಗಿವೆ. ಬಸವಾದಿ ಶರಣರನ್ನು ಹಿಂದುತ್ವದ ಹೆಸರಿನಲ್ಲಿ ದುರ್ಬಳಕೆ ಮಾಡಿಕೊಳ್ಳಲು ಅವಕಾಶವಿಲ್ಲ. ನಿಜವಾದ ಬಸವತತ್ವ ಅನುಯಾಯಿಗಳು ಎಂದಿಗೂ ಇಂತಹ ಸಮಾವೇಶ ಮಾಡುವುದಿಲ್ಲ ಎಂದು ಅವರು ಹೇಳಿದ್ದಾರೆ. ತಕ್ಷಣವೇ ಆ ಸಮಾವೇಶ ತಡೆಯಬೇಕು. ಇಲ್ಲವಾದರೆ ಬಸವಾಭಿಮಾನಿಗಳು ತಕ್ಕ ಉತ್ತರ ಕೊಡಬೇಕಾಗುತ್ತದೆ ಎಂದು ಅವರು ಎಚ್ಚರಿಕೆ ನೀಡಿದರ್ದಾರೆ.

ಈ ಸಮಾವೇಶಕ್ಕೆ ಜಿಲ್ಲಾ ಉಸ್ತುವಾರಿ ಸಚಿವ ಶರಣಬಸಪ್ಪ ದರ್ಶನಾಪುರ ಅವರನ್ನು ಹೊಗಬಾರದೆಂದು ಮನವಿ ಮಾಡುವುದಾಗಿ ಹೇಳಿದರು. ಜಾಗತಿಕ ಲಿಂಗಾಯತ ಮಹಾಸಭಾದ ಅಧ್ಯಕ್ಷ ಆರ್​.ಜೆ.ಶೆಟಗಾರ, ಆರ್​.ಚನ್ನಬಸ್ಸು ವನದುರ್ಗ ಸೇರಿ ಇತರರಿದ್ದರು.

ಶಹಾಪುರದಲ್ಲಿ ಮೇ 19ರಂದು ಹಮ್ಮಿಕೊಂಡ ಬಸವಾದಿ ಶರಣರ ಹಿಂದೂ ಸಮಾವೇಶ ರದ್ದು ಪಡಿಸಬೇಕೆಂದು ಆಗ್ರಹಿಸಿ ಸೌಹಾರ್ದ ಕರ್ನಾಟಕ ಸಂಟನೆ ಪದಾಧಿಕಾರಿಗಳು ಜಿಲ್ಲಾಧಿಕಾರಿ ಹರ್ಷಲ್​ ಬೋಯರ್​ ಮತ್ತು ಎಸ್​ಪಿ ಪೃಥ್ವಿಕ್​ ಶಂಕರ್​ ಅವರಿಗೆ ಶನಿವಾರ ಭೇಟಿ ಮಾಡಿ ಮನವಿ ಸಲ್ಲಿಸಿದರು. ಸಂಟನೆಯ ನೀಲಾ ಕೆ. ಪ್ರೋ.ಆರ್​.ಕೆ.ಹುಡಗಿ, ಡಾ.ಮೀನಾಕ್ಷಿ, ಜಾಗತಿಕ ಲಿಂಗಾಯತ ಮಹಾಸಭಾದ ಅಧ್ಯಕ್ಷ ಆರ್​.ಜೆ.ಶೆಟಗಾರ, ಆರ್​.ಚನ್ನಬಸ್ಸು ವನದುರ್ಗ, ಗಿರಿಯಪ್ಪಗೌಡ ಬಾಣತಿಹಾಳ, ಶಿವಣ್ಣ ಇಜೇರಿ, ಮಲ್ಲಿಕಾರ್ಜುನ ಸತ್ಯಂಪೇಟ್​, ಚನ್ನಪ್ಪ ಆನೆಗುಂದಿ, ಬಸವರಾಜ ಕೋಣಿನ್​, ಶಾಂತಪ್ಪ ಪಾಟೀಲ್​, ಅನೀತಾ ಹಿರೇಮಠ, ಬಸವಲಿಂಗಮ್ಮ ನಾಟೇಕರ್​, ಈರಮ್ಮ ಹಯ್ಯಾಳಕರ ಇತರರಿದ್ದರು.