ವಡ್ಡೆಯಿಂದ ಶಾಸಕ ಚವ್ಹಾಣ್​ ಹೆಸರು ಕೆಡಿಸುವ ಯತ್ನ

ಔರಾದ್​: ಗುರುನಾಥ ವಡ್ಡೆಯವರು ಅನಾವಶ್ಯಕವಾಗಿ ಶಾಸಕ ಪ್ರಭು ಚವ್ಹಾಣ್​ ಹೆಸರು ಕೆಡಿಸುವ ಪ್ರಯತ್ನ ಮಾಡುತ್ತಿದ್ದಾರೆ ಎಂದು ಪಟ್ಟಣ ಪಂಚಾಯಿತಿ ಮಾಜಿ ಸದಸ್ಯ ದಯಾನಂದ ಘೂಳೆ ಆರೋಪಿಸಿದರು.

ಪಟ್ಟಣದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಪರಿಹಾರಕ್ಕಾಗಿ ಶಾಸಕ ಚವ್ಹಾಣ್​ ನಿರಂತರವಾಗಿ ಶ್ರಮಿಸುತ್ತಿದ್ದಾರೆ. ಕ್ಷೇತ್ರದ ಸಮಗ್ರ ಅಭಿವೃದ್ಧಿಗೆ ಸಾಕಷ್ಟು ಕೊಡುಗೆ ನೀಡಿದ್ದಾರೆ. ಹಾಲಹಳ್ಳಿ ಬ್ಯಾರೇಜ್​ನಿಂದ ಪಟ್ಟಣಕ್ಕೆ ನೀರು ಪೂರೈಸಲು 32 ಕೋಟಿ ರೂ. ವೆಚ್ಚದ ಯೋಜನೆಯನ್ನು ಜಾರಿಗೊಳಿಸಿದ್ದಾರೆ. ಪಟ್ಟಣದಲ್ಲಿ ನೀರಿನ ಲಭ್ಯತೆ ಮತ್ತಷ್ಟು ಸುಧಾರಿಸಲು ಕಾರಂಜಾ ಜಲಾಶಯದಿಂದ ನೀರು ಪೂರೈಸುವ 84 ಕೋಟಿ ರೂ. ಯೋಜನೆ ತಂದಿದ್ದಾರೆ. ಕಳೆದ 3.5 ವರ್ಷಗಳಿಂದ ಕಾಮಗಾರಿ ಮಂದಗತಿಯಲ್ಲಿ ನಡೆಯುತ್ತಿದೆ ಇಂಥವುಗಳಿಗೆ ಯಾಕೆ ಹೋರಾಟ ಮಾಡುತ್ತಿಲ್ಲ ಎಂದು ಸುದ್ದಿಗೋಷ್ಠಿಯಲ್ಲಿ ಪ್ರಶ್ನಿಸಿದ್ದಾರೆ.

ಪ್ರಸ್ತುತ ಮೋಟಾರ್​ ಸುಟ್ಟಿರುವ ಕಾರಣ ನೀರು ಸರಬರಾಜಿನಲ್ಲಿ ವ್ಯತ್ಯಯ ಉಂಟಾಗಿದೆ. ಇದು ತಾಂತ್ರಿಕ ಸಮಸ್ಯೆಯಾಗಿದ್ದು, ಇದನ್ನು ರಾಜಕೀಯವಾಗಿ ಬಿಂಬಿಸುವುದು ಸರಿಯಲ್ಲ. ಪುರಸಭೆಗೆ ಸದ್ಯ ಆಡಳಿತಾಧಿಕಾರಿಗಳನ್ನು ನೇಮಕ ಮಾಡಲಾಗಿದ್ದು, ಜಿಲ್ಲಾಧಿಕಾರಿ, ಮುಖ್ಯಾಧಿಕಾರಿಗಳು ಸೇರಿ ಅಧಿಕಾರಿಗಳ ತಂಡ ಕಾರ್ಯನಿರ್ವಹಿಸುತ್ತಿದೆ. ಸಮಸ್ಯೆಯನ್ನು ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕೆ ತರದೆ ನೇರವಾಗಿ ವಡ್ಡೆ ಅವರು ಶಾಸಕರ ಹೆಸರನ್ನು ಪ್ರಸ್ತಾಪಿಸುವುದು ಸಮಂಜಸವಲ್ಲ ಎಂದಿದ್ದಾರೆ.

ಮುಖಂಡ ಪ್ರಕಾಶ ಅಲ್ಮಾಜೆ ಮಾತನಾಡಿ, ಗುರುನಾಥ ವಡ್ಡೆಯವರು ಕಾಣದ ಕೈಗಳ ಆಮಿಷಕ್ಕೆ ಒಳಗಾಗಿ ಪಾದಯಾತ್ರೆ ಕೈಗೊಂಡಿದ್ದಾರೆಂಬ ಅನುಮಾನಗಳು ಮೂಡುತ್ತಿವೆ. ಶಾಸಕರು ಮಾಡುವ ಪ್ರತಿ ಕೆಲಸಗಳಿಗೂ ಪಿಐಎಲ್​, ಲೋಕಾಯುಕ್ತಕ್ಕೆ ದೂರುಗಳನ್ನು ಕೊಡುವ ತಾವು ಸಮಾಜ ಸೇವಕರೆಂಬ ಹೆಸರಿನಲ್ಲಿ ಅಭಿವೃದ್ಧಿ ಕೆಲಸಗಳಿಗೆ ತಡೆಯೊಡ್ಡುವ ಕೆಲಸ ಮಾಡುತ್ತಿದ್ದೀರಿ. ಇವರಿಂದ ಅಧಿಕಾರಿಗಳು ಕಿರುಕುಳ ಎದುರಿಸುವಂತಾಗಿದೆ ಎಂದು ಆರೋಪಿಸಿದ್ದಾರೆ.

ಯಾದು ಮೇತ್ರೆ ಮಾತನಾಡಿ, ನಾವು ಎದುರಿಸುವ ಪ್ರತಿ ಸಮಸ್ಯೆಗೆ ನೇರವಾಗಿ ಮುಖ್ಯಮಂತ್ರಿ, ಸಚಿವರು, ಶಾಸಕರು, ಸಂಸದರ ವಿರುದ್ಧ ಹೋರಾಟಕ್ಕೆ ಇಳಿಯಲು ಆಗುವುದಿಲ್ಲ. ಅದಕ್ಕೆಂದ ಅಧಿಕಾರಿಗಳ ವ್ಯವಸ್ಥೆಯಿದೆ. ಮುಖ್ಯಾಧಿಕಾರಿಯ ತಪ್ಪಿನಿಂದಾಗಿ ಔರಾದ್​ ಪಟ್ಟಣದಲ್ಲಿ ಕೆಲ ದಿನಗಳಿಂದ ನೀರಿನ ಸಮಸ್ಯೆಯಾಗುತ್ತಿದೆ. ಅದನ್ನು ಸರಿಪಡಿಸುವ ಕೆಲಸ ನಡೆಯುತ್ತಿದೆ. ಬೇಗ ಸರಿಪಡಿಸಿ ಜನತೆಗೆ ಅನುಕೂಲ ಕಲ್ಪಿಸಲು ಎಲ್ಲರೂ ಪ್ರಯತ್ನಿಸೋಣ. ಅದನ್ನು ಬಿಟ್ಟು ನೇರವಾಗಿ ಶಾಸಕರ ಹೆಸರನ್ನು ಕೆಡಿಸಲು ಯತ್ನಿಸುವುದು ಸರಿಯಲ್ಲ ಎಂದು ಖಂಡಿಸಿದ್ದಾರೆ.

ಬಸವರಾಜ ಹಳ್ಳೆ ಮಾತನಾಡಿ, ಮೋಟಾರ್​ ಸುಟ್ಟಿರುವಂತಹ ಸಣ್ಣ ವಿಷಯವನ್ನು ಆಧಾರವಾಗಿಟ್ಟುಕೊಂಡು ಪಾದಯಾತ್ರೆ ನಡೆಸಲು ಮುಂದಾಗಿರುವ ಗುರುನಾಥ ವಡ್ಡೆಯವರ ನಡೆ ಶಾಸಕರ ಹೆಸರು ಕೆಡಿಸುವ ಉದ್ದೇಶ ಹೊಂದಿರುವಂತೆ ಕಾಣುತ್ತಿದೆ ಎಂದು ಹೇಳಿದರು. ಮುಖಂಡರಾದ ಗುಂಡಪ್ಪ ಮುಧಾಳೆ, ಕೇರಬಾ ಪವಾರ್​, ಸಂಗಮೇಶ ದೇಶಮುಖ ಇದ್ದರು.