11ಕ್ಕೆ ಬರೋದು, ನಾಲ್ಕು ಗಂಟೆ ಹೊರಡೋದು!

ಕಾಳಗಿ: ಇಲ್ಲಿನ ತಹಸಿಲ್​ ಕಚೇರಿಯಲ್ಲಿ ಸರ್ಕಾರಿ ನೌಕರರು ಆಡಿದ್ದೆ ಆಟವಾಗಿದೆ. ಸರಿಯಾದ ಸಮಯಕ್ಕೆ ಬರಲ್ಲ, ಜನರ ಸಮಸ್ಯೆ ಕೇಳುವವರಿಲ್ಲ. ಕೆಲಸಕ್ಕಾಗಿ ಸುಮ್ಮನೆ ಅತ್ತಿತ್ತ ಅಲೆದಾಡಿಸುವುದು ಸಾಮಾನ್ಯವಾಗಿದೆ.

ನೂತನ ತಾಲೂಕು ಕೇಂದ್ರದಲ್ಲಿ ಹೆಸರಿಗೆ ಮಾತ್ರ ತಹಸಿಲ್​ ಕಚೇರಿ ಎನ್ನುವಂತಾಗಿದೆ. ಕೆಲಸಕ್ಕಾಗಿ ನಿತ್ಯವೂ ಸಾರ್ವಜನಿಕರು ಅಲೆದಾಡುವುದು ತಪ್ಪಿಲ್ಲ. ಬೆಳಗ್ಗೆ 10 ಗಂಟೆಯೊಳಗೆ ಎಲ್ಲ ಸಿಬ್ಬಂದಿ ಕೆಲಸಕ್ಕೆ ಹಾಜರಾಗಬೇಕು ಎಂಬ ಆದೇಶವಿದೆ. ಆದರೆ ಈ ನಿಯಮವನ್ನು ಯಾರೊಬ್ಬರೂ ಪಾಲಿಸುವುದಿಲ್ಲ. ಕೆಲವರು 10.30ಕ್ಕೆ ಬಂದರೆ, ಬಹುತೇಕರು 11 ಗಂಟೆ ನಂತರವೇ ಕಚೇರಿಯಲ್ಲಿ ದರ್ಶನ ನೀಡುತ್ತಾರೆ. ಇದರಿಂದ ಜನರು ಪರದಾಡುವಂತಾಗಿದೆ.

11ಗಂಟೆ ಮೇಲೆ ಬರೋದು, ಕರೆಕ್ಟ್​ 1 ಗಂಟೆಗೆ ಊಟಕ್ಕೆ ಹೋಗಿ ಬಿಡೋದು. ಊಟ ಮುಗಿಸಿ ಬರುತ್ತಿದ್ದಂತೆ ಒಂದಿಷ್ಟು ಕೆಲಸ ಮಾಡಿ ಸಂಜೆ 4 ಗಂಟೆಗೆ ಕಚೇರಿಯಿಂದ ಮನೆಯತ್ತ ಹೋಗಿಬಿಡೋದು. ಇದು ಬಹುತೇಕ ಅಧಿಕಾರಿಗಳ ನಿತ್ಯದ ಟೈಮ್​ಟೇಬಲ್​ ಆಗಿದೆ. ಬಹುತೇಕ ಅಧಿಕಾರಿ ಹಾಗೂ ನೌಕರರು 4-5 ಗಂಟೆ ತಮ್ಮ ಕಚೇರಿಯ ಸೀಟ್​ನಲ್ಲಿ ಕುಳಿತುಕೊಳ್ಳುವುದೇ ಇಲ್ಲ. ಯಾವಾಗಲೂ ಖಾಲಿ ಕುರ್ಚಿಗಳೇ ಜನರನ್ನು ಸ್ವಾಗತಿಸುತ್ತವೆ. ಯಾವಾಗ ಬರುತ್ತಾರೊ? ಯಾವಾಗ ವಾಪಸ್​ ಹೋಗುತ್ತಾರೊ ? ತಿಳಿಯುವುದಿಲ್ಲ. ಪ್ರತಿದಿನ ಕೆಲಸಕ್ಕಾಗಿ ಸಾವಿರಾರು ಜನ ದೂರದ ಊರುಗಳಿಂದ ತಹಸಿಲ್​ ಕಚೇರಿಗೆ ಬಂದು ಕೆಲಸವಾಗದೆ ವಾಪಸ್​ ಹೋಗುವಂತಾಗಿದೆ ಎಂದು ಜನರು ಹಿಡಿಶಾಪ ಹಾಕುತ್ತಿದ್ದಾರೆ.

ಬಹುತೇಕ ಅಧಿಕಾರಿಗಳು ಕೆಲಸ ಮಾಡಿಕೊಡಿ ಎಂದು ಬರುವ ಸಾರ್ವಜನಿಕರನ್ನು ಸುಮ್ಮನೆ ಅಲೆದಾಡಿಸುತ್ತಾರೆ. ಕಂದಾಯ ವಿಭಾಗಕ್ಕೆ ಬಂದರೆ ತಹಸೀಲ್ದಾರ್​ ಅವರನ್ನು ಕೇಳಿ ಅಂತಾರೆ, ಅವರು ಎಸಿಗೆ ಕಚೇರಿಗೆ ಹೋಗಿ, ಇವರು ಡಿಸಿ ಕಚೇರಿಯಲ್ಲಿ ಕೆಲಸವಾಗುತ್ತದೆ ಎನ್ನುತ್ತಾರೆ. ಕೊನೆಗೆ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಕೇಳಿದರೆ ತಹಸಿಲ್​ ಕಚೇರಿಯಲ್ಲೇ ಕೆಲಸ ಮಾಡಿಕೊಳ್ಳಿ ಎನ್ನುತ್ತಾರೆ. ಹೀಗಾಗಿ ಅಲೆದಾಡಿ ಸಾಕಾಗಿದೆ. ಇದರ ಜತೆಗೆ ಕಚೇರಿಯಲ್ಲಿ ಹಣ ನೀಡಿದರೆ ಮಾತ್ರ ಕೆಲಸ ಆಗುತ್ತದೆ ಎಂದು ದೂರುತ್ತಾರೆ ರೈತಾಪಿ ವರ್ಗ.

"

ಅಧಿಕಾರಿಗಳು ಎಚ್ಚೆತ್ತುಕೊಂಡು ಸಮಯಕ್ಕೆ ಸರಿಯಾಗಿ ಕಚೇರಿಗೆ ಹಾಜರಾಗಿ ಸಾರ್ವಜನಿಕರ ಕೆಲಸಗಳನ್ನು ಸುಗಮವಾಗಿ ಮಾಡಿಕೊಡಬೇಕು. ಇಲ್ಲದಿದ್ದಲಿ ತಹಸಿಲ್​ ಕಚೇರಿಗೆ ಬೀಗ ಹಾಕಿ ಹೋರಾಟ ಮಾಡಬೇಕಾಗುತ್ತದೆ.

— > ವೀರಣ್ಣ ಗಂಗಾಣಿ, ತಾಲೂಕು ಅಧ್ಯಕ್ಷ, ರಾಜ್ಯ ರೈತ ಸೇನೆ ಮತ್ತು ರೈತ ಸಂಘ