ಬೆಂ.ವಿವಿಯಲ್ಲಿ ರ‍್ಯಾಗಿಂಗ್ ವಿರೋಧಿ ಸಮಿತಿ ರಚನೆ

ಈ ಸಮಿತಿಯು ವಿಶ್ವವಿದ್ಯಾಲಯ ಹಂತದಲ್ಲಿ ಕಾರ್ಯನಿರ್ವಹಿಸಲಿದೆ. ರ‍್ಯಾಗಿಂಗ್ ಮುಕ್ತ ವಾತಾವರಣ ಕಲ್ಪಿಸುವುದು, ವಿದ್ಯಾರ್ಥಿನಿಯರು ನಿರ್ಭೀತಿಯಿಂದ ಕಾಲೇಜಿಗೆ ಹಾಜರಾಗುವಂತೆ ಮಾಡುವುದು ಹಾಗೂ ವಿದ್ಯಾರ್ಥಿನಿಯರು ಮುಕ್ತವಾಗಿ ಅಭಿಪ್ರಾಯ ಹಂಚಿಕೊಳ್ಳಲು ವೇದಿಕೆ ಕಲ್ಪಿಸುವುದಾಗಿದೆ.

ವಿಶ್ವವಿದ್ಯಾಲಯದ ಕಾನೂನು ಕಾಲೇಜಿನ ಡೀನ್ ಪ್ರೊ. ಸತೀಶ್ ಗೌಡ ನೇತೃತ್ವದಲ್ಲಿ ಸಮಿತಿ ರಚಿಸಲಾಗಿದೆ. ವಿಶ್ವವಿದ್ಯಾಲಯದ ಇತರೆ 5 ವಿಭಾಗಗಳ ಪ್ರಾಧ್ಯಾಪಕರು, ಸಹಾಯಕ ಪ್ರಾಧ್ಯಾಪಕರನ್ನು ಸದಸ್ಯರನ್ನಾಗಿ ನೇಮಿಸಲಾಗಿದೆ. ವಿದ್ಯಾರ್ಥಿ ಕ್ಷೇಮಾಭಿವೃದ್ಧಿ ನಿರ್ದೇಶನಾಲಯದ ನಿರ್ದೇಶಕರನ್ನು ಕಾರ್ಯದರ್ಶಿಯಾಗಿ ನೇಮಿಸಲಾಗಿದೆ.

ವಿದ್ಯಾರ್ಥಿ ಪ್ರತಿನಿಧಿ, ಪೊಲೀಸ್ ಆಡಳಿತ, ಮಾಧ್ಯಮ, ಎನ್‌ಜಿಒಗಳನ್ನು ಅವಶ್ಯವಿದ್ದಲ್ಲಿ ಸಭೆಗೆ ಕರೆಯಬಹುದು ಎಂದು ತಿಳಿಸಲಾಗಿದೆ.

ವಿಶ್ವವಿದ್ಯಾಲಯದಲ್ಲಿನ ಕಲಿಕಾ ವಾತಾವರಣ ಹಾಗೂ ರ‌್ಯಾಗಿಂಗ್ ಪ್ರಕರಣಗಳು ಸಂಬಂಧಿಸಿದ್ದಲ್ಲಿ ಅಂತಹ ಘಟನೆಗಳ ಕುರಿತಂತೆ ಸಮಿತಿಯು ಯುಜಿಸಿಗೆ ವರದಿ ಮಾಡಲಿದೆ.