ಪುಟ್​ಪಾತ್​ ಮೇಲೆ ವಿದ್ಯುತ್​ ಕಂಬ!

ಶಹಾಬಾದ್​: ಪಟ್ಟಣದ ಸಮಗ್ರ ಅಭಿವೃದ್ಧಿಗಾಗಿ ಸರ್ಕಾರ ನೀಡಿದ ಅನುದಾನವನ್ನು ಅವೈಜ್ಞಾನಿಕ ಕಾಮಗಾರಿಗಳಿಗೆ ಪೋಲು ಮಾಡುವ ಮೂಲಕ ಇಲ್ಲಿನ ನಗರಸಭೆ ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗಿದೆ.

ನಗರೋತ್ಥಾನ&4 ಯೋಜನೆಯಡಿ ಸುಮಾರು 1.5 ಕೋಟಿ ರೂ. ವೆಚ್ಚದಲ್ಲಿ ಪ್ರಮುಖ ಬೀದಿಗಳಲ್ಲಿ ಹೊಸ ವಿದ್ಯುತ್​ ಕಂಬ ಹಾಗೂ ದೀಪ ಅಳವಡಿಸುವ ಕಾಮಗಾರಿ ಇದಾಗಿದೆ. ಆದರೆ ಅಧಿಕಾರಿಗಳ ನಿಷ್ಕಾಳಜಿಯಿಂದಾಗಿ ಈಗಾಗಲೇ ವಿದ್ಯುತ್​ ಕಂಬಗಳಿಂದ್ದರೂ ಮತ್ತೊಂದು ಕಂಬಗಳನ್ನು ಹಾಕುವ ಮೂಲಕ ಸರ್ಕಾರದ ಹಣ ಪೋಲು ಮಾಡುವ ಕೆಲಸವಾಗುತ್ತಿದೆ. ಯೋಜನೆಯಡಿ ನಗರದ ನೆಹರೂ ವೃತ್ತದಿಂದ ಶ್ರೀ ಶರಣಬಸವೇಶ್ವರ ದೇವಸ್ಥಾನ ಹಾಗೂ ನೆಹರೂ ವೃತ್ತದಿಂದ ಹೊನಗುಂಟಾ ರಸ್ತೆಯ ಎರಡು ಬದಿಯಲ್ಲಿ ವಿದ್ಯುತ್​ ಕಂಬಗಳನ್ನು ಅಳವಡಿಸಲು ನೆಲ ಅಗೆಯಲಾಗಿದ್ದು, ಕಾಂಕ್ರಿಟ್​ ಹಾಕಿ ಪುಟಿಂಗ್​ ಮಾಡಲಾಗಿದೆ.

ಕೆಲವೆಡೆ ಪುಟ್​ಪಾತ್​ದಿಂದ ಒಂದು ಅಡಿ ದೂರದಲ್ಲಿ ನೆಲ ಅಗೆದರೆ, ಕೆಲ ಸ್ಥಳದಲ್ಲಿ ಪುಟ್​ಪಾತ್​ ಅನ್ನೇ ಅಗೆದು ಪುಟಿಂಗ್​ ಹಾಕಲಾಗಿದೆ. ಇನ್ನು ಕೆಲವೆಡೆ ಅರ್ಧ ಪುಟಪಾತ್​ ಹಾಗೂ ಅರ್ಧ ರಸ್ತೆ ಮೇಲೆ ಪುಟಿಂಗ್​ ಹಾಕಲು ನೆಲ ಅಗೆಯಲಾಗಿದೆ. ಈ ಹಿಂದೆ ಜನರಿಗೆ ಅನುಕೂಲವಾಗಲಿ ಎಂದು ಒತ್ತುವರಿ ತೆರವು ಕಾರ್ಯಾಚರಣೆ ನಡೆಸಿ ಸಾಕಷ್ಟು ಮನೆ, ಅಂಗಡಿಗಳನ್ನು ಒಡೆದು ಪುಟ್​ಪಾತ್​ ಹಾಗೂ ಚರಂಡಿ ನಿರ್ಮಿಸಲಾಗಿದೆ. ಆದರೆ ಇದೀಗ ವಿದ್ಯುತ್​ ಕಂಬ ನೆಪದಲ್ಲಿ ಅಧಿಕಾರಿಗಳೇ ಪುಟ್​ಪಾತ್​ ಅತಿಕ್ರಮಣಕ್ಕೆ ಮುಂದಾಗಿದ್ದಾರೆ ಎಂಬುದು ಜನರ ಆರೋಪವಾಗಿದೆ.

ಈಗಲಾದರೂ ಸಂಬಂಧಪಟ್ಟ ಅಧಿಕಾರಿಗಳು ಗಮನಗರಿಸಿ ಅವೈಜ್ಞಾನಿಕ ಕಾಮಗಾರಿಗೆ ಬ್ರೇಕ್​ ಹಾಕುವ ಮೂಲಕ ಸರ್ಕಾರದ ಹಣ ಪೋಲಾಗುವುದನ್ನು ನಿಲ್ಲಿಸಬೇಕಿದೆ ಎಂಬುದು ಸ್ಥಳಿಯರ ಒತ್ತಾಯವಾಗಿದೆ.

ಶಹಾಬಾದ್​ನಲ್ಲಿನ ಎಲ್ಲ ವಿದ್ಯುತ್​ ಕಂಬಗಳಿಗೆ ಎಲ್​ಇಡಿ ದೀಪ ಅಳವಡಿಸಬೇಕೆಂದು ಸರ್ಕಾರ ಸಿಸಿಎಂಸಿ ಯೋಜನೆಯಡಿ 2 ಕೋಟಿ ರೂ. ಮಂಜೂರು ಮಾಡಿದೆ. ಈಗಾಗಲೇ ಕಂಬಗಳ ಎಣಿಕೆ ಮಾಡಿ ವರದಿ ಸಲ್ಲಿಸಲಾಗಿದೆ. ಜಿಲ್ಲಾ ಮಟ್ಟದಲ್ಲಿ ಟೆಂಡರ್​ ಪ್ರಕ್ರಿಯೆ ಆಗಿದ್ದು, ಶ್ರೀದಲ್ಲಿಯೇ ಎಲ್ಲ ಹಳೇ ಕಂಬಗಳಿಗೆ ಮತ್ತೆ ವಿದ್ಯುತ್​ ದೀಪ ಅಳವಡಿಸಲಾಗುತ್ತದೆ. ಹೀಗಿರುವಾಗ ನಗರೋತ್ಥಾನ ಯೋಜನೆಯಡಿ ಹೊಸ ಕಂಬ ಅಳವಡಿಕೆ ಎಷ್ಟರ ಮಟ್ಟಿಗೆ ಸರಿ ಎಂಬುವುದು ಜನರ ಪ್ರಶ್ನೆಯಾಗಿದೆ.