ಮಹಿಳೆಯ ಸುರಕ್ಷತೆಗೆ ಅಕ್ಕ ಪಡೆ ಸಕ್ರಿಯ

ಬಸವಕಲ್ಯಾಣ: ಮಹಿಳೆಯರಿಗೆ ರಕ್ಷಣೆ ಮತ್ತು ಸುರಕ್ಷತೆ ಒದಗಿಸುವ ಉದ್ದೇಶದಿಂದ ಅಕ್ಕಪಡೆ ಸಕ್ರಿಯವಾಗಿದೆ ಎಂದು ಅಕ್ಕಪಡೆ ರಾಜ್ಯ ಸಂಯೋಜಕಿ ಶೈನಿ ಪ್ರದಿಪ್​ ಗುಂಟಿ ಹೇಳಿದರು.

ನಗರದ ಶ್ರೀ ಬಸವೇಶ್ವರ ಪದವಿ ಪೂರ್ವ ಹಾಗೂ ಪದವಿ ಕಾಲೇಜಿನಲ್ಲಿ ಬೀದರ್​ ಪೊಲೀಸ್​ ಇಲಾಖೆಯ ಬೀದರ ಅಕ್ಕಪಡೆ ವತಿಯಿಂದ ಮಂಗಳವಾರ ಏರ್ಪಡಿಸಿದ್ದ ಅಕ್ಕಪಡೆ ಕ್ಯೂಆರ್​ ಕೋಡ್​ ತಂತ್ರಜ್ಞಾನದ ಪ್ರಾಯೋಗಿಕ ಪರೀಕ್ಷೆ ಮತ್ತು ವಿದ್ಯಾರ್ಥಿಗಳೊಂದಿಗೆ ಸಂವಾದ ಸಮಾರಂಭದಲ್ಲಿ ಮಾತನಾಡಿದ ಅವರು, ಸಾರ್ವಜನಿಕ ಮತ್ತು ವೈಯಕ್ತಿಕ ವಲಯದಲ್ಲಿ ಮಹಿಳೆಯರ ಮೇಲೆ ನಡೆಯುತ್ತಿರುವ ದೌರ್ಜನ್ಯ ತಡೆಯಲು ಮತ್ತು ದೌರ್ಜನ್ಯದಿಂದ ಪಾರಾಗಲು ಪೊಲೀಸ್​ ಇಲಾಖೆಗೆ ತಿಳಿಸುವ ದಾರಿಯಾಗಿ ಕ್ಯೂಆರ್​ ಕೋಡ್​ ನ ಹೊಸ ತಂತ್ರಜ್ಞಾನ ಪರಿಚಯಿಸಲಾಗುತ್ತಿದೆ ಎಂದರು.

ಶಿಕ್ಷಣ ಮತ್ತು ಅರಿವಿನಿಂದ ಜಾಗೃತ ಸಮಾಜ ನಿಮಾರ್ಣವಾಗುತ್ತದೆ. ಅಕ್ಷರ ಜಗತ್ತಿಗೆ ತೆರೆದುಕೊಳ್ಳುವ ಮೂಲಕ ಸ್ತ್ರೀ ಲೋಕ ಸಬಲೀಕರಣಗೊಳ್ಳುತ್ತದೆ. ಶೈಕ್ಷಣಿಕ ಸಾಧನೆಯಿಂದ ಮಹಿಳೆಯರಿಗೆ ಅಸ್ತಿತ್ವ, ಸಮಾಜದಲ್ಲಿ ಉನ್ನತ ಸ್ಥಾನ- ಮಾನ ಕಂಡುಕೊಳ್ಳಲು ಸಾಧ್ಯವಾಗುತ್ತದೆ ಎಂದು ಹೇಳಿದರು.

ಸಿಪಿಐ ಅಲಿಸಾಬ್​ ಮಾತನಾಡಿ, ಮಹಿಳೆಯರ ಮೇಲಿನ ಯಾವುದೇ ಬಗೆಯ ಹಿಂಸೆಯನ್ನು ಗೌಪ್ಯವಾಗಿ ಪೊಲೀಸ್​ ಇಲಾಖೆಗೆ ಸಲ್ಲಿಸಲು ಅಕ್ಕಪಡೆಯಿಂದ ಕ್ಯೂಆರ್​ ತಾಂತ್ರಿಕವಾಗಿ ನಿರ್ಮಿಸಲಾಗಿದೆ. ಇದರ ಪರೀಕ್ಷಾರ್ಥ ಪ್ರಯೋಗಿಕವಾಗಿ ಉಪಯೋಗಿಸಲಾಗಿದೆ. ಅದರ ಉಪಯುಕ್ತತೆ ಎಲ್ಲರೂ ಪಡೆಯಲಿ. ಅದಕ್ಕೂ ಮೊದಲು ತಾಂತ್ರಿಕ ಅನುಕೂಲತೆ ಮತ್ತು ಅನಾನುಕೂಲ ಕುರಿತು ಮಾಹಿತಿ ನೀಡಿ ಎಂದರು.

ಬಸವೇಶ್ವರ ಪಿಯು ಕಾಲೇಜು ಪ್ರಾಚಾರ್ಯ ಡಾ ರುದ್ರಮಣಿ ಮಠಪತಿ, ಶ್ರೀ ಬಸವೇಶ್ವರ ಪದವಿ ಕಾಲೇಜು ಪ್ರಾಚಾರ್ಯ ಡಾ ಭೀಮಾಶಂಕರ ಬಿರಾದಾರ ಅವರು ಮಾತನಾಡಿ, ಪೋಲಿಸ್​ ವರಿಷ್ಠ್ಠಾಧಿಕಾರಿ ಪ್ರದಿಪ್​ ಗುಂಟಿ ಮಾರ್ಗದರ್ಶನ ಮತ್ತು ಸತತ ಪ್ರಯತ್ನದ ಫಲವಾಗಿ ಅಕ್ಕಪಡೆಯವರ ಶ್ರಮ ಮತ್ತು ಚಾಕಚಕ್ಯತೆ ರಾಜ್ಯದ ಗಮನ ಸೆಳೆದಿದೆ. ಶಾಲಾ ಕಾಲೇಜು ವಿದ್ಯಾರ್ಥಿನಿಯರಿಗೆ, ಮಹಿಳೆಯರಿಗೆ ಅಪರಾಧದ ಸ್ವರೂಪದ ಬಗ್ಗೆ ಅರಿವು ಮೂಡಿಸುವ ಅಕ್ಕಪಡೆ ಮತ್ತು ಪೊಲೀಸ್​ ಇಲಾಖೆ ಕೆಲಸ ಶ್ಲಾಘನೀಯ ಎಂದು ಹೇಳಿದರು.

ಎಎಸ್​ಐ ಕನ್ಯಾಕುಮಾರಿ, ಬೀದರ್​ ಅಕ್ಕಪಡೆಯ ಸಂಗೀತಾ, ತಾಂತ್ರಿಕ ವಿಭಾಗದ ವೈಭವ, ಮಂಜುಳಾ, ಅಕ್ಕಮಹಾದೇವಿ ಕಾಲೇಜು ಪ್ರಾಚಾಯೆರ್ ಮಾಯಾ ಮುರಾಳೆ, ಬಸವೇಶ್ವರ ಪಿಜಿ ಕಾಲೇಜು ಪ್ರಾಚಾಯೆರ್ ಡಾ.ಶಾಂತಲಾ ಪಾಟೀಲ ಇದ್ದರು. ಅಕ್ಕಪಡೆಯ ಕರ್ನಾಟಕ ರಾಜ್ಯ ಸಂಯೋಜಕಿ ಶೈನಿ ಪ್ರದಿಪ್​ ಗುಂಟಿ, ಸಿಪಿಐ ಅಲಿಸಾಬ್​ ವಿದ್ಯಾರ್ಥಿನಿಗಳೊಂದಿಗೆ ಸಂವಾದ ನಡೆಸಿದರು.