ಕಾಣೆಯಾದ ಪ್ರಕರಣದಲ್ಲಿ ಗಣನೀಯ ಹೆಚ್ಚಳ

ನ್ಯಾಷನಲ್​ ಕ್ರ್ಯೆಂ ರೆಕಾರ್ಡ್ಸ್​ ಬ್ಯೂರೋ (ಎನ್​ಸಿಆರ್​ಬಿ) ವರದಿ ಪ್ರಕಾರ ಕಲ್ಯಾಣ ಕರ್ನಾಟಕ ಪ್ರದೇಶದಲ್ಲಿ 2024ರಲ್ಲಿ ನಿತ್ಯ ಐದಾರು ಜನ ಕಾಣೆಯಾಗಿದ್ದಾರೆ. ಹಿಂದಿನ ಮೂರ್ನಾಲ್ಕು ವರ್ಷಕ್ಕೆ ಹೋಲಿಸಿದರೆ ಇದು ಅತಿ ಹೆಚ್ಚು ಪ್ರಕರಣ ಬೆಳಕಿಗೆ ಬಂದ ವರ್ಷ.

2024ರಲ್ಲಿ 704 ಪುರುಷರು, 1402 ಮಹಿಳೆಯರು ಸೇರಿ 2106, 2020ರಲ್ಲಿ 353 ಪುರುಷರು ಸೇರಿ 1080, 2021ರಲ್ಲಿ 941 ಹೆಣ್ಮಕ್ಕಳು ಸೇರಿ 1408, 2022ರಲ್ಲಿ 589 ಪುರುಷರು ಸೇರಿ 1593 ಹಾಗೂ 2023ರಲ್ಲಿ 1150 ಮಹಿಳೆಯರು ಸೇರಿ 1744 ಜನ ಕಾಣೆಯಾಗಿದ್ದಾರೆ.

ಕಲಬುರಗಿ ಜಿಲ್ಲೆಯಲ್ಲಿ 157 ಮಹಿಳೆಯರು ಸೇರಿ 231 ಜನ ಕಾಣೆಯಾಗಿದ್ದಾರೆ. ಕಲಬುರಗಿ ಮಹಾನಗರದಲ್ಲಿ 98 ಪುರುಷರು ಸೇರಿ 265, ಬೀದರ್​ ಜಿಲ್ಲೆಯಲ್ಲಿ 228 ಹೆಣ್ಮಕ್ಕಳು ಸೇರಿ 342, ರಾಯಚೂರಿನಲ್ಲಿ 108 ಪುರುಷರು ಸೇರಿ 312, ವಿಜಯನಗರದಲ್ಲಿ 198 ಮಹಿಳೆಯರು ಸೇರಿ 279, ಕೊಪ್ಪಳಲ್ಲಿ 199 ಹೆಣ್ಮಕ್ಕಳು ಸೇರಿ 278, ಬಳ್ಳಾರಿಯಲ್ಲಿ 107 ಪುರುಷರು ಸೇರಿ 254 ಮತ್ತು ಯಾದಗಿರಿ ಜಿಲ್ಲೆಯಲ್ಲಿ 102 ಹೆಣ್ಮಕ್ಕಳು ಸೇರಿ 145 ಜನ ಕಣ್ಮರೆಯಾಗಿದ್ದಾರೆ. ಕಾಣೆಯಾದ 1402 ಮಹಿಳೆಯರಲ್ಲಿ 173 ಹೆಣ್ಮಕ್ಕಳು 18 ವರ್ಷಕ್ಕಿಂತ ಕಮ್ಮಿ ವಯಸ್ಸಿನವರು ಎಂಬುದು ಅಚ್ಚರಿ ಮೂಡಿಸುವಂಥದ್ದು.

ಅಂಗವೈಕಲ್ಯ, ನೆನಪಿನ ಶಕ್ತಿ ಕುಂದುವಿಕೆ, ಮಾನಸಿಕ ಆರೋಗ್ಯ ಸೇರಿ ಹತ್ತಾರು ಸಾಮಾನ್ಯ ಸಮಸ್ಯೆಗಳೇ ಕಾಣೆಗೆ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಮಾನಸಿಕ ಖಿನ್ನತೆ, ಆತಂಕ, ಸಂಬಂಧ ಕಡಿದುಕೊಳ್ಳುವುದು, ಕೌಟುಂಬಿಕ ಕಲಹ, ಬೆದರಿಕೆ, ಸಾಮಾಜಿಕ ಒತ್ತಡ, ಸಾಲ, ಹಣಕಾಸಿನ ತೊಂದರೆಯೂ ಇಂಥ ಪರಿಸ್ಥಿತಿಗೆ ಕಾರಣವಾಗಲಿದೆ ಎನ್ನಲಾಗಿದೆ.

ರಾಜ್ಯದಲ್ಲೂ ಕಾಣೆಯಾದವರ ಸಂಖ್ಯೆ ಗಣನೀಯ ಏರಿಕೆಯಲ್ಲಿದೆ. ವಿಶೇಷವಾಗಿ ಮಹಿಳೆಯರು ಅಧಿಕ ಸಂಖ್ಯೆಯಲ್ಲಿದ್ದಾರೆ. ಬಹುತೇಕ ಪುರುಷರು, ಮಹಿಳೆಯರು ಮೊಬೈಲ್​ ಬಳಸುವುದರಿಂದ ಸುಲಭವಾಗಿ ಪತ್ತೆ ಮಾಡಬಹುದು. ಆದರೆ ಮಕ್ಕಳ ಪತ್ತೆ ಅಷ್ಟೊಂದು ಸುಲಭದ ಮಾತಲ್ಲ. ರೈಲ್ವೆ ಸ್ಟೇಷನ್​ ಸೇರಿ ಪ್ರಮುಖ ಸ್ಥಳಗಳಲ್ಲಿ ಟ್ರಾಕಿಂಗ್​ ಸೆಂಟರ್​ ಮಾಡಲಾಗಿದೆ. ಹೀಗಾಗಿ ರಾಜ್ಯದಲ್ಲಿ ಪತ್ತೆ ಪ್ರಮಾಣ ಶೇ.76 ಇರುವುದು ಗಮನಾರ್ಹ.

ಬಡತನ, ಒತ್ತಡ, ಮಾನಸಿಕ ಖಿನ್ನತೆ, ನಿರುದ್ಯೋಗ ಸೇರಿ ಹಲವು ಸಮಸ್ಯೆಳಿಂದಾಗಿ ಈ ಪ್ರಕರಣಗಳು ಹೆಚ್ಚುತ್ತಿವೆ. ಪುರುಷ, ಮಹಿಳೆ ಮತ್ತು ಮಕ್ಕಳಲ್ಲಿನ ಸಮಸ್ಯೆ ಗುರುತಿಸಿ ಸೂಕ್ತ ಪರಿಹಾರ ಕಂಡುಕೊಳ್ಳುವುದು ಸೂಕ್ತ. ವಿಶೇಷವಾಗಿ ಒಟ್ಟಾರೆ ಪ್ರಕರಣಗಳಲ್ಲಿ ಮಹಿಳೆಯರೇ ಹೆಚ್ಚಿನ ಸಂಖ್ಯೆಯಲ್ಲಿರುವುದು ಆತಂಕದ ವಿಷಯ. ಮಹಿಳೆಯರು ಜಾಗೃತರಾಗಬೇಕಾಗಿದೆ. ರಾಜ್ಯದಲ್ಲಿ ಟ್ರಾಕಿಂಗ್​ ರೇಟ್​ ಚೆನ್ನಾಗಿದೆ. ಪೊಲೀಸ್​ ಇಲಾಖೆ ಅಭಿನಂದನಾರ್ಹ.

— > ಸಂಗೀತಾ ಕಟ್ಟಿಮನಿ ಸದಸ್ಯೆ, ರಾಜ್ಯ ಯೋಜನಾ ಆಯೋಗ