17 ವರ್ಷದ ಬಾಲಕನ ರೋಬಾಟಿಕ್ ಮೊಣಕಾಲು ಬದಲಿ ಯಶಸ್ವಿ ಶಸ್ತ್ರಚಿಕಿತ್ಸೆ

ಇದೊಂದು ಅತ್ಯಂತ ವಿರಳ ಮತ್ತು ವೈದ್ಯಕೀಯವಾಗಿ ಮಹತ್ವದ ಶಸ್ತ್ರಚಿಕಿತ್ಸೆಯಾಗಿದೆ. ಆಸ್ಟಿಯೋನೆಕ್ರೋಸಿಸ್​ನಿಂದ ಕಂಡುಬಂದಿದ್ದ ತೀವ್ರ ಮೊಣಕಾಲು ನೋವಿನಿಂದ ಬಳಲುತ್ತಿದ್ದ ಬಾಲಕ, ರೋಬಾಟಿಕ್ ನೆರವಿನ ಮೊಣಕಾಲು ಬದಲಿ ಶಸ್ತ್ರಚಿಕಿತ್ಸೆಗೆ ಒಳಗಾದ ವಿಶ್ವದ ಅತ್ಯಂತ ಕಿರಿಯ ರೋಗಿಯಾಗಿದ್ದಾರೆ. ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಅತ್ಯಂತ ವಿರಳವಾಗಿ ಕಂಡುಬರುವ ಈ ಸ್ಥಿತಿಯು ಒಂದು ವರ್ಷಕ್ಕೂ ಹೆಚ್ಚು ಕಾಲ ನಿರಂತರವಾಗಿ ನೋವು ಉಂಟುಮಾಡಿ, ರೋಗಿಯ ದೈಹಿಕ ಚಟುವಟಿಕೆಗಳನ್ನು ತೀವ್ರವಾಗಿ ಸೀಮಿತಗೊಳಿಸಿತ್ತು.

ವಿವರವಾದ ಕ್ಲಿನಿಕಲ್ ಮೌಲ್ಯಮಾಪನ ಮತ್ತು ಚಿತ್ರಣದ ನಂತರ ಮೂಳೆಚಿಕಿತ್ಸೆ ನಡೆಸುವ ವೈದ್ಯರ ತಂಡವು ಮೊಣಕಾಲಿನ ಗಂಭೀರ ಹಂತ ತಲುಪಿದ ಆಸ್ಟಿಯೋನೆಕ್ರೋಸಿಸ್ ಅನ್ನು ನಿಖರವಾಗಿ ಗುರುತಿಸಿತು. ಇದು ಮೊಣಕಾಲನ್ನು ಗಮನಾರ್ಹವಾಗಿ ಹಾನಿಗೊಳಿಸಿತ್ತು. ಇದರಿಂದಾಗಿ ವೈದ್ಯರ ಎದುರಿಗೆ ಸೀಮಿತ ಚಿಕಿತ್ಸಾ ಆಯ್ಕೆಗಳಿದ್ದವು. ಮೊಣಕಾಲಿನ ಸ್ಥಿತಿಯ ತೀವ್ರತೆ ಮತ್ತು ರೋಗಿಯು ಎದುರಿಸುತ್ತಿದ್ದ ಸಂಕಷ್ಟವನ್ನು ಗಮನಕ್ಕೆ ತೆಗೆದುಕೊಂಡ ವೈದ್ಯರ ತಂಡವು ಎಚ್ಚರಿಕೆಯಿಂದ ಯೋಜಿಸಲಾದ ರೋಬಾಟಿಕ್ ನೆರವಿನ ಮೊಣಕಾಲು ಬದಲಿ ವಿಧಾನವನ್ನು ಶಿಫಾರಸು ಮಾಡಿತು.

ಈ ಶಸ್ತ್ರಚಿಕಿತ್ಸೆಯನ್ನು ಅತ್ಯಾಧುನಿಕ ರೋಬಾಟಿಕ್ ತಂತ್ರಜ್ಞಾನ ಬಳಸಿಕೊಂಡು ನಡೆಸಲಾಯಿತು. ಮೊಣಕಾಲಿನ ಸುತ್ತಮುತ್ತಲಿನ ಅಂಗಾಂಶಗಳನ್ನು ರಕ್ಷಿಸುವುದರ ಜೊತೆಗೆ ಹೆಚ್ಚಿನ ನಿಖರತೆ ಮತ್ತು ಸೂಕ್ತ ಜೋಡಣೆಗೆ ಈ ರೋಬಾಟಿಕ್ ತಂತ್ರಜ್ಞಾನವು ನೆರವು ಒದಗಿಸಿತು. ಅತಿ ಸೂಕ್ಷ್ಮವಾಗಿ ರೂಪಿಸಿದ ಯೋಜನೆ ಮತ್ತು ಶಸ್ತ್ರಚಿಕಿತ್ಸೆಯ ನಂತರದ ಸಂಘಟಿತ ಆರೈಕೆಯ ನೆರವಿನಿಂದ, ರೋಗಿಯು ಶಸ್ತ್ರಚಿಕಿತ್ಸೆಯ ದಿನವೇ ಚೇತರಿಕೆಯತ್ತ ತನ್ನ ಮೊದಲ ಹೆಜ್ಜೆ ಇರಿಸಲು ಸಾಧ್ಯವಾಯಿತು.

"ರೋಬಾಟಿಕ್ ನೆರವಿನ ಶಸ್ತ್ರಚಿಕಿತ್ಸೆಯು ರೋಗಿಯ ದೇಹರಚನಾಶಾಸ್ತ್ರಕ್ಕೆ ಅನುಗುಣವಾಗಿ ವ್ಯಕ್ತಿಗತ ಶಸ್ತ್ರಚಿಕಿತ್ಸೆ ನಡೆಸಲು ನಮಗೆ ಅನುವು ಮಾಡಿಕೊಟ್ಟಿತು. ಇದರ ಪರಿಣಾಮವಾಗಿ ಸ್ಥಿರವಾದ ಕೀಲು ಮತ್ತು ತ್ವರಿತವಾಗಿ ಚೇತರಿಸಿಕೊಳ್ಳಲು ಸಾಧ್ಯವಾಯಿತು. ಇಂತಹ ಯುವ ರೋಗಿಯಲ್ಲಿ ಗಂಭೀರ ಹಂತಕ್ಕೆ ತಲುಪಿದ ಆಸ್ಟಿಯೋನೆಕ್ರೋಸಿಸ್ ಅನ್ನು ನಿರ್ವಹಿಸಲು ಎಚ್ಚರಿಕೆಯಿಂದ ಮೌಲ್ಯಮಾಪನ ಮಾಡುವುದು ಮತ್ತು ನಿಖರತೆಯ ಅಗತ್ಯ ಇರುತ್ತದೆ. ಇಂತಹ ಪ್ರಕರಣಗಳಲ್ಲಿ ಒಂದು ವೇಳೆ ಚಿಕಿತ್ಸೆ ನೀಡದಿದ್ದರೆ ಮೊಣಕಾಲಿನ ಅಸ್ಥಿ ಸವೆಯುವ ಸ್ಥಿತಿಯು ಮತ್ತಷ್ಟು ಮುಂದುವರೆದು, ಕೀಲು ಹಾನಿಯು ಮತ್ತಷ್ಟು ಹದಗೆಡುವ ಸಾಧ್ಯತೆ ಇತ್ತು. ಇದು ದೀರ್ಘಕಾಲದ ನೋವು ಉಂಟು ಮಾಡಬಹುದು. ದೈಹಿಕ ಬೆಳವಣಿಗೆಯ ಮಹತ್ವದ ಘಟ್ಟದಲ್ಲಿ ದೀರ್ಘಕಾಲೀನ ಅಂಗವೈಕಲ್ಯಕ್ಕೂ ಕಾರಣವಾಗಬಹುದು. ಈ ಪ್ರಕರಣದಲ್ಲಿ ಸಕಾಲಿಕ ವೈದ್ಯಕೀಯ ನೆರವು ಕೀಲುಗಳ ಜೋಡಣೆ ಮತ್ತು ಕಾರ್ಯವನ್ನು ಸಂರಕ್ಷಿಸಲು ನೆರವಾಯಿತು ಎಂದು ಆಪೊಲೋ ಆಸ್ಪತ್ರೆಯ ಮುಖ್ಯ ಮೂಳೆ ಶಸ್ತ್ರಚಿಕಿತ್ಸಕ ಡಾ. ಕೆ.ಟಿ. ರಾಜಶೇಖರ್ ಹೇಳುತ್ತಾರೆ.