ಉತ್ತರ ಕರ್ನಾಟಕದ ಆಹಾರ ಸಂಸ್ಕೃತಿಯಲ್ಲಿ ಜೋಳದ ರೊಟ್ಟಿಗೆ ಮೊದಲ ಸ್ಥಾನ. ಬಿಸಿ ರೊಟ್ಟಿ, ಪಲ್ಯ, ಖಡಕ್ ರೊಟ್ಟಿ, ಚಟ್ನಿಯ ರುಚಿ ನಿಜಕ್ಕೂ ಅಸಾಧಾರಣ. ರೊಟ್ಟಿ ತಟ್ಟುವುದಕ್ಕೂ ಒಂದು ಲಯವಿದೆ, ಕ್ರಮವಿದೆ. ಹಾಗಾಗಿಯೇ, ರೊಟ್ಟಿ ತಟ್ಟುವಿಕೆಯ ಸದ್ದು ಕೂಡ ಕಿವಿಗೆ ಯಾವುದೋ ಸಂಗೀತ ಪರಿಕರದ ತರಂಗಗಳಂತೆ ಕೇಳಿಸುತ್ತದೆ. ಬೀದರ್, ಕಲಬುರಗಿ, ಯಾದಗಿರಿ, ರಾಯಚೂರು, ವಿಜಯಪುರ, ಕೊಪ್ಪಳ, ವಿಜಯನಗರ, ಗದಗ, ಹಾವೇರಿ, ಹುಬ್ಬಳ್ಳಿ-ಧಾರವಾಡ, ಬೆಳಗಾವಿ ಈ ಎಲ್ಲ ಜಿಲ್ಲೆಗಳಲ್ಲಿ ಊಟವೆಂದರೆ ಅದು ರೊಟ್ಟಿ ಊಟವೇ ಆಗಬೇಕು. ಕಲ್ಯಾಣ ಕರ್ನಾಟಕ ಮತ್ತು ಕಿತ್ತೂರು ಕರ್ನಾಟಕ ಎರಡೂ ಭಾಗಗಳಲ್ಲಿ ಜೋಳ ಹೆಚ್ಚಿನ ಪ್ರಮಾಣದಲ್ಲಿ ಬೆಳೆಯುವುದರಿಂದ ಇಲ್ಲಿಯ ಆಹಾರ ಪದ್ಧತಿಯಾಗಿ ವಿಶಿಷ್ಟ ಸ್ಥಾನ ಅಲಂಕರಿಸಿರುವ ಜೋಳದ ರೊಟ್ಟಿ ಇತರ ಭಾಗಗಳ ಜನರ ತಟ್ಟೆಯಲ್ಲೂ ಪ್ರಮುಖ ಸ್ಥಾನ ಪಡೆಯುತ್ತಿರುವುದು ಗಮನಾರ್ಹ. ಆತಿಥ್ಯದ ಭಾಗವಾಗಿ ಇತ್ತೀಚೆಗೆ ಮದುವೆ ಊಟದ ಮೆನುವಿನಲ್ಲಿಯೂ ರೊಟ್ಟಿ ಪ್ರಮುಖ ಸ್ಥಾನ ಪಡೆದಿದ್ದು, ‘ಬರ್ರೀ ರೊಟ್ಟಿ ಊಟ ಮಾಡೋಣು’ ಎಂದು ಹೇಳುತ್ತ ಹೊಟ್ಟೆ ತಣ್ಣಗಾಗಿಸುವ ಜತೆಗೆ, ಮನುಷ್ಯ ಸಂಬಂಧಗಳೂ ಗಟ್ಟಿಯಾಗುತ್ತವೆ.
