ಎರಡನೇ ಅವಧಿಗೆ ಅಮೆರಿಕ ಅಧ್ಯಕ್ಷರಾಗಿರುವ ಡೊನಾಲ್ಡ್ ಟ್ರಂಪ್ ಅಧಿಕಾರ ವಹಿಸಿಕೊಂಡ ಕ್ಷಣದಿಂದಲೇ ದಿನವೂ ವಿವಿಧ ಪ್ರಮುಖ ನಿರ್ಣಯಗಳನ್ನು ತೆಗೆದುಕೊಳ್ಳುತ್ತಿ್ತ್ದಾರೆ. ಅಮೆರಿಕದ ನೀತಿ ನಿರ್ಣಯಗಳು ಜಾಗತಿಕವಾಗಿ ಪರಿಣಾಮ ಬೀರುವುದರಿಂದ ಸಹಜವಾಗಿಯೇ ಟ್ರಂಪ್ ನಡೆಗಳ ಬಗ್ಗೆ ವಿಶ್ವಾದ್ಯಂತ ಚರ್ಚೆಗಳು ನಡೆಯುತ್ತಿವೆ. ಭಾರತದ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಟ್ರಂಪ್ ನಡುವೆ ಉತ್ತಮ ಸ್ನೇಹ ಬಾಂಧವ್ಯ ಇದ್ದರೂ, ಭಾರತದ ಉತ್ಪನ್ನಗಳ ಮೇಲೆ ಅಧಿಕ ತೆರಿಗೆ ವಿಧಿಸುವುದಾಗಿ ಟ್ರಂಪ್ ಹೇಳಿದ್ದಾರೆ. ಇದಲ್ಲದೆ, ಅಕ್ರಮ ವಲಸಿಗರು ಹಾಗೂ ವೀಸಾ ವಿಚಾರವಾಗಿ ಟ್ರಂಪ್ ಕ್ರಮಗಳು ಭಾರತಕ್ಕೆ ಕೆಲಮಟ್ಟಿಗೆ ಪ್ರತಿಕೂಲವಾಗುವ ಸೂಚನೆಗಳು ಸಿಗತೊಡಗಿವೆ. ಈ ನಿಟ್ಟಿನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಜಾಗತಿಕ ರಾಜತಾಂತ್ರಿಕ ವ್ಯವಹಾರಗಳಲ್ಲಿ ಪಳಗಿರುವ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಹಾಗೂ ಸರ್ಕಾರದ ಇತರ ಪ್ರಮುಖರು ಭಾರತದ ಹಿತಾಸಕ್ತಿ ಕಾಪಾಡಲು ಯಾವ ರೀತಿಯ ಹೆಜ್ಜೆಗಳನ್ನು ಇಡಲಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ. ಇದು ಒಂದೆಡೆಯಾದರೆ, ಅತ್ತ ಪಾಕಿಸ್ತಾನ ಟ್ರಂಪ್ ಪುನರಾಗಮನದ ನಂತರ ದೊಡ್ಡ ಸಂಕಟಕ್ಕೆ ಈಡಾಗಿದೆ. ಮರುಮೌಲ್ಯಮಾಪನದ ಉದ್ದೇಶದಿಂದ, ವಿದೇಶಗಳಿಗೆ ನೀಡುತ್ತಿರುವ ಆರ್ಥಿಕ ನೆರವಿಗೆ ಟ್ರಂಪ್ ತಾತ್ಕಾಲಿಕ ತಡೆಹಾಕಿದ್ದಾರೆ. ಈ ನಡೆಯಿಂದ ಹೆಚ್ಚು ಅಪಾಯ ಎದುರಾಗಿರುವುದು ಪಾಕಿಸ್ತಾನಕ್ಕೆ. ಅಮೆರಿಕದ ನೆರವು ಇಲ್ಲದೆ ಕೃಷಿ, ಆರೋಗ್ಯ, ಶಿಕ್ಷ ಇತ್ಯಾದಿ ಕ್ಷೇತ್ರಗಳಿಗೆ ಸಮಸ್ಯೆಯಾಗಿದೆ. ಐದು ವಿದ್ಯುತ್ ಯೋಜನೆಗಳು ಸ್ಥಗಿತವಾಗಿವೆ.
