ಅದರಂತೆಯೇ ಮಕ್ಕಳಿಗೆ ಪ್ರೀತಿಯ ಹಸಿವು ಉಂಟಾದಾಗ ತಂದೆ-ತಾಯಿಗಳು ಪ್ರೀತಿಯನ್ನು ಕೊಟ್ಟು, ಪ್ರೇಮದ ಕೊರತೆ ಉಂಟಾಗದ ಹಾಗೆ ಮಕ್ಕಳನ್ನು ಬೆಳೆಸಬೇಕು. ಮನೆಯಲ್ಲಿ ಬೇಕಾದಷ್ಟು ತಿಂಡಿತಿನುಸುಗಳು ಇರುವಂತೆ, ಮನಸ್ಸಿನಲ್ಲಿ ಮಕ್ಕಳ ಬಗ್ಗೆ ಸಾಕಷ್ಟು ಪ್ರೀತಿ ಅಡಗಿದೆ. ಆದರೆ ಉದ್ಯೋಗ ಮುಂತಾದ ಕಾರ್ಯಕಲಾಪಗಳ ಒತ್ತಡದಿಂದ, ಮಕ್ಕಳೊಂದಿಗೆ ಮಾತನಾಡಲು ಸಮಯ ಸಿಗದ ಕಾರಣ ಮನಸ್ಸಿನಲ್ಲಿರುವ ಪ್ರೀತಿಯನ್ನು ಮಕ್ಕಳಿಗೆ ಹಂಚಲು ಸಮಯವಿಲ್ಲ ಪಾಲಕರಿಗೆ. ಹಸಿವಾದಾಗ ಮನೆಯಲ್ಲಿ ಆಹಾರ ಸಿಗದಿದ್ದರೆ ಕೈಗೆ ಸಿಕ್ಕ ಆಹಾರವನ್ನು ತಾವೇ ತೆಗೆದುಕೊಂಡು ತಿಂದು ಹೊಟ್ಟೆ ತುಂಬಿಸಿಕೊಳ್ಳುವಂತೆ, ಪ್ರೀತಿಯ ಹಸಿವು ಇರುವ ಮಕ್ಕಳಿಗೆ ಮನೆಯಲ್ಲಿ ಪ್ರೀತಿ ಸಿಗದಿದ್ದರೆ ಪ್ರೀತಿಯನ್ನು ಹುಡುಕಿಕೊಂಡು ಹೊರಗೆ ಹೋಗುತ್ತಾರೆ. ಯಾರು ಯಾರೋ ಗೆಳೆಯ-ಗೆಳತಿಯರನ್ನು ಹುಡುಕಿ ಅವರ ಬೆನ್ನುಹತ್ತುತ್ತಾರೆ. ದೈವವಶಾತ್ ಅವರು ಒಳ್ಳೆಯ ಗೆಳೆಯರಿದ್ದರೆ ಯೋಗ್ಯವಾದೀತು. ಅವರು ದುಷ್ಟಗೆಳೆಯರಿದ್ದರೆ ದುಷ್ಟಸಹವಾಸದಿಂದ ದುಶ್ಚಟಗಳಿಗೆ ಬಲಿಯಾಗಿ ಜೀವನ ಹಾಳುಮಾಡಿಕೊಳ್ಳುತ್ತಾರೆ. ಅಥವಾ ಯೌವನದ ಪ್ರಭಾವದಿಂದ ಯಾವುದೋ ರೀತಿಯ ಪ್ರೇಮಪಾಶಕ್ಕೆ ಬಲಿಯಾಗುತ್ತಾರೆ. ಆ ಪ್ರೇಮದ ಬಲಿ ಯಾವ ತರಹದ್ದು ಇರುತ್ತದೆಯೋ ಗೊತ್ತಾಗುವುದಿಲ್ಲ. ಆ ತರಹದ ಪ್ರೇಮಪಾಶಕ್ಕೆ ಸಿಲುಕಿ, ಪ್ರೇಮದ ಯುದ್ಧದೊಳಗೆ ಬಲಿಯಾಗಿ ಮಕ್ಕಳು ಸಾಯುವ ಪ್ರಸಂಗವೂ ಇಂದು ಬರುತ್ತಿದೆ. ಇದು ಮಕ್ಕಳಿಗೆ ಮನೆಯಲ್ಲಿ ಪ್ರೀತಿ ಸಿಗದಿದ್ದರ ದುಷ್ಪರಿಣಾಮ.
