ಖುಷಿಯಾಗಿದ್ದೇನೆ ಮದುವೆಯ ಆಲೋಚನೆ ಇಲ್ಲ...

ನಟಿ ರಮ್ಯಾ ವಾಪಸ್ಸಾಗಿದ್ದಾರೆ. ಆರು ವರ್ಷಗಳ ಗ್ಯಾಪ್ ಬಳಿಕ ಮತ್ತೆ ಸ್ಯಾಂಡಲ್​ವುಡ್​ನಲ್ಲಿ ಕ್ವೀನ್ ಆಗಿ ಮಿಂಚಲು ರೆಡಿಯಾಗಿದ್ದಾರೆ. ನಟನೆಯ ಜತೆಗೆ ನಿರ್ವಣಕ್ಕೂ ಇಳಿದಿದ್ದಾರೆ. ‘ಸ್ವಾತಿ ಮುತ್ತಿನ ಮಳೆ ಹನಿಯೇ’ ಚಿತ್ರದ ಮೂಲಕ ಕಮ್್ಯಾಕ್ ಮಾಡುತ್ತಿರುವುದು ಗೊತ್ತೇ ಇದೆ. ಅದರ ಬೆನ್ನಲ್ಲೇ ಮುಂದಿನ ಸಿನಿಮಾ ಪಯಣ, ರಾಜಕೀಯ, ಮದುವೆ ಸೇರಿದಂತೆ ಹಲವು ವಿಷಯಗಳ ಕುರಿತು ಇದೇ ಮೊದಲ ಬಾರಿಗೆ ‘ವಿಜಯವಾಣಿ’ ಜತೆ ಮನಬಿಚ್ಚಿ ಮಾತನಾಡಿದ್ದಾರೆ, ಈ ವಿಶೇಷ ಸಂದರ್ಶನದಲ್ಲಿ...

| ಹರ್ಷವರ್ಧನ್ ಬ್ಯಾಡನೂರು

ಈ ಬ್ರೇಕ್ ಮತ್ತು ಕಮ್​ಬ್ಯಾಕ್ ನೀವೇ ಪ್ಲಾನ್ ಮಾಡಿಕೊಂಡಿದ್ದಾ?
ಬ್ರೇಕ್ ಬೇಕು ಅಂತ ಆಲೋಚನೆ ಮಾಡಿಕೊಂಡಿದ್ದೆ. ಆದರೆ, ವಾಪಸ್ ಬರುವುದನ್ನು ಪ್ಲಾನ್ ಮಾಡಿಕೊಂಡಿರಲಿಲ್ಲ. 2013ರಲ್ಲಿ ಅಪ್ಪ ತೀರಿಕೊಂಡರು, ಅದಾಗಿ 10 ದಿನಗಳಲ್ಲೇ ಸಂಸದೆಯಾಗಿ ಆಯ್ಕೆಯಾದೆ. ಏನು ಯೋಚನೆ ಮಾಡುವುದಕ್ಕೂ ಸಮಯ ಸಿಗಲಿಲ್ಲ. ಹೀಗಾಗಿ ಒಂದು ವರ್ಷ ಬ್ರೇಕ್ ಪಡೆದೆ. ಆ ಬಳಿಕ ರಾಹುಲ್ ಗಾಂಧಿ ಕರೆ ಮಾಡಿ ಸೋಷಿಯಲ್ ಮೀಡಿಯಾ ಜವಾಬ್ದಾರಿ ನೀಡಿದರು. ನಂತರ 2019ರಲ್ಲಿ ಲೋಕಸಭಾ ಚುನಾವಣೆಗೆ ಮುನ್ನ ನಾನು ರಾಜೀನಾಮೆ ನೀಡಿದೆ. ನಂತರ ಕರೊನಾ ಬಂತು. ಆಗ ರಾಜಕಾರಣ ಅಥವಾ ಸಿನಿಮಾ ಬಿಟ್ಟು ಹೊಸದಾಗಿ ಏನು ಮಾಡುವುದು ಎಂದು ಯೋಚಿಸುತ್ತಿದ್ದೆ. ಸಿನಿಮಾ ನಿರ್ಮಾಣ ಮಾಡಿದರೆ ಹೇಗೆ ಅಂತ ಐಡಿಯಾ ಬಂತು.

‘ಸ್ವಾತಿ ಮುತ್ತಿನ ಮಳೆ ಹನಿಯೇ’ ಚಿತ್ರ ಆಯ್ಕೆ ಮಾಡಿಕೊಳ್ಳಲು ಕಾರಣ?
ಈಗ ಯಾರೂ ನಾಯಕಿಯರಿಗಾಗಿ ಕಥೆಗಳನ್ನು ಬರೆಯುತ್ತಿಲ್ಲ. ಅದೇ ಸಮಯದಲ್ಲಿ ರಾಜ್ ಬಿ. ಶೆಟ್ಟಿ ಕಥೆ ಹೇಳಿದರು. ಅವರ ಕಥೆ ಇಷ್ಟವಾಯಿತು.

ರಮ್ಯಾ ಅವರಿಂದ ಹಾಗೂ ‘ಆಪಲ್ ಬಾಕ್ಸ್ ಸ್ಟುಡಿಯೋಸ್’ ನಿಂದ ಮುಂದೆ ಏನೆಲ್ಲಾ ನಿರೀಕ್ಷಿಸಬಹುದು?
ಪ್ರತಿಭಾನ್ವಿತ ಮಹಿಳೆಯರಿಗೆ ಅವಕಾಶ ನೀಡಬೇಕು ಎಂಬುದು ನನ್ನ ಅಭಿಲಾಷೆ. ಮಹಿಳೆಯರ ದೃಷ್ಟಿಕೋನದಿಂದ ಕಥೆ ಹೇಳಬೇಕು. ಹಾಗಂತ ಎಲ್ಲ ಸಿನಿಮಾಗಳಲ್ಲೂ ನಾನೇ ನಟಿಸಬೇಕು ಅಂತೇನಿಲ್ಲ. ಹೊಸಬರ ಜತೆ ಖಂಡಿತವಾಗಿಯೂ ಕೆಲಸ ಮಾಡುತ್ತೇನೆ. ವಿಭಿನ್ನ ಸ್ಟೈಲ್​ನ ಸಿನಿಮಾಗಳು, ವಿಭಿನ್ನ ಬಗೆಯ ಕಥೆಗಳನ್ನು ಮಾಡಬೇಕು. ನನಗೆ ಪಾತ್ರ ತುಂಬ ಮುಖ್ಯ. ನನಗೆ ಪಾತ್ರ ಇಷ್ಟವಾದರೆ ಮಾತ್ರ ಆ ಚಿತ್ರದಲ್ಲಿ ನಟಿಸಲು ಒಪು್ಪತ್ತೇನೆ. ‘ಸ್ವಾತಿ ಮುತ್ತಿನ ಮಳೆ ಹನಿಯೇ’ ಬಳಿಕ ಮತ್ತೊಂದು ಚಿತ್ರ ನಿರ್ಮಾಣ ಮಾಡಲಿದ್ದೇನೆ. ಜತೆಗೆ ಬೇರೆ ನಿರ್ಮಾಣ ಸಂಸ್ಥೆಗಳ ಎರಡು ಚಿತ್ರಗಳಲ್ಲಿ ನಟಿಸಲು ಒಪ್ಪಿಕೊಂಡಿದ್ದೇನೆ.

‘ಕೆಜಿಎಫ್’, ‘ಕಾಂತಾರ’ ಚಿತ್ರಗಳ ಬಗ್ಗೆ ನಿಮ್ಮ ಅಭಿಪ್ರಾಯ...
ಕನ್ನಡ ಸಿನಿಮಾಗಳ ಈ ಯಶ್ಸಸ್ಸನ್ನು ನೋಡಿದರೆ ತುಂಬ ಖುಷಿಯಾಗುತ್ತದೆ. ಹಿಂದೆಯೂ ಒಂದು ವರ್ಷ, ಎರಡು ವರ್ಷ ಸಿನಿಮಾಗಳು ಓಡುತ್ತಿದ್ದವು. ಈಗ ಓಟಿಟಿ ಇದೆ, ಬೇರೆಬೇರೆ ಭಾಷೆಗಳಿಗೆ ಡಬ್ ಮಾಡುವುದು ಸರಳವಾಗಿದೆ. ಹಲವು ವರ್ಷಗಳಿಂದ ಕಾಯುತ್ತಿದ್ದ ಪ್ರತಿಭಾನ್ವಿತರಿಗೆ ಇಂತಹ ಯಶಸ್ಸು ಲಭಿಸಿರುವುದು ನಿಜಕ್ಕೂ ಶ್ಲಾಘನೀಯ. ‘ಕೆಜಿಎಫ್’, ‘ಕಾಂತಾರ’ ಎಷ್ಟೋ ದಾಖಲೆಗಳನ್ನು ಮುರಿದಿವೆ. ಕರ್ನಾಟಕದ ಸಂಸ್ಕೃತಿ, ಮಂಗಳೂರಿನ ಸಂಪ್ರದಾಯ ... ಹೀಗೆ ಬೇರೆಬೇರೆ ರೀತಿಯ ನಮ್ಮ ನೆಲದ ಕಥೆಗಳಿಗೆ ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ದೊರೆಯುತ್ತಿರುವುದು ಖುಷಿಯ ವಿಚಾರ.

ರಾಹುಲ್ ಗಾಂಧಿ ಕರ್ನಾಟಕದಲ್ಲಿ ಭಾರತ್ ಜೋಡೋ ಯಾತ್ರೆ ಮಾಡುತ್ತಿದ್ದಾರೆ. ಅವರನ್ನು ಭೇಟಿಯಾಗಲಿದ್ದೀರಾ? ನೀವೂ ಯಾತ್ರೆಯಲ್ಲಿ ಭಾಗಿಯಾಗುತ್ತೀರಾ?
ಈಗ ರಾಜಕೀಯ ಬೇಡ. ನನಗೆ ಕಾಂಗ್ರೆಸ್ ಮಾತ್ರವಲ್ಲ ಬೇರೆ ಪಕ್ಷಗಳಿಂದಲೂ ಅವಕಾಶಗಳು ಬಂದಿವೆ. ಸದ್ಯಕ್ಕೆ ನನ್ನ ಗಮನ ರಾಜಕೀಯವಲ್ಲ. ರಾಜಕೀಯದಲ್ಲಿ ನನ್ನ ಭವಿಷ್ಯದ ಬಗ್ಗೆ ನಾನೇನೂ ಯೋಚಿಸಿಯೇ ಇಲ್ಲ. ರಾಹುಲ್​ಜೀ ನನ್ನ ಮೆಂಟರ್. ನನ್ನ ಜೀವನದ ಮೇಲೆ ಅತಿ ದೊಡ್ಡ ಪ್ರಭಾವ ಬೀರಿರುವ ವ್ಯಕ್ತಿ. ನನ್ನ ಅವರ ಸಂಬಂಧ ರಾಜಕೀಯವನ್ನೂ ಮೀರಿದ್ದು. ಅದನ್ನು ಬಿಡಿಸಿ ಹೇಳಲು ಸಾಧ್ಯವಿಲ್ಲ.

ಹೊಸ ‘ಸ್ಯಾಂಡಲ್​ವುಡ್ ಕ್ವೀನ್’ಗೆ ಜಾಗ ಕೊಡಲು ಸಿದ್ಧ ಎಂದು ಟ್ವೀಟ್ ಮಾಡಿದ್ದಿರಿ...
ಮಹಿಳಾ ಪ್ರಧಾನ ಪಾತ್ರಗಳು, ಕಥೆಗಳು ಹೆಚ್ಚಬೇಕು. ನಟರಂತೆಯೇ ನಟಿಯರಿಗೂ ಸಮಾನ ಸಂಭಾವನೆ ನೀಡುವಂತಾಗಬೇಕು. ಆ ಸಮಾನತೆ ಮೂಡಿಸಲು ನಾನು ಮುಂಚೂಣಿಯಲ್ಲಿರುತ್ತೇನೆ. ನನಗೆ ಮಾತ್ರ ಹೆಸರು, ಹಣ ಬೇಕು ಅನ್ನೋದು ನನ್ನ ಗುರಿಯಲ್ಲ. ಚಿತ್ರರಂಗಕ್ಕೆ ಬಂದ ಹೊಸತರಲ್ಲಿ ನಟಿಯರಿಗೆ ಸ್ಕ್ರಿಪ್ಟ್ ಕೊಡುತ್ತಿರಲಿಲ್ಲ. ‘ಅಭಿ’ ಚಿತ್ರದ ಸಮಯದಲ್ಲೇ ನನಗೆ ನಿರ್ದೇಶಕರು ಸ್ಕ್ರಿಪ್ಟ್ ಕೊಟ್ಟಿರಲಿಲ್ಲ. ತಂತ್ರಜ್ಞರ ಹೆಸರು ಪೋಸ್ಟರ್​ಗಳಲ್ಲಿ ಬಂದರೂ, ನಾಯಕಿ, ನಟಿಯರ ಹೆಸರು ಬರುತ್ತಿರಲಿಲ್ಲ. ನಮಗೆ ಅಂತ ಮೇಕಪ್​ವ್ಯಾನ್ ಕೂಡ ಕೊಡುತ್ತಿರಲಿಲ್ಲ. ಹೀರೋಗೆ ಒಬ್ಬ ಮೇಕಪ್​ವ್ಯಾನ್ ಇದ್ದರೆ, ಉಳಿದ ತಾರಾಗಣಕ್ಕೆ ಮತ್ತೊಬ್ಬ ಮೇಕಪ್​ವ್ಯಾನ್ ಇರುತ್ತಿದ್ದರು. ಈಗೀಗ ಇದು ನಿಧಾನವಾಗಿ ಬದಲಾಗುತ್ತಿದೆ. ಮುಂಚೆಗಿಂತ ಸುಧಾರಿಸಿದೆ. ಈ ಬದಲಾವಣೆ ನನಗೂ ಖುಷಿ ನೀಡಿದೆ.

ಮುಂದಿನ ತಿಂಗಳು 40ನೇ ವಸಂತಕ್ಕೆ ಕಾಲಿಡಲಿದ್ದೀರಿ. ಮದುವೆಯ ಬಗ್ಗೆ ಆಲೋಚನೆ? ಅಥವಾ ಕುಟುಂಬದವರಿಂದ ಒತ್ತಡವೇನಾದರೂ ಇದೆಯೇ?
ಮದುವೆಯಾಗಲು ನನಗೆ ಯಾರ ಒತ್ತಡವೂ ಇಲ್ಲ. ಮದುವೆಯಾಗೋಕೆ ಇಷ್ಟೇ ವಯಸ್ಸಾಗಿರಬೇಕು ಅಂತೇನಿಲ್ಲ. ಮದುವೆಯ ಬಗ್ಗೆ ಆಲೋಚನೆಯೇ ಇಲ್ಲ. ಖುಷಿಯಾಗಿದ್ದೇನೆ. ನನ್ನ ಎರಡು ಸಾಕುನಾಯಿಗಳೇ ಸಾಕು. ಕೈತುಂಬ ಕೆಲಸಗಳಿವೆ, ಫ್ರೆಂಡ್ಸ್ ಇದ್ದಾರೆ. ನನ್ನ ಜೀವನದಲ್ಲಿ ಏನೋ ಒಂದು ಕೊರತೆ ಇದೆ, ಅದು ತುಂಬಬೇಕು ಅಂತ ನನಗನ್ನಿಸಿಯೇ ಇಲ್ಲ. ವಯಸ್ಸಾದ ಮೇಲೆ ಅರ್ಥವಾಗುತ್ತೆ ಅಂತಲೂ ಕೆಲವು ಹೇಳಿದ್ದಾರೆ. ಭಾವನಾತ್ಮಕವಾಗಿ, ಆರ್ಥಿಕವಾಗಿ ನಾನು ಸೆಕ್ಯೂರ್ ಆಗಿದ್ದೇನೆ. ಮನೆಯಲ್ಲಿ ಒಬ್ಬರು ಗಂಡಸು ಇರಬೇಕು ಅನ್ನೋದೆಲ್ಲ ಈಗಿಲ್ಲ. ಹಾಗೂ ಯಾರಾದರೂ ನನಗೆ ಇಷ್ಟವಾದರೆ, ಮುಂದೆ ನೋಡೋಣ.

https://www.vijayavani.net/a-vidhanasabha-election-jds-hdk-mysuru/

https://www.vijayavani.net/a-harley-davidson-bike-babybump-photoshoot-shimoga/

https://www.vijayavani.net/puneeth-rajkumar-was-awarded-karnataka-ratna/

https://www.vijayavani.net/a-cyclone-threat-to-karnataka-state/