ನಾಳೆ ಪ್ರಧಾನಿಯನ್ನು ಭೇಟಿ ಆಗಲಿರುವ ಸದ್ಗುರು: ಮಹತ್ವದ ವಿಷಯದ ಕುರಿತು ಮಾತುಕತೆ..

ನವದೆಹಲಿ: ಈಶ ಫೌಂಡೇಷನ್​ ಸಂಸ್ಥಾಪಕ ಸದ್ಗುರು ನಾಳೆ ವಿಶ್ವ ಪರಿಸರ ದಿನದ ಸ್ಮರಣಾರ್ಥ ನವದೆಹಲಿಯ ವಿಜ್ಞಾನ ಭವನದಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ. ಮಾತ್ರವಲ್ಲ, ಆ ಬಳಿಕ ಒಂದು ಮಹತ್ವದ ವಿಷಯದ ಕುರಿತಾಗಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರನ್ನು ಕೂಡ ಭೇಟಿಯಾಗಿ ಮಾತುಕತೆ ನಡೆಸಲಿದ್ದಾರೆ.

ಮಣ್ಣು ರಕ್ಷಣೆ ಸಲುವಾಗಿ ಅವರು ಜಾಗತಿಕವಾಗಿ ಹಮ್ಮಿಕೊಂಡಿರುವ ಮಣ್ಣು ಉಳಿಸಿ ಅಭಿಯಾನದ ಪಯಣದ ಭಾಗವಾಗಿ ಪ್ರಧಾನಿಯರನ್ನು ಭೇಟಿಯಾಗಲಿದ್ದು, ದೇಶದ ಮಣ್ಣನ್ನು ಉಳಿಸಲು ನೀತಿ ರಚಿಸುವ ನಿಟ್ಟಿನಲ್ಲಿ ಬೆಂಬಲವನ್ನು ಕೋರಲಿದ್ದಾರೆ. ಅಳಿವಿನಂಚಿನಲ್ಲಿರುವ ಮಣ್ಣನ್ನು ಉಳಿಸಲು ಈ ವರ್ಷದ ಮಾರ್ಚ್‌ನಲ್ಲಿ ಜಾಗತಿಕ ಅಭಿಯಾನ ಪ್ರಾರಂಭಿಸಿದ ಸದ್ಗುರು, ಪ್ರಸ್ತುತ 100 ದಿನಗಳ 30,000 ಕಿಮೀ ದೂರ ಏಕಾಂಗಿಯಾಗಿ ಮೋಟರ್​ ಬೈಕ್​ನಲ್ಲಿ ಚಲಿಸಿ ಜಾಗೃತಿ ಮೂಡಿಸುವ ಅಭಿಯಾನ ಹಮ್ಮಿಕೊಂಡಿದ್ದು, ಈಗಾಗಲೇ 26 ದೇಶಗಳನ್ನು ಸುತ್ತಿ ಭಾರತಕ್ಕೆ ಪ್ರವೇಶಿಸಿದ್ದಾರೆ.

ಮಣ್ಣಿನ ಅಳಿವು ತಡೆಯಲು ನೀತಿ-ಚಾಲಿತ ಕ್ರಮವನ್ನು ಪ್ರಾರಂಭಿಸುವಂತೆ ಹೋದಲ್ಲೆಲ್ಲ ರಾಜಕೀಯ ನಾಯಕರನ್ನು ಒತ್ತಾಯಿಸಿದ್ದಾರೆ. ಸದ್ಗುರು ಅವರು ಈ ಏಕಾಂಗಿ ಮೋಟರ್​ ಬೈಕ್​ ಪ್ರಯಾಣ ನಾಳೆಗೆ 75 ದಿನಗಳನ್ನು ಪೂರೈಸಲಿದ್ದು, ಆಜಾದಿ ಕಾ ಅಮೃತ ಮಹೋತ್ಸವಕ್ಕೂ ಇದು ಸಾಂಕೇತಿಕ ಗೌರವ ಎಂದು ಪರಿಗಣಿಸಲಾಗಿದೆ.

ಸದ್ಗುರು ತಮ್ಮ ಪ್ರಯಾಣ ಆರಂಭಿಸಿದಾಗಿನಿಂದ, ಸುಮಾರು 10 ಲಕ್ಷ ಮಕ್ಕಳು ಭಾರತದ ಪ್ರಧಾನಿಗೆ ಪತ್ರ ಬರೆದು ಮಣ್ಣಿನ ಬಗ್ಗೆ ತಮ್ಮ ಕಾಳಜಿ ವ್ಯಕ್ತಪಡಿಸಿದ್ದಾರೆ ಮತ್ತು ಭಾರತದಲ್ಲಿನ ಫಲವತ್ತಾದ ಭೂಮಿಗಳ ಮರುಭೂಮೀಕರಣ ನಿಲ್ಲಿಸಲು ಮತ್ತು ಹಿಮ್ಮೆಟ್ಟಿಸಲು ತುರ್ತು ಕ್ರಮಗಳನ್ನು ಪ್ರಾರಂಭಿಸಲು ಪ್ರಧಾನಿಯನ್ನು ವಿನಂತಿಸಿದ್ದಾರೆ ಎಂದು ಅಂದಾಜಿಸಲಾಗಿದೆ.

ಜನವರಿಯಲ್ಲಿ ನಡೆದ WEF ದಾವೋಸ್ ಅಜೆಂಡಾ 2022ರಲ್ಲಿ ಮೋದಿ ಅವರು ಇತ್ತೀಚೆಗೆ ಹಸಿರು, ಸ್ವಚ್ಛ, ಸುಸ್ಥಿರ ಮತ್ತು ವಿಶ್ವಾಸಾರ್ಹ ಬೆಳವಣಿಗೆಯ ಭಾರತದ ಗುರಿಯನ್ನು ಉಲ್ಲೇಖಿಸಿದ್ದರು. ಅವರು ಕಳೆದ ವರ್ಷ ಗ್ಲಾಸ್ಗೋದಲ್ಲಿ COP26ನಲ್ಲಿ 'ಒನ್ ವರ್ಲ್ಡ್'ಗಾಗಿ ತಮ್ಮ ಪರಿಕಲ್ಪನೆಯನ್ನು ಪ್ರಸ್ತುತಪಡಿಸಿದ್ದರು. ವಿಶ್ವ ಜೀವನವು ಪರಿಸರಕ್ಕಾಗಿ ಜೀವನಶೈಲಿಯ ಸಂಕ್ಷಿಪ್ತ ರೂಪವಾಗಿದೆ ಎಂದು ವಿವರಿಸಿದರು.

ಪ್ರಧಾನಮಂತ್ರಿ ಸದ್ಗುರು ಜತೆ ತಮ್ಮ ಸಾರ್ವಜನಿಕ ಸಭೆಯಲ್ಲಿ ದೇಶದ ಪರಿಸರದ ಗುರಿಗಳ ಬಗ್ಗೆ ಮಾತನಾಡುವ ನಿರೀಕ್ಷೆ ಇದೆ. ಭಾರತದಲ್ಲಿ ಮಣ್ಣಿಗಾಗಿ ತಮ್ಮ ಪ್ರಯಾಣವನ್ನು ಮುಂದುವರಿಸಲು ಸದ್ಗುರುಗಳು 2022ರ ಮೇ 29ರಂದು ಭಾರತದ ಪಶ್ಚಿಮ ಕರಾವಳಿ ನಗರವಾದ ಜಾಮ್‌ ನಗರವನ್ನು ತಲುಪಿದರು. ಮಣ್ಣನ್ನು ಉಳಿಸಲು ಈಶಾ ಔಟ್‌ರೀಚ್‌ನೊಂದಿಗೆ ನಿವೇದನಾ ಪತ್ರಕ್ಕೆ (MOU) ಸಹಿ ಹಾಕಿದ ಮೊದಲ ಭಾರತೀಯ ರಾಜ್ಯ ಗುಜರಾತ್ ಆಗಿದೆ.

ಭಾರತದಲ್ಲಿ, ಕೃಷಿ ಮಣ್ಣಿನಲ್ಲಿನ ಸರಾಸರಿ ಸಾವಯವ ಅಂಶವು ಶೇ. 0.68 ಎಂದು ಅಂದಾಜಿಸಲಾಗಿದೆ, ಇದರಿಂದಾಗಿ ದೇಶವು ಮರುಭೂಮಿ ಮತ್ತು ಮಣ್ಣಿನ ಅಳಿವಿನ ಹೆಚ್ಚಿನ ಅಪಾಯದಲ್ಲಿದೆ. ದೇಶದಲ್ಲಿ ಸುಮಾರು ಶೇ.30 ಫಲವತ್ತಾದ ಮಣ್ಣು ಈಗಾಗಲೇ ಬಂಜರಾಗಿ ಮಾರ್ಪಟ್ಟಿದೆ ಮತ್ತು ಇಳುವರಿ ಪಡೆಯಲು ಅಸಮರ್ಥವಾಗಿದೆ. ಪ್ರಸ್ತುತ ಮಣ್ಣಿನ ಅವನತಿ ದರದಲ್ಲಿ, ಭೂಮಿಯ ಶೇ. 90ರಷ್ಟು ಭಾಗ 2050ರ ಹೊತ್ತಿಗೆ ಮರುಭೂಮಿಯಾಗಿ ಬದಲಾಗಬಹುದು ಎಂದು ವಿಶ್ವಸಂಸ್ಥೆಯು ಎಚ್ಚರಿಸಿದೆ.

ಮಣ್ಣು ಉಳಿಸಿ ಅಭಿಯಾನವನ್ನು ಮರುಭೂಮಿಯ ವಿರುದ್ಧ ಹೋರಾಡಲು ಯುನೈಟೆಡ್ ನೇಷನ್ಸ್ ಕನ್ವೆನ್ಷನ್ (UNCCD), ಯುನೈಟೆಡ್ ನೇಷನ್ಸ್ ಎನ್ವಿರಾನ್ಮೆಂಟ್ ಪ್ರೋಗ್ರಾಂ (UNEP), UN ವಿಶ್ವ ಆಹಾರ ಕಾರ್ಯಕ್ರಮ ಮತ್ತು ಇಂಟರ್ನ್ಯಾಷನಲ್ ಯೂನಿಯನ್ ಫಾರ್ ಕನ್ಸರ್ವೇಶನ್ ಆಫ್ ನೇಚರ್ (IUCN) ಬೆಂಬಲಿಸುತ್ತದೆ.

https://www.vijayavani.net/fire-accident-in-tea-stall-girl-caught-up-with-fire/

https://www.vijayavani.net/police-constable-assaulted-by-bike-riders-three-arrested-one-absconding/