ಭಾರತಕ್ಕೆ ಮತ್ತೆ ಬರತ್ತಾ ಟಿಕ್​ಟಾಕ್​? ನಟನಾ ಪ್ರಿಯರಿಗೆ ಸಿಹಿ ಸುದ್ದಿ ಸಿಗತ್ತಾ?

ನವದೆಹಲಿ: ಟಿಕ್​ಟಾಕ್​ ಭಾರತದಲ್ಲಿ ಬ್ಯಾನ್​ ಆಗಿ ಮೂರು ತಿಂಗಳಾಗುತ್ತಾ ಬಂದಿದೆ. ಜೂನ್​ 29ರಿಂದ ಭಾರತದಲ್ಲಿ ಈ ಚೀನಿ ಆ್ಯಪ್​ ಅಧಿಕೃತವಾಗಿ ನಿಷೇಧಕ್ಕೆ ಒಳಗಾಗಿದೆ. ಆದರೆ ಇದರ ಬೆನ್ನಲ್ಲೇ ಮತ್ತೊಮ್ಮೆ ಈ ಆ್ಯಪ್​ ಹೊಸ ರೂಪ ಪಡೆದು ಭಾರತಕ್ಕೆ ಹಿಂಬಾಲಿನಿಂದ ಎಂಟ್ರಿ ಕೊಡಲಿದೆ ಎನ್ನುವ ಸುದ್ದಿ ಎಲ್ಲೆಡೆ ಹರಿದಾಡುತ್ತಿತ್ತು.

ಇದಕ್ಕೆ ಕಾರಣ ಅಮೆರಿಕ. ಚೀನಾದ ಜತೆಗೆ ಸಂಘರ್ಷಕ್ಕೆ ಇಳಿದಿದ್ದ ಅಮೆರಿಕ, ಭಾರತದಂತೆ ತನ್ನ ದೇಶದಲ್ಲಿಯೂ ಟಿಕ್​ಟಾಕ್​ ನಿಷೇಧ ಮಾಡುವುದಾಗಿ ಹೇಳಿತ್ತು. ಇದರಿಂದ ಭಯಗೊಂಡಿದ್ದ ಟಿಕ್​ಟಾಕ್​ ಒಡೆತನದ ಬೈಟ್​ಡಾನ್ಸ್​ ಕಂಪೆನಿ, ಅಮೆರಿಕದಲ್ಲಿಯೇ ತನ್ನ ಘಟಕ ಶುರು ಮಾಡಲು ಮುಂದಾಗಿತ್ತು.

ಈ ಕುರಿತು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಜತೆ ಮಾತುಕತೆ ಕೂಡ ನಡೆಸಿತ್ತು. ಇದರ ಮಾತುಕತೆ ನಡೆಯುತ್ತಿದ್ದಂತೆಯೇ, ಟಿಕ್​ಟಾಕ್​ ಉದ್ಯಮ ಶುರು ಮಾಡಲು ಒರಾಕಲ್‌ ಹಾಗೂ ಮೈಕ್ರೋಸಾಫ್ಟ್‌ ಕಂಪೆನಿ ಉತ್ಸುಕತೆ ತೋರಿದ್ದವು.

ಇದನ್ನೂ ಓದಿ: ಭಾವಿ ಪತ್ನಿಗೆ ₹6 ಕೋಟಿಯ ಉಂಗುರ ನೀಡಿದ ನಾಲ್ಕುಮಕ್ಕಳ ತಂದೆ ಈ ಆಟಗಾರ…

ಒಂದು ವೇಳೆ ಈ ಮಾರಾಟ ಮಾಡುವುದಾದರೆ ಸೆಪ್ಟೆಂಬರ್​ 15ರವರೆಗೆ ಮಾರಾಟ ಮಾಡಬೇಕು. ಇಲ್ಲದಿದ್ದರೆ ಟಿಕ್​ಟಾಕ್​ ಆ್ಯಪ್​ ಅನ್ನು ಅಮೆರಿಕದಲ್ಲಿ ಸಂಪೂರ್ಣವಾಗಿ ನಿಷೇಧ ಮಾಡಲಾಗುವುದು ಎಂದು ಟ್ರಂಪ್​ ಎಚ್ಚರಿಕೆ ನೀಡಿದ್ದರು. ಇದೇನಾದರೂ ಸಕ್ಸಸ್​ ಆದರೆ, ಭಾರತದಲ್ಲಿಯೂ ಈ ಆ್ಯಪ್​ ಪುನಃ ಶುರುವಾಗಲಿದೆ, ಇದರ ಮೇಲಿದ್ದ ನಿಷೇಧ ತೆರುವಾಗಲಿದೆ ಎಂಬುದಾಗಿ ಸುದ್ದಿ ಹರಡಿತ್ತು. ಇದು ಟಿಕ್​ಟಾಕ್​ ಪ್ರಿಯರಲ್ಲಿ ಸಂತಸದ ಅಲೆಯನ್ನು ಎಬ್ಬಿಸಿತ್ತು.

ಆದರೆ ಈಗ ಎಲ್ಲವೂ ಉಲ್ಟಾ ಆಗಿದೆ. ಈ ಹಿಂದೆ ತಿಳಿಸಿರುವಂತೆ ಬೈಟ್​ಡಾನ್ಸ್​ ಕಂಪೆನಿ ಒರಾಕಲ್​ ಜತೆ ಮಾತುಕತೆಯನ್ನೇನೋ ನಡೆಸಿದೆ. ಈ ಮಾತುಕತೆ ಫಲಪ್ರದ ಕೂಡ ಆಗಿದೆ. ಈ ಮೂಲಕ ಚೀನಾದ ಟಿಕ್​ಟಾಕ್​ ಉದ್ಯಮ ಒರಾಕಲ್​ ತೆಕ್ಕೆಗೆ ಬಿದ್ದಿರುವುದೂ ನಿಜವೇ.

ಆದರೆ, ಅಂದುಕೊಂಡಂತೆ ಆಗಲಿಲ್ಲ. ಏಕೆಂದರೆ ಬೈಟ್​ಡಾನ್ಸ್ ಕಂಪೆನಿ ಒರಾಕಲ್ ಜತೆ ಕೇವಲ ಪಾಲುದಾರಿಕೆ ಹಂಚಿಕೊಂಡಿದ್ದು, ಅದನ್ನು ಸಂಪೂರ್ಣ ಮಾರಾಟ ಮಾಡಿಲ್ಲ. ಅಂದರೆ ಟಿಕ್‌ಟಾಕ್ ಒಡೆತನ ಚೀನಾ ಮೂಲದ ಬೈಟ್​ಡಾನ್ಸ್​ ಕಂಪೆನಿ ಬಳಿಯೇ ಸುರಕ್ಷಿತವಾಗಿದೆ.

ಆದ್ದರಿಂದ ಭಾರತದಲ್ಲಿ ಟಿಕ್​ಟಾಕ್​ ಮೇಲಿನ ನಿಷೇಧ ತೆರವುಗೊಳಿಸಲು ಸಾಧ್ಯವೇ ಇಲ್ಲ ಎಂದು ಕೇಂದ್ರ ಹೇಳಿದೆ. ಇದು ಚೀನಾದ ಒಡೆತನದಲ್ಲಿ ಇರುವುದು ಮಾತ್ರವಲ್ಲದೇ, ಈ ಆ್ಯಪ್​ನ ಸುರಕ್ಷತೆಯ ಬಗ್ಗೆ ಇದಾಗಲೇ ಸಾಕಷ್ಟು ಸಂದೇಹಗಳು ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ, ನಿಷೇಧವನ್ನು ತೆರವುಗೊಳಿಸುವುದಿಲ್ಲ ಎಂದು ಭಾರತ ಹೇಳಿದೆ. ಟಿಕ್​ಟಾಕ್​ ವಿಡಿಯೋ ಹೆಸರಿನಲ್ಲಿ ಬಳಕೆದಾರರ ಮಾಹಿತಿಗಳನ್ನು ಕದಿಯುವುದು ಕಂಡುಬಂದಿರುವ ಹಿನ್ನೆಲೆಯಲ್ಲಿ, ಮತ್ತೆ ಅದನ್ನು ವಾಪಸ್​ ತರಲು ಸಾಧ್ಯವಿಲ್ಲ ಎಂದಿದೆ.

https://www.vijayavani.net/s-shashikala-will-release-on-jan-2021/

https://www.vijayavani.net/s-us-ban-five-major-import-items-from-china/