ಪತಿ ಕಟ್ಟಿದ ಮಂಗಳಸೂತ್ರವನ್ನು ಆತ ಬದುಕಿರುವಾಗಲೇ ತೆಗೆದು ಇಡುವುದು, ಗಂಡನಿಗೆ ನೀಡುವ ಅತಿ ಹೆಚ್ಚಿನ ಮಾನಸಿಕ ಕ್ರೌರ್ಯ ಎಂದು ಮದ್ರಾಸ್ ಹೈಕೋರ್ಟ್ ಹೇಳಿದೆ. ಪ್ರೊಫೆಸರ್ ಒಬ್ಬರು ತಮ್ಮ ಪತ್ನಿಗೆ ವಿಚ್ಛೇದನ ನೀಡಲು ಅನುಮತಿ ನೀಡಿರುವ ಕೋರ್ಟ್, ಮಂಗಳಸೂತ್ರದ ಮಹತ್ವವನ್ನು ಸಾರಿ ಹೇಳಿದೆ. "ಮಹಿಳೆಯ ಕುತ್ತಿಗೆಯಲ್ಲಿನ ತಾಳಿಯು ಪವಿತ್ರವಾದ ವಿಷಯವಾಗಿದೆ. ಇದು ವೈವಾಹಿಕ ಜೀವನದ ನಿರಂತರತೆಯನ್ನು ಸೂಚಿಸುತ್ತದೆ. ಗಂಡನ ಸಾವಿನ ನಂತರವಷ್ಟೇ ಅದನ್ನು ತೆಗೆದುಹಾಕಲಾಗುತ್ತದೆ. ಆದರೆ ಆತ ಬದುಕಿರುವಾಗಲೇ ತಾಳಿ ತೆಗೆದು ಇಡುವುದು ಮಾನಸಿಕ ಕ್ರೌರ್ಯದ ಪರಾಕಾಷ್ಠೆಯಾಗಿದೆ. ಇದು ಪತಿಗೆ ಸಂಕಟವನ್ನು ಉಂಟು ಮಾಡುವುದು ಮಾತ್ರವಲ್ಲದೇ, ಭಾವನೆಗಳನ್ನು ನೋಯಿಸಬಹುದು' ಎಂದು ಕೋರ್ಟ್ ಹೇಳಿದೆ.
